பெரம்பலூர், ஜன. 1- –
பெரம்பலூர் மாவட்டம், வேப்பந்தட்டை வட்டம், எறையூர் சர்க்கரை ஆலையின் அரவை பணியை போக்குவரத்துத்துறை அமைச்சர் சா.சி.சிவசங்கர், மாவட்ட ஆட்சித்தலைவர் கிரேஸ் பச்சாவ் தலைமையில் தொடங்கி வைத்து, சர்க்கரை ஆலையினை பார்வையிட்டார்.
இந்நிகழ்வில், பெரம்பலூர் பாராளுமன்ற உறுப்பினர் கே.என்.அருண்நேரு , பெரம்பலூர் சட்டமன்ற உறுப்பினர் எம்.பிரபாகரன், மாவட்ட ஊராட்சிக் குழுத்தலைவர் குன்னம் சி.ராஜேந்திரன் ஆகியோர் முன்னிலை வகித்தனர்.
சர்க்கரை ஆலை அரவை பணியை தொடங்கி வைத்து, போக்குவரத்துத்துறை அமைச்சர் செய்தியாளர்களிடம் தெரிவித்ததாவது:–
பொதுத்துறை நிறுவன மான பெரம்பலூர் சர்க்கரை ஆலை தமிழ்நாடு அரசின் சர்க்கரை கழக கட்டுப்பாட்டில் இயங்கி வருகிறது. முன்னாள் முதலமைச்சர் கலைஞர் அவர்களால் 1975 ஆம் ஆண்டு அடிக்கல் நாட்டப்பட்டு 1978 ஆம் ஆண்டு முதல் இயங்கி வருகிறது. முன்னாள் முதலமைச்சர் முத்தமிழ் அறிஞர்கலைஞர் அவர்களால் 2010 ஆம்ஆண்டு எறையூர் சர்க்கரை ஆலையில் 18 மெகாவாட் இணைமின் உற்பத்தி திட்டம்துவங்கப்பட்டு, 2019 ஆம் ஆண்டுமுதல் இணைமின் உற்பத்தி செய்யப்பட்டு வருகிறது.
தமிழ்நாடு முதலமைச்சர் அவர்களின் உத்தரவின்படி, 2024-–25ஆம் ஆண்டிற்கான அரவை பருவம் இன்று தொடங்கி வைக்கப்பட்டுள்ளது. கரும்பு அரவை 8.3.2025 வரை நடைபெற உள்ளது. 2 லட்சம் மெட்ரிக் டன் அளவிற்கு கரும்பினை அரவை செய்திடவும் ஆலை சராசரி சர்க்கரை கட்டுமானம் 9.75% அளவிற்கு எய்திடவும் திட்டமிடப்பட்டுள்ளது. தினசரி முழு அளவை திறனுடன் அரவை செய்திட நடவடிக்கை எடுக்கப்பட்டுள்ளது.
மாநில அரசின் ஊக்கத்தொகையாக 2020-–21 ஆம் ஆண்டிற்கு ரூ.192.50ம், 2021-22 ஆம் ஆண்டிற்கு ரூ.195ம், 2022-–23 ஆம் ஆண்டிற்கு ரூ.195ம் 2023-–24 ஆம் ஆண்டிற்கு ரூ.215ம் வழங்கப்பட்டுள்ளது.
கடந்த அரவைப் பருவத்தில் அரவை செய்த கரும்பிற்காக ரூ.71 கோடி கிரயத் தொகையாக வழங்கப்பட்டுள்ளது. மேலும் 2023-–24 ஆம் ஆண்டு அரவைப் பருவத்தில் 2.39 லட்சம் மெட்ரிக் டன்கள் கரும்பு அரவைக்காக 3,380பயனாளிகளுக்கு ரூ.5.13 கோடிகரும்பு அரவைத் தொகை வழங்கப்பட்டுள்ளது. கடந்த ஆண்டைப் போலவே இந்த ஆண்டும் கரும்பு அரவையில் கூடுதல் இலக்கு எட்டப்பட்டு விவசாயிகளுக்கு அரவைத்தொகை வழங்கப்படும். பெரம்பலூர் மாவட்டத்தில் கரும்பு பயிர் பரப்பு விரிவாக்கம் செய்திட சுற்றுலா மற்றும் சர்க்கரைத்துறை அமைச்சர் அவர்கள் தெரிவித்துள்ளபடி, நடவடிக்கை மேற்கொள்ளப்பட்டு வருகிறது. கரும்பு விவசாயிகளுக்கான தேவைகளைபூர்த்தி செய்து அவர்களுக்கானநலத்திட்டங்களையும் தமிழ்நாடு முதலமைச்சர் அவர்கள் சீரிய முறையில் செயல்படுத்தி வருகிறார்கள். அதனை விவசாய பெருமக்கள் பயன்படுத்திக் கொள்ள வேண்டும்.
இவ்வாறு அவர் தெரிவித்தார்.
இதில் எறையூர் சர்க்கரைஆலை தலைமை நிர்வாகி ரமேஷ்,மாவட்டக் கழக பொறுப்பாளர் வீ.ஜெகதீசன், வேப்பந்தட்டை ஊராட்சி ஒன்றியக் குழுத் தலைவர் க.இராமலிங்கம், மாவட்ட ஊராட்சிக்குழு துணைத் தலைவர் முத்தமிழ்ச் செல்வி மதியழகன், மாவட்ட ஊராட்சிக் குழு உறுப்பினர்கள் தழுதாழை.பாஸ்கர், மகாதேவி ஜெயபால்,
வேப்பந்தட்டை வட்டாட்சியர் மாயகிருஷ்ணன், எறையூர் ஊராட்சி மன்ற தலைவர் ஜெயந்தி ராம்குமார் மற்றும் விவசாயிகள், உள்ளாட்சி அமைப்புகளின் பிரதிநிதிகள் கலந்து கொண்டனர்.