நெல்லை, ஜன.2–
தி.மு.க.தகவல் தொழில்நுட்ப அணி சார்பில் நெல்லை மண்டல தகவல் தொழில்நுட்ப அணி ஆய்வுக்கூட்டம் மற்றும் ஆலோசனைக் கூட்டம் பாளை அன்னை மகாலில் நடைபெற்றது.
இந்நிகழ்வில் தி.மு.க.தகவல் தொழில் நுட்ப அணி செயலாளர் தொழில்துறை அமைச்சர் டி.ஆர்.பி.ராஜா பங்கேற்றார்.
பின்னர் அமைச்சர் டி.ஆர்.பி.ராஜா செய்தியாளர்களிடம் தெரிவித்ததாவது.
தி.மு.க.வின் தகவல் தொழில்நுட்ப அணி வரும் ஆண்டின் முதல் மூன்று மாதத்திற்குள் மிகப்பெரிய பரிமாண வளர்ச்சியை அடைய உள்ளது. லட்சக்கணக்கான இளைஞர்களை கழகத்தின் ஐடி வங்கியில் சேர்க்க உள்ளோம்.மத்திய அரசின் மிகப்பெரிய அறிவியல் ஆய்வு நடத்தும்
நிறுவனமான அறிவியல் மற்றும் தொழிலக ஆய்வு மன்றம் (சி.எஸ்.ஐ.ஆர்.) மூலம் புதிய ஆராய்ச்சிகள் புதிய முயற்சிகள் நடத்தப்பட்டு வருகிறது. திருவனந்த
புரத்தில் உள்ள சி.எஸ்.ஐ. ஆர்.நிறுவனத்தை நேரில் சென்று ஆய்வு மேற்கொண்டோம். அங்கு மிகப்பெரிய ஆராய்ச்சிகள் தற்போது நடந்து வருகிறது.தமிழகத்திற்கு மிகப்பெரிய திட்டங்களையும் புதிய ஆராய்ச்சிகளையும் கொண்டு வர வேண்டும் என்ற நோக்கத்தில் அதிகாரிகளுடன் சென்று அங்கு ஆய்வு மேற்கொள்ளப்பட்டது.ஆராய்ச்சி மற்றும் மேம்பாட்டின் உலகின் தலைமையகமாக தமிழகத்தை மாற்ற வேண்டும் என முதலமைச்சர் அவர்கள் முயற்சி மேற்கொண்டு வருகிறார்கள்.சி.எஸ்.ஐ. ஆர்.நிறுவனத்தை தமிழகத்தில் தொடங்குவதற்கான பேச்சுவார்த்தை நடந்து வருகிறது.
சிப்காட் நிறுவனத்தின் மூலம் அதற்கான இடம் வழங்கப்பட உள்ளது அந்த நிறுவனம் தொடங்குவதற்கான அறிவிப்பு முதலமைச்சர் அவர்களால் விரைவில் வெளியிடப்படும்.தமிழகம் எங்கும் மிகப்பெரிய வளர்ச்சியை தமிழக முதலமைச்சர் அவர்கள் கொண்டு வந்து சேர்த்துள்ளார்கள்.தென்தமிழகம் மிகப்பெரிய வளர்ச்சியை அடைந்துள்ளது.
தூத்துக்குடி மாவட்டத்தில் வின் பாஸ்ட் நிறுவனம் கொண்டுவரப்பட்டுள்ளது நெல்லை மாவட்டம் கங்கைகொண்டானில் டாடா,சோலார் போன்ற நிறுவனங்கள் வந்துள்ளது.இன்னும் பல நிறுவனங்கள் தமிழகத்திற்கு வரவுள்ளது.நாங்குநேரி பகுதிக்கு மிகப்பெரிய விடியலை தர வேண்டும் என தொடர் முயற்சிகள் தமிழக அரசால் மேற்கொள்ளப்பட்டு வருகிறது. நாங்குநேரி பொருளாதார மண்டலத்தில் தொழில் நிறுவனங்கள் கொண்டு வருவதற்கான சட்ட சிக்கல்கள் ஒன்றிய அரசிடம்
உள்ளது.
இரண்டு வாரத்திற்கு ஒருமுறை டெல்லிக்கு சென்று அந்த பிரச்சினையை முடிப்பதற்கான பணிகளை தொழில்துறை அதிகாரிகள் மேற்கொண்டு வருகிறார்கள். திருநெல்வேலி மாவட்டத்தில் மிகப்பெரிய வளர்ச்சியை கொண்டு வருவதற்கு தி.மு.க.அரசு நிச்சயம் உதவி செய்யும் அதற்கான முயற்சிகள் எடுக்கப்பட்டு
வருகிறது.
இவ்வாறு அமைச்சர் டி.ஆர்.பி.ராஜா தெரிவித்தார்.