28.02.2025 அன்று சென்னை, கொட்டிவாக்கத்தில் நடைபெற்ற மாண்புமிகு தமிழ்நாடு முதலமைச்சர் பிறந்த நாள் விழாவில், தலைவர் குறித்துப் பாடிய கவிதை)
பி
றந்த நாளிலும் உன்னை வாழ்த்திடச்
சிறந்த தருணம் வாய்த்திட வில்லை!
நாளொரு மேனி பொழுதொரு வண்ணம்
வாளும் வேலுமாய் வந்திடும் பகைகள்
ஆட்சிக்கு வந்த அன்றே கொடுங்கோல்
ஆட்சி புரிந்தது கொரானா எனும்நோய்!
இறுக்கம் முகத்தில் இரக்கம் நெஞ்சில்
உறக்கம் இன்றியே உழைத்தாய் தலைவா!
கொடிய நோயில் வாடிய மக்களைக்
கடிதில் சென்று கண்டாய் நேரில்!
காப்புடை அணிந்து களத்தில் இறங்கினாய்
போய்ப் புகுந்தாய்நீ அதே வார்டில்
எந்த உடையிலும் அன்றுநீ அணிந்த
அந்த உடையே அற்புதம் தலைவா!
அதற்குப் பின்னும் ஆயிரம் சிக்கல்கள்
எதற்கு வம்பென்று ஒதுங்கிட வில்லை!
எத்தனை எத்தனை எதிரிகள் முளைத்தார்
எத்தனை எத்தனை இன்னல் விளைத்தார் !
அததனை யும்தூள் தூளாக்கி விட்டு
அண்ணாவைப் போல் அமைதி காக்கிறாய்!
வாழ்வின் சுவைகளை மறந்தே நானும்
சூழ்நிலைக் கைதி ஆனேன் என்றும்
முதலமைச்சர் பதவியும் பொறுப்பும் தலையில்
முள்ளின் மகுடமாய் உறுத்துவ தாகவும்
அன்றே சொன்னார் அறிஞர் அண்ணா
இன்றோ அதனை நேரில் பார்க்கிறோம்!
எக்கணமும் எப்பொழுதும் இத்தமிழ கத்தின்
மக்களையே உன்நெஞ்சம் நினைத் திருக்க
எப்போது சிரித்தாய் எங்கள் தலைவா
எப்போ தாவது எங்கள் மழலைகள்
அப்பா என்றுனை அழைத்திடும் அந்த
அழகில் மட்டுமே மயங்கிச் சிரித்தாய்!
இப்போதும் மேடைக்கு வாழ்த்தநான் வரவில்லை
ஒப்பேதும் இல்லாத உன்றன் பின்னால்
எப்போதும் சிப்பாயாய் நிற்போம் என்றே
ஒப்புதல் கொடுப்பதற்கே ஓடி வந்தேன்!
களத்தி லேயே உன்கால்கள் நிற்பதால்
கழுத்துக்கு மாலை கொண்டுவர வில்லை!
எங்களில் ஒருவராய் நீங்கள் இருப்பதால்
உங்களைத் தனித்து வாழ்த்திட வில்லை!
இந்தித் திணிப்பு மற்றும் தொகுதி
மறுசீ ரமைப்பு என்றே இன்று
அணிவகுத் திருக்கும் ஆறாத் துயர்களைத்
துணிவுடன் எதிர்க்கும் உன்பின் நிற்போம்!
உயிராம் மொழியைக் காத்திட எங்கள்
உயிரையும் தருவதாய் உறுதி ஏற்போம்!
தென்னாட்டு மக்கள் தீராதி தீரர்
எந்நாளும் எவர்க்கும் அடிபணியார் என்றே
அத்தனை உறுதியாய் அன்றுநீ சொன்னதைச்
சித்த ராமையாவும் வழிமொழிந் துள்ளார்!
வடக்கு வாழ்ந்திட தெற்கு தேய்ந்திட
அடக்கி ஆண்டஅக் காலங்கள் மறைந்தன!
அருந்தமிழ் நாடும் ஆந்திர கேரளம்
கருநா டகமும் கைகளைச் சேர்ப்போம்!
குமுறி அழுவது கோழைகள் வீடு
திமிறி எழட்டும் திராவிட நாடு!!