#Title

கன்னியாகுமரி தேவஸ்தானத் திருக்கோயில்களுக்கு முதல்வர் இதுவரை ரூ.33 கோடி அரசு மானியமாக வழங்கியுள்ளார்! சட்டப்பேரவையில் – அமைச்சர் பி.கே.சேகர்பாபு தகவல்!

சென்னை, ஏப்.4–

தமிழ்நாடு சட்ட மன்றப் பேரவையில் 01.04.2025 அன்று இந்து சமயம் மற்றும் அறநிலையத்துறை அமைச்சர் பி.கே.சேகர்பாபு, திருநெல்வேலி சட்டமன்ற உறுப்பினர் நயினார் நாகேந்திரன் எழுப்பிய கேள்விக்கு பதிலளித்தார்.

நயினார் நாகேந்திரன் : நாகர்கோவில், நாகராஜா திருக்கோயிலுக்கு எப்போது குடமுழுக்கு நடத்தப்படும்? அந்த கோயிலின் திருக்குளம் சீரமைக்கப்படுமா?

அமைச்சர் பி.கே.சேகர்பாபு: உறுப்பினர் அவர்கள் கோரிய நாகர்கோவில், நாகராஜா திருக்கோயி லுக்கு ரூ.1.25 கோடி செலவில் பணிகள் மேற்கொள்ளப்பட்டு வருகின்றன. அதில் 60 சதவீத பணிகள் நிறைவுற்று இருக்கின்றன. பிரசனம் பார்த்து, ஆகஸ்ட் மாதம் குடமுழுக்கு நடத்துவதற்கு தேதி நிர்ணயிக்கப்பட்டுள்ளது. ஆகவே, அத்திருக்கோயிலுக்கு ஆகஸ்ட் மாதத்தில் நிச்சயமாக குடமுழுக்கு நடத்தப்படும். மேலும், அவர் கோரிய திருக்குளப் பணிக்கு தற்போது மதிப்பீடு தயாரிக்கப்பட்டு வருகிறது. இரண்டு மாத காலத்திற்குள்ளாக அந்தப் பணி மேற்கொள்ளப்படும்.

உறுப்பினர் அவர்கள் பேசுகின்றபோது, இந்து சமய அறநிலையத்துறைக்கு நன்றிசொல்வார் என்று எதிர்ப்பார்த்தோம். கன்னியாகுமரி தேவஸ்தானத்தில் ஒட்டுமொத்தமாக 490 திருக்கோயில்கள்உள்ளன. கடந்த ஆட்சி காலத்தில் 2021–ஆம் ஆண்டு வரை அதற்கு ரூ.3 கோடி தான் அரசு மானியமாக வழங்கப்பட்டு வந்தது. இந்த ஆட்சிப் பொறுப்பேற்ற பிறகு, முதல்வர் அவர்கள் அதனை ரூ.13 கோடியாக உயர்த்தி இதுவரை 33 கோடி ரூபாய் அரசு மானியமாக கன்னியாகுமரி தேவஸ்தானத்திற்கு வழங்கியுள்ளார்.

பல திருக்கோயில்களில் தீபங்கள் கூட எரியாத சூழ்நிலை இருந்ததை, இன்றைக்கு ஒளி வெள்ளத்தில் இறைவன் இருப்பதற்கு காரணமான திராவிட மாடல் அரசுக்கு அவர் நன்றி சொல்லவில்லையே என்று ஒரு வருத்தம் இருக்கிறது. உறுப்பினர் அவர்கள் கோரிய அனைத்து கேள்விகளுக்கும் நிறைவு உண்டாகும்படி செய்யப்படும் என்பதை தெரிவித்துக் கொள்கிறேன்.

இவ்வாறு அமைச்சர் பி.கே.சேகர்பாபு விளக்கமளித்தார்.