புதுடெல்லி, ஏப். 4–
1974 ஆம் ஆண்டில் தமிழ்நாடு அரசின் ஒப்புதல் இல்லாமலேயே கச்சத்தீவை இந்திய அரசு இலங்கைக்கு இருநாடுகள் மேற்கொண்ட ஒப்பந்தத்தின் வாயிலாகத் தாரை வார்க்கப் பட்டது. கச்சத்தீவு தமிழ்நாட்டின் கைவிட்டுப் போன பிறகு தமிழக மீனவர்கள் கச்சத்தீவு கடல் பகுதிக்கு மீன்பிடிக்க செல்ல போகும் போதெல்லாம் அவர்கள் எல்லை தாண்டி மீன் பிடிப்பதாகக் கூறி அவர்களைக் கைது செய்து சிறைகளில் அடைப்பதையும் படகுகள், மீன்கள் உள்ளிட்ட உடைமைகளை கைப்பற்றிச் செல்வதும் தொடர்கதை ஆகி விட்டது. அண்மைக் காலங்களில் தமிழக மீனவர்கள் மீதான தாக்குதல்களும் சிறைவைப்பு போன்ற தண்டனைகளும் அதிகமாகி விட்ட நிலையில் கச்சத்தீவை மீட்பது ஒன்றே இந்த நெடுநாள் சிக்கலுக்கு நிரந்தர த் தீர்வு என்ற குரல் தமிழ்நாடு மீனவசமுதாய மக்கள் மட்டுமல்லாமல் அரசியல் கட்சிகளிடமிருந்தும் உரக்க ஒலித்து வருகிறது.
இந்நிலையில் நேற்று (3.4.2025) திமுக மக்களவைக் குழுத்தலைவர் டி.ஆர்.பாலு கச்சத்தீவு தொடர்பான பிரச்சனையை நாடாளுமன்றத்தில் எழுப்பினார். 1974ல் இந்திய அரசு, கச்சத்தீவை இலங்கைக்கு நாடாளுமன்றத்தின் முன் ஒப்புதல் பெறாமல் கொடுத்தது இந்திய நாட்டின் அரசியலமைப்பு சட்டத்துக்கு எதிரான செயல் என்பதால் கச்சத்தீவை உடனடியாகத் திரும்ப ப் பெற வேண்டும் என்று தனது பேச்சில் டி.ஆர் பாலு வலியுறுத்தினார்.
தி.மு.க. மக்களவைக் குழுத் தலைவர் டி.ஆர்.பாலு அவர்களின் உரையின் விவரம் வருமாறு:
இன்று தமிழ்நாடு முதலமைச்சர் தளபதி மு.க.க. ஸ்டாலின் அவர்களால் முன்மொழியப்பட்ட கச்சத்தீவு அரசியலமைப்பு சட்டத்துக்கு எதிராக இலங்கைக்கு விட்டுக் கொடுக்கப் பட்ட விஷயம் சம்பந்தப்பட்ட தனித்தீர்மானம் தமிழ்நாடு சட்டப்
பேரவையால் நிறைவேற்றப் பட்டது.
கச்சத்தீவு தாரைவார்க்கப்பட்ட செயல் அரசியலமைப்பு சட்டத்துக்கு விரோதமானது என்று ஏன் சொல்கிறேன் ? இலங்கை அரசுக்கும் இந்திய அரசுகக்கும் இடையே 1974 ல் இருநாடுகளின் இடையிலான சர்வதேச கடல் எல்லைக் கோடு ( இன்டர்நேஷனல் மேரிட்டைம் பவுண்டரி லைன்) தொடர்பாக ஒரு ஒப்பந்தம் செய்யப்பட்டது. பின், 1976 ஆம் ஆண்டில் இருநாட்டுக் கடல் எல்லைக் கோட்டின் புள்ளிகள் உறுதி செய்ய ப்பட்ட மேலும் ஒரு ஒப்பந்தம் இருநாடுகளிடையே ஏற்கப் பட்டது. ஆனால், இவ்விரு ஒப்பந்தங்களிலும் தமிழ்நாடு அரசுக்கு எந்தப் பங்கும் இல்லை.
உச்சநீதிமன்றத்தின்
தீர்ப்பு!
இந்தப் பிரச்சனை குறித்து மேற்கொண்டு எந்த க் கருத்தையும் சொல்வதற்கு முன்னால் ஒரு உண்மை பற்றிச் சொல்ல விரும்புகிறேன். அன்றைய பாகிஸ்தானுக்கு மேற்குவங்கத்தில் உள்ள பேருபாரி பகுதியின் நிலப்பரப்பை மாற்றுவது தொடர்பானவழக்கில் 1960 ஆம் ஆண்டில் இந்திய உச்ச நீதிமன்றம் அளித்த தீர்ப்பில்
இந்திய நிலப்பகுதியை வேறு
நாட்டுக்கு நாடாளுமன்றத்தின் அனுமதி இல்லாமல் கொடுக்க முடியாது என்று கூறியுள்ளது.
1976 ல் மேற்கொள்ளப் பட்ட ஒப்பந்தத்தின் படி கச்சத்தீவு இலங்கைக்கு விட்டுக் கொடுக்கப் பட்ட போது தமிழ்நாடு குடியரசுத் தலைவர் ஆட்சியில் இருந்த நிலையில் தமிழ்நாடு அரசுடன் கலந்தாலோசிக்கப் படவில்லை. மேலும் நாடாளுமன்ற ஒப்புதலும் பெறப்பட வில்லை. அதனால்தான் கச்சத்தீவை இலங்கைக்கு விட்டுக் கொடுத்த நடவடிக்கை அரசியல் சாசனத்துக்கு விரோதமானது என்று குறிப்பிட்டுக் கூறுகிறேன்.
தலைவர் அவர்களே! கச்சத்தீவு என்பது தமிழக மீனவர்களின் வாழ்வாதாரமாக அன்றாட உயிர் பிழைப்புக்கு ஆதாரமானது. சம்பந்தப்பட்ட அமைச்சர் இங்கே அவையில் உள்ளார்.அவர் இந்த விவரங்களை எல்லாம் வெளியுறவு அமைச்சருக்கும் பிரதமர் மோடி அவர்களுக்கும் விளக்கிட வேண்டும். கச்சத்தீவை மீட்க விரைவான நடவடிக்கைகளை எடுக்க உதவிட வேண்டும்.”
இவ்வாறு திமுக பொருளாளரும் கழக மக்களவைக் குழுத் தலைவருமான டி.ஆர்.பாலு தனது உரையில் ஆணித்தரமாக வலியுறுத்தினார்.