#Title

மூக்கையா தேவருக்கு உசிலம்பட்டியில் மணிமண்டபம்! மாமேதை காரல் மார்க்ஸுக்கு சிலை! சட்டப்பேரவையில் முதல்வர் மு.க.ஸ்டாலின் அறிவிப்பு! தொடர்ச்சி 3–ஆம் பக்கம்

சென்னை, ஏப்.4–

சட்டபேரவையில் நேற்று, முதல்வர் மு.க. ஸ்டாலின் அவர்கள், 110 விதியின் கீழ் வெளியிட்ட அறிவிப்பில், மூக்கையா தேவருக்கு உசிலம்பட்டியில் மணி மண்டபம் அமைக்கப்படும் எனவும், பொதுவுடமைத் தத்துவத்தை வடிவமைத்த புரட்சியாளர் காரல்மார்க்ஸுக்கு சென்னையில் திருவுருவச் சிலை நிறுவப்படும் எனவும் குறிப்பிட்டார்.

தமிழ்நாடு சட்டமன்றப் பேரவையில், தமிழ்நாடு முதலமைச்சர் மு.க.ஸ்டாலின் அவர்கள் சட்டமன்றப் பேரவை விதி எண்.110-ன் கீழ் அளித்த அறிக்கை வருமாறு:–

மாண்புமிகு பேரவைத் தலைவர் அவர்களே, சட்டமன்றப் பேரவை விதி எண் 110-ன்கீழ் இரண்டு முக்கியமான அறிவிப்புகளை இம்மாமன்றத்தில்வெளியிடுவதில் மகிழ்ச்சி அடைகிறேன்.

முதலாவது அறிவிப்பு; உலகமாமேதை காரல் மார்க்ஸ் அவர்களைப்பெருமைப்படுத்திட, போற்றிட இந்த திராவிட மாடல் அரசு விரும்புகிறது. (மேசையைத் தட்டும் ஒலி)

உலகத் தொழிலாளர்களே ஒன்று கூடுங்கள் என்ற பிரகடனத்தை, உலகத் தொழிலாளர்கள் அனைவருக்குமான ஒரே முழக்கமாக பொதுவுடைமைத் தத்துவத்தை வடித்துத் தந்த புரட்சியாளர் காரல் மார்க்ஸ் அவர்கள். இழப்பதற்கென்று எதுவுமில்லை-பெறுவதற்கோ பொன்னுலகு இருக்கிறது என்ற நம்பிக்கை விதைகளை விதைத்தவர்! அறிவுலகத் தொலைநோக்குச் சிந்தனையாளர்!

பொதுவுடைமைத் தத்துவத்தை

வடிவமைத்த புரட்சியாளர்!

வரலாற்றில் பலரும் பிறக்கிறார்கள்; பலர் வரலாற்றுக்குத் தொண்டாற்றி இருக்கிறார்கள். ஆனால், வரலாற்றின் போக்கினையே மாற்றி அமைத்தவர்கள் சிலர் தான். அந்த ஒரு சிலரில் தலைமகனாகப் போற்றப்படுபவர் கார்ல் மார்க்ஸ்அவர்கள்.

உலகப் புரட்சிகளுக்கும், இந்த உலகம் இதுவரை அடைந்துள்ள பல்வேறு மாற்றங்களுக்கும் அடித்தளம் அமைத்தது அவரது சிந்தனைகள் தான். அப்படிப்பட்ட ‘எல்லார்க்கும் எல்லாம்’ என்ற சிந்தனையோடுதான், அவரது நினைவு நாளான கடந்த மார்ச் 14-ஆம் நாள், நம்முடைய நிதிநிலை அறிக்கையை இந்தப் பேரவையில் தாக்கல் செய்தோம்.