நடிகை விஜயகுமாரியின் பேட்டி ஒன்று 05.02.2025 தேதியிட்ட ஆனந்த விகடன் ஏட்டில் வெளியாகி இருக்கிறது. அதில் அவர் ஓர் இடத்தில், ‘‘அண்ணாவின் 50–ஆவது பிறந்த நாளுக்கு 50 சவரன் தங்கக் காசு கொடுத்தார் என் கணவர். இப்போ இருக்கிற ‘அன்பகம்’ இடத்தைக் கணவர்தான் வாங்கிக் கொடுத்தார். இந்தியாவிலேயே நடிகரா இருந்து முதல் சட்டமன்ற உறுப்பினர் ஆனவர் என் கணவர்’’ என்று பேட்டி அளித்து இருக்கிறார். இதில் மூன்று விஷயங்கள் சொல்லப்பட்டுள்ளன.

அவற்றில் இரண்டு சரியானவை. அன்பகத்தை எஸ்.எஸ்.ஆர். வாங்கிக் கொடுத்தார் என்று சொல்வது சரியானது இல்லை. இடம் – கட்டடம் என்று இரண்டையும் கழக நிதியிலிருந்து கலைஞர் வாங்கினார். அவர் கழகப் பொருளாளராக அப்போது இருந்தார்.

1964–இல் இந்தக் கட்டடம் வாங்கப்பட்டது. இக்கட்டடத்தை அண்ணா திறந்து வைத்தார். அதில் அண்ணாவோடு கலைஞர், கே.ஏ. மதியழகன், எஸ்.எஸ்.இராஜேந்திரன் கலந்து கொண்டனர். அது ஒளிப்படம் எடுக்கப்பட்டு இருக்கிறது.

அந்தப் படத்தைப் பார்த்துவிட்டு வெவ்வெறு விதமான செய்திக் குறிப்புகளை வெளியிடுகின்றனர். அதுபோல நடிகை விஜயகுமாரியும் தவறான தகவலைத் தருகிறார்.

– க.திருநாவுக்கரசு

திராவிட இயக்க ஆய்வாளர்