குமரி, ₹ஜன. 1 –
குமரியில் அய்யன் திருவள்ளுவர் சிலை வெள்ளி விழாவில் முதலமைச்சர் மு.க. ஸ்டாலின் அவர்கள் உரையாற்றும் போது ‘‘திருவள்ளுவர் வெறும் சிலை அல்ல; திருக்குறள் வெறும் நூல் அல்ல; சிலையும், குறளும் நமது வாளும் கேடயமுமாகவே திகழும்’’
என்றும், காவிச் சாயம் பூச நினைக்கும் தீய எண்ணங்களை விரட்டியடிக்கும்’’ என்றும் உணர்ச்சி பொங்கக் கூறினார்.
முதலமைச்சர் மு.க.ஸ்டாலின் அவர்கள் நேற்று (31.12.2024) கன்னியாகுமரியில், முக்கடல் சூழும் குமரி முனையில் அய்யன் திருவள்ளுவர் சிலை வெள்ளி விழாவில், திருக்குறள் ஓலைச்சுவடிகள், புத்தகங்கள், மின்நூல்கள் மற்றும் திருவள்ளுவர் சிலை பற்றிய புகைப்படக் கண்காட்சியை திறந்து வைத்து, அய்யன் திருவள்ளுவர் திருவுருவச் சிலை வெள்ளி விழா சிறப்பு மலரை வெளியிட்டு, அய்யன் திருவள்ளுவர் திருவுருவச்சிலை வெள்ளி விழா வளைவிற்கு அடிக்கல் நாட்டி, திருக்குறள் சார்ந்த போட்டிகளில் வெற்றி பெற்ற மாணவ, மாணவியர்களுக்கு பரிசுத் தொகை வழங்கி சிறப்பித்து ஆற்றிய உரை வருமாறு:–
வள்ளுவம் போற்றுதும்! வள்ளுவம் போற்றுதும்! பேரறிவுச் சிலையாக வானுயர நிற்கும் அய்யன் வள்ளுவர் சிலையின் வெள்ளி விழா நிகழ்ச்சியில் பங்கேற்று
சிறப்பித்துக் கொண்டிருக்கக்கூடிய உங்கள் அனைவருக்கும் எனது தமிழ் வணக்கம்!
“முக்கடல் சூழும் குமரி முனையில்,
முப்பால் புலவர் வள்ளுவருக்கு முத்தமிழறிஞர் வைத்த சிலையினை போற்றக்கூடிய வெள்ளிவிழாவை திராவிட ஆட்சியில், நான் நடத்தி வைப்பதில் மகிழ்ச்சி அடைகிறேன்! பெருமை அடைகிறேன்! பூரிப்பு அடைகிறேன்! இன்னும் சொல்லவேண்டும் என்றால், வாழ்நாளில் என் சிறந்த நாளாக தமிழின் பெருமையை,
குறளின் அருமையை இளைய தலை
முறைக்குக் கொண்டு செல்லும் கடமையை நிறைவேற்றியதாக நான் மகிழ்ச்சி அடை
கிறேன்.
இந்தச் சிலையை திறந்து வைக்கின்ற பொத்தானை அழுத்தக்கூடிய நம்முடைய தலைவர் கலைஞர் அவர்கள் அழுத்தியபோது சொன்னார். தன்னுடைய உடல் நடுங்கியதாக தலைவர் கலைஞர் சொன்னார். ஏனென்றால், அந்தளவுக்கு உணர்ச்சிப் பெருக்கத்தில் அவர் இருந்தார். வான்புகழ் வள்ளுவருக்கு வானுயரச் சிலை அமைக்கவேண்டும் என்பது, அவருடைய நெடுங்கனவு!
வரலாற்று வாய்ப்பை உருவாக்கிய
தலைவர் கலைஞர்!
அந்தக் கனவு நனவான மகிழ்ச்சி,
அவருக்கு அந்த உணர்வை தந்தது!
இன்றைக்கு இந்தச் சிலையின் வெள்ளி விழாவை நடத்தும்போது, எனக்குள் இருக்கின்ற பெருமை இன்றைக்கு ஏற்பட்டுக் கொண்டிருக்கிறது! எவ்வளவு பெரிய சாதனையை செய்துவிட்டு, நமக்கு இப்படி ஒரு வரலாற்று வாய்ப்பைத் தலைவர் கலைஞர் அவர்கள் உருவாக்கித் தந்துவிட்டுப் போயிருக்கிறார் என்ற எண்ணம்தான், இந்தப் பெருமைக்குக் காரணம்!
பொதுவாக,குடும்பங்களில் சாதாரணமாக கேட்பார்கள்…“உன் அப்பா என்ன வைத்துவிட்டு போனார்?” என்று கேட்பார்கள். என்னை கேட்டால், தமிழ்நாடு
தொடங்குகின்ற இந்த குமரிமுனையில்
வள்ளுவர் சிலையில் தொடங்கி, தலைவர்
கலைஞர் செய்த சாதனைகளை சொல்லிக் கொண்டே போகலாம். இதையெல்லாம் தனிப்பட்ட ஸ்டாலினுக்காக செய்தாரா? இல்லை! அப்போது யாருக்காக செய்தார்? தமிழ்நாட்டுக்கும் – தமிழுக்கும் - தமிழினத்துக்கும் உருவாக்கிக் கொடுத்த சொத்துகள்தான் இதெல்லாம்! என்னைப் பொறுத்த வரையில், அவர் வழியில் இந்த நாட்டுக்கும் நாட்டு மக்களுக்கும் - தமிழுக்கும் உழைப்பதுதான் என்னுடைய வாழ்நாள் கடமை!