சென்னை – கலைவாணர் அரங்கில் நடைபெற்ற விழாவில் – பள்ளிக் கல்வித்துறை அமைச்சர் அன்பில் மகேஷ் பொய்யாமொழி, தமிழ்நாடு தனியார் பள்ளிகள் சங்கத்தை துவக்கி வைத்தார். இதில் அரசு அதிகாரிகள் கலந்து கொண்டனர்.
சென்னை, ஜன. 1 –
சென்னை, கலைவாணர் அரங்கில் நடைபெற்ற விழாவில் பள்ளிக்கல்வித் துறை அமைச்சர் அன்பில் மகேஸ் பொய்யாமொழி அவர்கள் தமிழ்நாடு தனியார் பள்ளிகள் சங்கத்தை துவக்கி வைத்தார். இவ்விழாவில் பள்ளிக்கல்வித் துறை அமைச்சர் அன்பில் மகேஸ் பொய்யாமொழி பேசியதாவது:
முதலமைச்சர் அவர்கள், துணை முதலமைச்சர் ஆகியோரின் சார்பில் தனியார் பள்ளிகள் சங்கத்திற்கு எனது வாழ்த்துக்களைத் தெரிவித்துக் கொள்கிறேன்.
“கல்வியில் சிறந்த தமிழ்நாடு என்பது வெறும் அரசு பள்ளிகளால் மட்டுமல்ல தனியார் பள்ளிகளின் பங்களிப்பும் உள்ளது. சங்கம் நடத்துவது மிகவும் சாதாரண காரியம் அல்ல, மாணவர்களின் நலனுக்காக,அவர்களின் எதிர்காலத்தைக்கருத்தில் கொண்டு தனியார் பள்ளி நிர்வாகத்துடன் அரசு உள்ளது என்பதைக் கருத்தில் கொள்ள வேண்டும். தனியார் பள்ளிகள் சங்கம் 9 வகையான கோரிக்கைகளை அளித்துள்ளது அதனை முதலமைச்சர் அவர்கள் கவனத்திற்கு கொண்டு சென்று நிறைவேற்ற நடவடிக்கை மேற்கொள்ளப்படும்.
தனியார் பள்ளிகளின்
பங்களிப்பு!
தனியார் பள்ளிகள் புதிய ஒரு சமுதாயத்தை உருவாக்கும் நோக்குடன் சமுதாயத்தின் மீது வைத்துள்ள நம்பிக்கையோடு மிகப் பெரிய பணியைச் செய்து வருகிறது. தனியார் பள்ளிகளின் பங்கின்றி ஒரு நல்ல சமுதாயத்தை உருவாக்க இயலாது. தனியாரின் பங்கு உலகளவில் ஏதேன்ஸ் நகரிலிருந்து துவங்கி செயல்பட்டு வருகிறது. 500 அரசு பள்ளிகளை தத்தெடுத்து பள்ளிக்குத் தேவையான கட்டமைப்புகளை தனியார் பங்களிப்புடன் நிறைவேற்றித்தர
நடவடிக்கை மேற்கொள்வோம் என்ற தீர்மானத்
திற்கு எனது நன்றியைத் தெரிவித்துக்கொள்கிறேன்.
தமிழ்நாட்டில் உள்ள 1.23 கோடி மாணவர்களுக்கு பாதுகாப்பை உறுதி செய்ய வேண்டும்.தனியார் பள்ளிகளுக்கு தமிழ்நாடு அரசு அங்கீகாரம் மட்டும் அல்ல தனியார் பள்ளி மாணவர்கள் செய்யும் சாதனைகளையும் அங்கீகரித்து பாராட்டும் அரசாக முதலமைச்சர் அவர்கள் உள்ளார்கள். முதலமைச்சர் அவர்கள் தலைமையில் பெற் றோர் ஆசிரியர் கழக மாநாடு வருகின்ற பிப்ரவரி மாதத்தில் நடைபெற உள்ளது. உங்களது கோரிக்கைகள் நிறைவேற்றத் தேவையான சாத்தியக் கூறுகளை ஆராய்ந்து நடவடிக்கை மேற்கொள்ளப்படும். ஒன்றிய அரசு மாநில அரசுக்கு வழங்க வேண்டிய நிதியை ஒதுக்கீடு செய்யாமல் உள்ளது.
புதிய சங்க நிர்வாகிகளுக்கு
வாழ்த்துகள்!
தனியார் பள்ளிகள் அரசு பள்ளிக்கு வருகைத்தந்து அரசுப் பள்ளியில் நடைபெறும் கல்வி கற்றல் நிலையைப் பாருங்கள். அரசுப் பள்ளி நிர்வாகம் தனியார் பள்ளிக்கு வருகை தந்து அங்குள்ள கற்றல் திறனைப் பார்வையிடுவார்கள். நாம் கற்றுக்கொண்டஅனைத்தையும் நம் மாணவர்களுக்கு கொண்டு சென்று மேலும் சிறப்பானக் கல்வியைக் கற்றுத் தருவோம். புதிதாகத் தேர்வு செய்யப்பட்டுள்ள சங்க நிர்வாகிகளுக்கு என் வாழ்த்துக்களைத் தெரிவித்துக் கொள்கிறேன் என பேசினார்.
இந்நிகழ்ச்சியில், பள்ளிக் கல்வித் துறை அரசு செயலாளர் திருமதி.சோ.மதுமதி, தனியார் பள்ளி இயக்குநர் பழனிச்சாமி, தொடக்கப்பள்ளி இயக்குநர் பு.ஆ.நரேஷ், தமிழ்நாடு பெற்றோர்ஆசிரியர் கழகத் துணைத் தலைவர் முத்துக்குமார், தனியார் பள்ளிகள் சங்கம் நிறுவனர் மாநிலத் தலைவர் பி.டி.அரசகுமார், மாநில பொதுச் செயலாளர்கள் டி.சி.இளங்கோவன், கே.ஆர்.நந்தகுமார், மாநில ஒருங்கிணைப்பாளர் ஆறுமுகம், மாநில சட்ட செயலாளர் ஐ.மனோ கரன் ஜெயக்குமார், மாநில பொருளாளர் ஸ்ரீதர் மற்றும் தனியார் பள்ளிகள் சங்க நிர்வாகிகள்ஆகியோர் கலந்துகொண்டனர்.