விழுப்புரம், பிப். 2 –
தமிழகத்தில் தேவதாசி முறையை ஒழித்த பெருமை முன்னாள் முதலமைச்சர் ஓமந்தூராரையே சாரும் என வனத்துறை அமைச்சர் முனைவர் க.பொன்முடி ஓமந்தூரார் அவர்களின் 130 வது பிறந்தநாளை முன்னிட்டு அவரது மணி மண்டபத்தில் அவரின் திருவுருவச் சிலைக்கு மாலை அணிவித்து மரியாதை செலுத்தி புகழாரம் சூட்டினார்.
தமிழகத்தின் முன்னாள் முதலமைச்சர் ஓமந்தூரார் அவர்களின் 130-வது பிறந்தநாள் விழாவை முன்னிட்டு திண்டிவனம் அடுத்த ஓமந்தூரில் உள்ள அவரது மணி மண்டபத்தில் வனத்துறை அமைச்சர் முனைவர் க.பொன்முடி ஓமந்தூரார் திருவுருவச் சிலைக்கு மாலை அணிவித்து மரியாதை செலுத்தினார்.
பின்னர் செய்தியாளர்கள் மத்தியில் பேசிய வனத்துறை அமைச்சர் முனைவர் க.பொன்முடி கூறியதாவது :–
மணிமண்டபம் அமைத்தது தி.மு.க. ஆட்சி காலத்தில் தான். அப்போது முதலமைச்சராக இருந்த தலைவர் முத்தமிழ் அறிஞர் கலைஞர் அவர்கள் அனுமதி வழங்கினார். அப்போது அமைச்சராக இருந்த தமிழ்நாடு முதலமைச்சர் மு.க.ஸ்டாலின் அவர்கள் திண்டிவனம் வருகை புரிந்து மணி மண்டபம் கட்டுவதற்கான இடத்தை தேர்வு செய்து முன்னின்றுஅனைத்து ஏற்பாடுகளையும் செய்தார்.
அதனைத் தொடர்ந்து ஓமந்தூரார் பிறந்தநாள் விழா மாவட்ட நிர்வாகத்தி ன் சார்பில் சிறப்பாக கொண்டாடப்பட்டு வருகிறது. தமிழ்நாட்டின் முதல் முதலமைச்சராக பதவி ஏற்ற ஓமந்தூரார் அவர்கள் தேவதாசி முறையை ஒழித்ததும், அனைவரும் கோவிலுக்குள் நுழைய அதிகாரம் வழங்கியதும், ஜமீன்தார் முறையை ஒழித்ததும், வடலூரில் சுத்த சன்மார்க்க மையம் அமைத்த பெருமையும் ஓமந்தூராரையே சாரும்.
அவர் சார்ந்த சமுதாயத்திற்கு மட்டுமல்ல தமிழகத்தில் உள்ள அனைத்து சமுதாய மக்களும் பயன்பெறும் வகையில் பல்வேறு சட்டங்களை இயற்றிய பெருமை ஓமந்தூராரையே சாரும் எனபெருமையுடன் தெரிவித்தார்.
திண்டிவனம் சார் ஆட்சியர், விக்கிரவாண்டி சட்டமன்ற உறுப்பினர் அன்னியூர் சிவா, விழுப்புரம் வடக்கு மாவட்ட செயலாளர் ப.சேகர், விழுப்புரம் தெற்கு மாவட்ட பொருளாளர் இரா.ஜனகராஜ் , தலைமை தீர்மான குழு உறுப்பினர் செஞ்சி சிவா, வடக்கு மாவட்ட பொருளாளர் ரமணன், முன்னாள் சட்டமன்ற உறுப்பினர் மாசிலாமணி, முன்னாள் நகர செயலாளர் கபிலன், தலைமைச் செயற்குழு உறுப்பினர் சீனி ராஜ், இளைஞர் அணி அமைப்பாளர் கண்ணன் ஆனந்த், துணை அமைப்பாளர் டி.கே.பி.ரமேஷ், எம்.டி.பாபு, அண்ணாமலை உள்ளிட்ட பலர் உடனிருந்தனர்.