தூத்துக்குடி, பிப்.2–
பெண் கல்வியே ‘திராவிட மாடல்’ ஆட்சியின் அடிப்படை என்று கல்லூரி பொன் விழாவில் பேசிய கனிமொழி கருணாநிதி எம்.பி. குறிப்பிட்டார்.
தூத்துக்குடி - எட்டயபுரம் சாலையில் உள்ள ஏ.பி.சி மகாலெட்சுமி பெண்கள் கல்லூரியின் பொன்விழா நிகழ்ச்சி கல்லூரி வளாகத்தில் நடைபெற்றது.இதில், தூத்துக்குடி பாராளுமன்ற உறுப்பினரும், தி.மு.க. துணைப் பொதுச்செயலாளரும், தி.மு.க. நாடாளுமன்றக் குழு தலைவருமான கனிமொழி கருணாநிதி அவர்கள் கலந்துகொண்டு சிறப்புரையாற்றி, புதிதாக கட்டப்பட இருக்கும் ஆடிட்டோரியம்
கட்டுமானப் பணிகளுக்கு அடிக்கல் நாட்டினார்!
அப்போது கனிமொழி கருணாநிதி எம்.பி. ஆற்றிய உரை வருமாறு:–
“தலைவர் கலைஞர் துவக்கி வைத்த கல்லூரி இந்த கல்லூரி. அப்போது அவரது பேச்சிலே, ‘10 ஆசிரியர்கள்,... 126 மாணவர்கள், எந்த விதமான உள்கட்டமைப்பும் இல்லாத இந்த கல்லூரியை நிறுவிய மரியாதைக்குரிய வீரபாகுவின் செயலாற்றல் மீது நம்பிக்கை வைத்து இந்த கல்லூரியை நான் திறந்து வைத்திருக்கிறேன்’ என்று இதே வளாகத்திலே நின்று உரையாற்றியிருக்கிறார்.
இந்த கல்லூரியின் 25 ஆவது ஆண்டு விழாவின் போது இந்த கல்லூரிக்கு வாழ்த்துகளையும் தெரிவித்தார். “இன்று கல்லூரிக்கு அனுமதி வழங்கிவிட்டு, தொடக்க விழாவிலும் கலந்துகொண்டேன். இந்த கல்லூரி இப்போது மிக சிறப்பாக செயல்பட்டுக் கொண்டிருக்கிறது’ என்றும் வாழ்த்து தெரிவித்தார்கள்.
மனதுக்கு மகிழ்ச்சியைத்
தரக்கூடிய விழா!
இன்று அவரது மகளாக, இந்த தொகுதியின் மக்களவை உறுப்பினராக இந்த கல்லூரியின் பொன் விழாவில் கலந்துகொள்வது என்பது என்னால் என்றுமே மறக்க முடியாத, மனதுக்கு மகிழ்ச்சியை தரக் கூடிய மன நிறைவை தரக் கூடிய பெருமிதத்தைத் தரக் கூடிய நிகழ்வு.
இந்த கல்லூரியிலே படித்த ஒரு அமைச்சர் இந்த மேடையிலே இருக்கிறார். எத்தனையோ அதிகாரிகள் இருக்கிறார்கள். நாம் பெருமிதப்படக் கூடிய அதே நேரத்தில்... ஒரு பெண் கல்வி பெறுவதற்கு பள்ளிக் கூடம் செல்வதற்கு, கல்லூரிக்குசெல்வதற்கு எத்தனை போராட்டங்களை கடந்து வரவேண்டியிருந்திருக்கிறது என்பதை இன்று நாம் அனைவரும் உணர வேண்டும்.
இன்று பள்ளி முடித்த மாணவியிடம் அடுத்து என்னம்மாபண்ண போறே என்று கேட்டால்., சர்வசாதாரணமாக காலேஜ் என்று பதில் வருகிறது. அதற்குப் பிறகு என்ன பண்ணப் போகிறாய்என்றால் வேலைக்குப் போகப் போகிறேன். இல்லேன்னா அடுத்த டிகிரி படிக்கப் போகிறேன் என்றுதான் பதில் வரும். இதெல்லாம் இன்று ரொம்ப சாதாரணமாக பேசக்கூடிய விஷயம்.
ஆனால் இன்று நாம் இந்த நிலையை அடைவதற்கு நமது முந்தைய தலைமுறையினர் எவ்வளவு போராட்டங்களை, எவ்வளவுதியாகங்களை செய்திருக்கிறார்கள் என்பதை நாம் உணர்ந்திருக்க வேண்டும். அதை நாம் உணர்ந்தால்தான், இந்த இடம் கிடைத்திருக் கிறதே அதன் மரியாதையை நாம் செலுத்த
முடியும்.
எத்தனை அறிவியல் வளர்ச்சி
வந்தாலும் முன்னேறாது!
பெண்கள் அதிகமாக படிக்க அனுப்பப்படாத காலகட்டத்திலேயேபெண்கள் படிப்பதற்காக தொடங்கப்பட்ட கல்லூரி இது, இன்று பெண்கள் தங்கள் சொந்தக் காலில் நிற்கும்போது சமூகத்தின் சிந்தனை செயல்பாடு ஓட்டம் எல்லாமே மாறும். தனக்காக ஒரு சதுரத்தை உருவாக்கிக் கொண்டு அதற்குள் இருக்கும் சமூகம்... பெண்கள் வெளியே வரக் கூடாது படிக்கக் கூடாது என்றுநினைக்கும் சமூகம்... அது எத்தனை அறிவியல் வளர்ச்சி வந்தாலும் அது முன்னேறாது.
நாம் எந்த வளர்ந்த நாட்டின் சமூகத்தை எடுத்துக் கொண்டாலும், அதன் அடிப்படையாக பெண் கல்விஇருக்கும். திராவிட மாடல் என்று நம் முதல்வர் பெருமையாகசொல்கிறாரே, நம் ஆட்சியின் அடிப்படையே பெண்கல்விதான்.இந்த சமூகத்துக்கு வெளியே கல்விக்கு வெளியேயார் யாரெல்லாம் விடுபட்டவர்களாக இருந்தார்களோ அவர்களை எல்லாம் இன்று உள்ளே கூட்டி வந்து அவர்களுக்கும் கல்வி தந்து பெண்களை ’எம்பவர்’ செய்வதுதான் பெண் கல்வியின் அடிப்படை. அதை நாம் ஒவ்வொரு நாளும் மனதிலே நிறுத்திக் கொள்ள வேண்டும்.
ஜோதிராவ் பூலே!
ஏனென்றால் நீங்கள் இப்போது உட்காந்திருக்கிற இடத்துக்கு அவ்வளவு வரலாறு இருக்கிறது. ஜோதிராவ் பூலே பற்றி நீங்கள் படித்திருப்பீர்கள். மகாராஷ்டிராவில் பெண் கல்விக்காகதங்கள் வாழ்நாளையே அர்ப்பணித்துக் கொண்டதம்பதி அவர்கள்.
அவருடைய மனைவி முதல் முறையாக பள்ளிக் கூடத்துக்கு போகிறபோது- திருமணத்துக்குப் பிறகுதான் பள்ளிக்குச் செல்கிறார். அப்படி செல்கிறபோது இரண்டு சேலைகளை எடுத்துக் கொண்டு போவார். ஒன்றை கட்டிக் கொண்டு செல்வார். இன்னொன்று மாற்றுக்கு எடுத்துச் செல்வார். ஏனென்றால்... அவர் வீட்டில் இருந்து பள்ளிக் கூடம் செல்லும் அவரை அவர் மீது சேறு, சகதி, அழுக்கு என்று கண்டதையும் வீசி எறியும் அந்த கால சமூகம். ஏனென்றால் ஒரு பெண் பள்ளிக் கூடம் சென்று படிக்கக் கூடாது என்பதற்காக. அதனால் அவர் மாற்று சேலையையும் எடுத்துச் செல்வார். வீடு திரும்பும்போதும் இதேபோல சேறு வீசுவார்கள்.
இன்று இந்த சமூகம் கல்வியை மிக சாதாரணமாக ஏற்றுக் கொண்டிருக்கிறது என்றால், அந்த போராட்டம்அதன் வரலாறு என்ன என்பதை நாம் புரிந்துகொண்டால்தான் இந்த இடத்தை நீங்கள் தக்க வைத்துக் கொள்ள முடியும்.
இன்று கல்வி நமக்கானது, நம்மை வளர்த்துக் கொள்ளக் கூடியது. வேலைக்கு போவதற்காக மட்டுமே நாம் படிக்கவில்லை. நம் உலகத்தை விரிவாக்குவதற்காக நாம் நம்மை புரிந்துகொள்வதுதான் கல்வி நமக்கு தரக் கூடிய மிகப்பெரிய கொடை. இந்த பயணத்தில் உங்கள் கனவுகளை எந்த காரணத்துக்காகவும் யாருக்காகவும் விட்டுக் கொடுத்துவிடாதீர்கள். சில நேரம் நமக்கு கவனச் சிதறல்கள் இருக்கும். அதுவும் வாழ்வின் ஒரு பகுதிதான். அதை நான் மறுக்கவில்லை. ஆனால் அதையும் தாண்டி நீங்கள் எந்த இலக்கை அடைய நினைக்கிறீர்கள்,உங்கள் கனவுகள் என்ன என்பதை தீர்மானிக்க வேண்டும். ஏனென்றால் இன்று உங்கள் கையிலேயே கவனச் சிதறல் இருக்கிறது.
சோஷியல்மீடியா பிரஷர்!
உங்கள் கையில் இருக்கும் சோஷியல் மீடியா, இணையம் என்பவை உலகத்தின்
கதவுகளை உங்களுக்கு திறக்கின்றன. எந்த ஒரு விஷயமாக இருந்தாலும் எங்கேயும் போய் தேடவேண்டியதில்லை. அதை செல்போனில் எடுத்துவிட முடியும். அதேபோல கம்யூனிகேஷன் தகவல் தொடர்பும் நமக்கு கிடைக்கிறது. அதேநேரம் அதில் சில சிக்கல்களும் இருக்கின்றன.
இன்ஸ்டாகிராமிலோ வேறு சோஷியல் மீடியாவிலோ ஒரு போஸ்ட் போடுவீர்கள். அங்கே நாம் நமக்கென ஒரு பிரஷர் க்ரூப்பையும் நாம் உருவாக்கிக் கொள்கிறோம். நம்முடைய ஃபாலோயர்களின் கருத்துகள், கமெண்ட்டுகள் நம் மீது ஒரு ப்ரஷராக மாறக் கூடிய சூழல்கள், வாய்ப்புகள் இருக்கிறது.
ஒரு விஷயத்தை நாம் சொல்லும்போது லைக் போதவில்லை என்ற உணர்வு நம்மை பாதிக்கும். சில ஆண்டுகளுக்கு முன் நம்மைச் சுற்றி பிசிகல் ப்ரஷராக இருந்தது, இன்று நம்மைச் சுற்றி கண்ணுக்குத் தெரியாத சோஷியல் மீடியா ப்ரஷராக இருக்கும். அதை நாம் உடைக்க வேண்டும், கடக்க வேண்டும்.
ஒரு பெண் வாழ்வில் சாதிக்க வேண்டுமென்றால் அது மனத் தடையாக இருக்கட்டும், பாரம்பரியம் என்ற தடையாக இருக்கட்டும், சமூகம் என்ற தடையாக இருக்கட்டும், சாதி மதம் என்ற விஷயங்களை எல்லாம் உடைத்து எறிந்தால்தான் அந்த சாதனையை நாம் செய்ய முடியும்என்று தந்தை பெரியார் வலியுறுத்தியிருக்கிறார்.
பெரியாரின் புத்தகத்தை
அவசியம் படியுங்கள்!
தந்தை பெரியாரைத் தாண்டி ஒரு ஃபெமினிஸ்டை நான் இதுவரை படித்ததில்லை. என்ன தடையாக இருந்தாலும் அதை உடை என்று சொன்னார் பெரியார். எல்லாருமே பெண்கள் என்றால் ஒரு லிமிட்டேஷன் வைத்திருப்பார்கள். ஆனால் அதுபோன்ற எந்த ஒரு சமரசமும் இல்லாமல் சிந்தித்தவர் பெரியார். அவர் எழுதிய, ‘பெண் ஏன் அடிமையானாள்?’ என்ற புத்தகத்தை தயவு செய்து எல்லா
பெண்களும் படியுங்கள்.
இங்கே அமைச்சர் பேசும்போது தமிழ் துறையை பற்றி பேசினார்கள். பெரிய ஆரவாரத்தோடு அதற்கு மாணவிகள் ரெஸ்பாண்ட் செய்தார்கள். பார்க்கும்போது மகிழ்ச்சியாக இருந்தது. ஏனென்றால் பொதுவாகவே எல்லா கல்லூரிகளிலும் தமிழ் துறை என்பது பாவமாக ஒரு ஓரமாக இருக்கும். ஆனால் இந்த கல்லூரியிலே தமிழ் துறை பவர் ஃபுல் துறையாக இருப்பது பெரிய மகிழ்ச்சி.
ஆங்கிலத்தில் டிபேட் செய்தால், ஆங்கிலத்தில் கவிதை எழுதினால் அது பெருமையாக கருதப்படுகிறது. ஆனால் இன்றைக்கு நமது முதலமைச்சர் தமிழின் தொன்மையை மிகப் பெருமையாக அறிவித்தார்கள்.
நமது தூத்துக்குடி மாவட்டம் சிவகளை
யில்தான் 5 ஆயிரம் ஆண்டுகளுக்கு முன்பே இந்தியாவில் முதல் முறையாக இரும்பு பயன்படுத்தப்பட்டது. இந்த பெருமை இருக்கக் கூடிய மாவட்டம், இந்தபெருமை இருக்கக் கூடிய தமிழினம் நாம். அந்த தமிழினத்தின் வழிவந்தவர்கள் நீங்கள். தமிழ் துறை மட்டுமல்ல...நாம் எல்லாரும் தமிழர்கள்தான்., நாம் எல்லாரும் பெருமைப்பட வேண்டும்.
அதனால், நம்மை யாரும் அடக்கிவிட முடியாது. அது ஆண்களாக இருக்கட்டும், பெண்களாக இருக்கட்டும். பெண்களை எதுவும் அடக்கிவிடவோ, நிறுத்திவிடவோ, பின்னால் இருந்து இழுக்கவோ அனுமதிக்காதீர்கள். முன்னே றுங்கள், உலகை வெற்றி கொள்ளுங்கள். வாழ்த்துகள்” இவ்வாறு கனிமொழி கருணாநிதி எம்.பி. உரையாற்றினார். இதில் அமைச்சர் பெருமக்கள் கீதா ஜீவன், அனிதா இராதா கிருஷ்ணன், மாநகராட்சி மேயர் ஜெகன் பெரிய சாமி, கல்லூரி தலைவர் ஏ.பி.சி.வி.சொக்க லிங்கம், காங்கிரஸ் மாநில துணைத் தலைவர் ஏ.பி.சி.வி.சண்முகம், கல்லூரி முதல்வர் கே.சுப்புலெட்சுமி மற்றும் பலர் கலந்து கொண்டனர்.