சென்னை, ஜன 1 –
சென்னையில் நடைபெறும் 48–வது புத்தகக் காட்சியில் திராவிட இயக்க ஆளுமை ஒருவருடன்
தினந்தோறும் வாசகர்கள் பங்கேற்கும் கலந்துரையாடல் நிகழ்ச்சியை முத்தமிழறிஞர் பதிப்பகம் நடத்தி
வருகிறது. தி.மு.க. செய்தித்தொடர்பாளர் சூர்யா கிருஷ்ணமூர்த்தி உடன் நேற்று முன்தினம் நடைபெற்ற கலந்துரையாடலில், வாசகர்கள் பலரும் ஆர்வமுடன் பங்கேற்றனர்.
வாசகர்களிடையே பேசிய சூர்யா கிருஷ்ண மூர்த்தி, “பேச்சையும், எழுத்தையும் கழித்துவிட்டால் திராவிட இயக்கம் என்ற ஒன்றே இருந்திருக்க முடியாது. பேச்சையும், எழுத்தையும் வைத்துதான் இந்த இயக்கம் சாதித்த அனைத்து மாற்றங்களும் நடந்தேறியது. அரை நூற்றாண்டுக்கு முன்பு வரை எழுதுவதற்கும், பேசுவதற்கும் பலர் இருந்தனர். ஆனால் அவர்களுக்கு எழுதவும், பேசவும் வாய்ப்பு அவ்வளவு எளிதில் கிடைக்கவில்லை. பல்வேறு சமூகத்தடைகள், நேரடித் தாக்குதல்கள் இருந்தன. அவற்றையெல்லாம் சமாளித்துதான் திராவிட இயக்கத் தலைவர்கள் எழுதவும், பேசவும் துணிந்து முன்வந்தனர்.
ஆனால் இன்றைக்கு யார் வேண்டுமானாலும் எழுதலாம், பேசலாம். அதற்கான சூழல் இருக்கிறது. சிந்தனை இருந்தால் போதும், யார் வேண்டுமானாலும் பேசலாம் என மேடையை வழங்கியிருக்கிறது ‘என் உயிரினும் மேலான’ பேச்சுப்போட்டி.
யார் வேண்டுமானாலும் எழுதலாம் என்ற வாய்ப்பை முரசொலி பாசறைப் பக்கம் சாத்தியப்படுத்தியிருக்கிறது. இதன் அடுத்தகட்டமாக உருவாகியிருப்பதுதான் முத்தமிழறிஞர் பதிப்பகம். இந்த நூல்களையும், தி.மு.க. வரலாறு சார்ந்த மற்ற பல நூல்களையும் இன்றைய இளம் தலைமுறை வாசிக்க வேண்டும்.
அதன்மூலம் நீங்களும் பேச்சாளர்களாக, எழுத்தாளர்களாக உருவெடுக்க வேண்டும். குறிப்பாக சமூக வலைத்தளங்களில் எழுத, பேச வேண்டும். ஏனென்றால் இன்றைய சூழலில் அச்சு, தொலைக்காட்சி ஊடகங்களை விட செய்திகள் அதிகம் பரவும் இடம் சமூக வலைத்தளங்கள்தான். இன்றைய இளம் தலைமுறையினர் அங்கேதான் இருக்கிறார்கள். தி.மு.கழகத்திற்கு எதிரான அவதூறுகளும் எதிரிகளால் திட்டமிட்டு சமூக ஊடகங்களில்தான் பரப்பப்படுகிறது. ஆட்சிக்கு எதிராக, எந்த குறையும் சொல்ல முடியாத சூழலில், தனிநபர் சிக்கல்களை சட்ட ஒழுங்கு சிக்கலாக திசைதிருப்பும் சூழ்ச்சிகள் அங்கேதான் நடக்கின்றன. அவற்றை முறியடிக்க நமக்கு வாசிப்பு அவசியம். இந்த இயக்கத்தின் மீதான அவதூறுகளை முறியடிக்க வாசித்ததை பேசுவதும், எழுதுவதும் மிக மிக அவசியம்” எனக் கூறினார்.
வாசர்கள் எழுப்பிய பல்வேறு கேள்விகளுக்கும் எளிமையான முறையில் விளக்கம் அளித்தார்.
- சூர்யா கிருஷ்ணமூர்த்தி