சென்னை, ஜன.01
தமிழ்நாடு அரசு எடுத்த பல்வேறு நடவடிக்கையால் ஆவின் பால் விற்பனை 2024–25–ல் சுமார் 7 இலட்சம் லிட்டருக்கு மேல் அதிகரித்து தற்போது நாளொன்றுக்கு 30 இலட்சம் லிட்டர் விற்பனை
யாகிறது என்று பால்வளத்துறை அமைச்சர் ஆர்.எஸ்.இராஜ கண்ணப்பன் அறிக்கையில் தெரிவித்துள்ளார்.
அவ்வறிக்கை வருமாறு:–
தமிழ்நாடு முதலமைச் சர் அவர்கள் தலைமையிலான ஆட்சியில் ஆவின் நிறுவனத்தின் சாதனையாக 7 இலட்சம் லிட்டர் பால் விற்பனை அதிகரித்துள்ளது.
தமிழ்நாடு முழுவதும் அமைந்துள்ள 27 ஒன்றியங்கள் மற்றும் சென்னை மெட்ரோ மூலமாக சுகாதாரமான முறையில் தரம் ஒன்றே குறிக்கோளாகக் கொண்டு பால் மற்றும்பால் உபப்பொருட்களை தயாரித்து நுகர்வோர் களுக்கு நியாயமான விலையில் ஆவின் நிறுவனம் விற்பனை செய்து வருகிறது.
தமிழ்நாடு முழுவதும் கடந்த 2019-–2020ஆம்ஆண்டில் சுமார் 23 இலட்சம் லிட்டராக இருந்த ஆவின் பால் விற்பனையை, அரசு எடுத்த பல்வேறு நடவடிக்கையின் காரணமாக 2024–2025–-ல் சுமார் 7 இலட்சம் லிட்டருக்கு மேல் அதிகரித்து தற்போது நாளொன்றுக்கு 30 இலட்சம் லிட்டர் விற்பனை செய்து வருகிறது.
தமிழ்நாடு முதலமைச்சர் அவர்களின் தலைமையில் செயல்படும் தமிழ்நாடு அரசு, பால் உற்பத்தியாளர்களின் கோரிக்கையினை கனிவுடன் பரிசீலனை செய்து, 18.12.2023 முதல் ஆவின் கூட்டுறவு சங்கத்திற்கு பால் வழங்கும் பால் உற்பத்தியாளர்களுக்கு, லிட்டர் ஒன்றுக்கு ரூ.3 உற்பத்தி ஊக்கத்தொகையாக பிரதம சங்கங்களின் மூலம் நிலுவையின்றி உறுப்பினர்களுக்கு வழங்கப்பட்டு வருகிறது. பால் உற்பத்தியாளர்களின் கோரிக்கையின்படி நலச்சங்கத்தின் கோரிக்கையின் படியும், மாவட்ட ஒன்றியத்தில் இருந்து பால் உற்பத்தியாளர்களின் வங்கிக் கணக்கிற்கு நேரடியாக அரசு அறிவித்த ரூ.3 ஊக்கத்தொகை வழங்குவதற்கும் நடவடிக்கை எடுக்கப்பட்டு வருகிறது.
முதற்கட்டமாக நாமக்கல் மாவட்ட கூட்டுறவு பால் உற்பத்தியாளர்கள் ஒன்றியத்தின் மூலம் இந்த பணி ஜனவரி 2025 முதல் வாரத்தில் செயல்படுத்தப்பட உள்ளது. அதனைத் தொடர்ந்து பிற மாவட்டங்களிலும் மேற்கண்ட நடைமுறை அமுல்படுத்தும் விதமாக அரசு அறிவித்த லிட்டர் ஒன்றுக்கு ரூ.3 ஊக்கத்தொகை மாவட்ட ஒன்றியத்தில் இருந்து பால் வழங்கிய சங்க உறுப்பினர்களின் வங்கி கணக்கிற்கு நேரடியாக செலுத்தப்பட உள்ளது என்பதை தெரிவித்துக்கொள்கிறோம்.
இவ்வாறு அமைச்சர் ஆர்.எஸ்.ராஜ கண்ணப்பன் தெரிவித்தார்.