#Title

சென்னைப் பல்கலைக் கழக தமிழ் மொழித்துறை சார்பில் முனைவர் ம.இராசேந்திரன் 75–ஆம் அகவை நாள் விழா – சிறப்பு உரையரங்கம்! முனைவர் ய.மணிகண்டன் தலைமை உரை ஆற்றுகிறார்!

சென்னை, மார்ச் 3–

தமிழ்மொழியின் மேம்பாட்டுக்காக அரும்பாடுபட்ட சான்றோர் பெருமக்களை வாழும்போதே போற்றும் மரபைச் சென்னைப் பல்கலைக்கழகத் தமிழ்மொழித் துறை தொடர்ச்சியாகப் பேணிவருகின்றது. முதன்மையான பங்களிப்பை நல்கிய இத்தகு அறிஞர் பெருமக்களை அவர்தம் அறுபதாம் அகவை, எழுபத்தைந்தாம் அகவை, எண்பதாம் அகவை முதலிய தருணங்களில் போற்றும் வகையில் சிறப்பு உரையரங்க நிகழ்ச்சிகளை, விழாக்களைத் தமிழ்மொழித் துறை நடத்தி வருகின்றது.

அவ்வகையில் தமிழ்ப் பல்கலைக்கழகத்தின் முன்னைத் துணைவேந்தரும் தமிழ் வளர்ச்சித்துறை, உலகத் தமிழாராய்ச்சி நிறுவனம் முதலிய அமைப்புகளின் இயக்குநராகத் திகழ்ந்தவரும், அண்மையில் தமிழ்நாடு அரசால் தமிழ்நாட்டு அரசின் பொதுநூலகச் சட்டம், விதிகள் திருத்த உயர்நிலைக்குழுத் தலைவராக நியமிக்கப்பட்டுச் சீரிய பணிகளை ஆற்றியவரும், எழுத்தாளரும், அறிஞருமாகிய முனைவர் ம. இராசேந்திரன் அவர்களின் எழுபத்தைந்தாம் பிறந்தநாளைச் சிறப்பிக்கும் வகையில் சிறப்பு உரையரங்க நிகழ்ச்சியொன்றைச் சென்னைப் பல்கலைக்கழகத் தமிழ்மொழித் துறை ஏற்பாடு செய்துள்ளது.

இந்நிகழ்ச்சி சென்னைப் பல்கலைக்கழகம், மெரினா வளாகம், பவள விழாக் கலையரங்கத்தில் இன்று (3.3.2025) திங்கட்கிழமை காலை 11 மணியளவில் நடைபெறுகிறது.

திரளான தமிழன்பர்கள் பங்கேற்க உள்ள இந்தச் சிறப்பு உரையரங்க நிகழ்வில் சென்னைப் பல்கலைக்கழகத் தமிழ்மொழித் துறைத் தலைவர் பேராசிரியர் ய. மணிகண்டன் அவர்கள், அறிஞர் ம. இராசேந்திரன் அவர்களின் தமிழியல் பங்களிப்புகளை, பன்முக ஆளுமையை எடுத்துரைக்கும் தலைமை உரை இடம்பெறுகின்றது.

இவ்விழாவில் தமது 75ஆம் பிறந்த நாளையொட்டித் தமிழின் மேம்பாட்டுக்கான முக்கியமான கருத்துகளை அறிஞர் ம. இராசேந்திரன் அவர்கள் “மொழி மிரட்டல்” என்னும் தலைப்பில் சிறப்புரையாக ஆற்றவுள்ளார்.

விழாவின் தொடக்கத்தில் தமிழ்மொழித் துறையின் உதவிப் பேராசிரியர் முனைவர் வாணி அறிவாளன் அவர்கள் வரவேற்புரை ஆற்றவுள்ளார். விழாவின் நிறைவில் தமிழ்மொழித் துறையின் உதவிப் பேராசிரியர் முனைவர் வே. நிர்மலர் செல்வி அவர்கள் நன்றியுரை ஆற்றவுள்ளார்.