#Title

ஒன்றிய பா.ஜ.க. அரசே திரும்பப்பெறு! திரும்பப் பெறு!! வக்ஃபு சட்டத் திருத்த மசோதாவை திரும்பப்பெறு! பேரவையில் முதல்வர் மு.க.ஸ்டாலின் முழக்கம்!

சென்னை, ஏப். 4 –

ஒன்றிய பா.ஜ.க. அரசே வக்ஃபு சட்டத் திருத்த மசோதாவை திரும்பப் பெறு என்று பேரவையில் முதல்வர் மு.க.ஸ்டாலின் அவர்கள் முழக்க மிட்டார். அதனைத் தொடர்ந்து உறுப்பினர்கள் முழக்கமிட்டனர்.

அதனையடுத்து பேரவையில் முதல்வர் அவர்கள்,

சிறுபான்மை இஸ்லாமிய சமுதாய மக்களுக்கு கடுமையான பாதிப்புகளை ஏற்படுத்தக்கூடிய வகையில் 1995 ஆம் ஆண்டின் வக்ஃபு சட்டத்தினை திருத்துவதற்கு மக்களவையில் அறிமுகம் செய்யப்பட்டுள்ள வக்ஃபு திருத்த சட்டமுன்வடிவை திரும்பப் பெற வேண்டுமென்று ஒன்றிய அரசை இப்பேரவை ஒருமனதாக வலியுறுத்தி 27-3-2025 ஆம் நாளன்று தமிழ்நாடு சட்டமன்றப் பேரவையில் ஒருமனதாக தீர்மானம் நிறைவேற்றப்பட்டு, ஒன்றிய அரசுக்கு அன்றே அனுப்பப்பட்ட நிலையில், இன்றைக்கு வக்ஃபு திருத்த சட்டமுன்வடிவை மக்கள வையில் பெரும் எதிர்ப்புகளுக்கிடையே நிறைவேற்றப்பட்டது.

தமிழ்நாடு சட்டமன்றப் பேரவையில் நிறை வேற்றப்பட்ட தீர்மானத்தைக் கருத்தில்கொள்ளாமல். இந்தியா முழுவதிலும் இச்சட்டமுன்வடிவிற்கு எதிராக முன்வைக்கப்பட்ட கருத்துகளையும் கருதாமல், ஒன்றிய அரசு கூட்டாட்சி தத்துவத்திற்கு எதிராக தன்னுடைய கனைகளைத் தொடுத்து வருவதை ஜனநாயகத்தில் நம்பிக்கை கொண்டோர், அரசிய லமைப்புச் சட்டத்தை நன்கு அறிந்தோர் ஏற்றுக் கொள்ளமாட்டார்கள். இந்த அவை எள்முனை அளவும் ஏற்றுக்கொள்ளாது. எனவே, வக்ஃபு திருத்தச் சட்டமுன்வடிவை ஒன்றிய அரசு திரும்பப் பெற வலியுறுத்தி நான் கூறும் வரிகளை மாண்புமிகு உறுப்பினர்கள் திரும்பக் கூறுவதற்கு தங்களுடைய அனுமதியை கோருகிறேன்.

பேரவைத் தலைவர்: அனுமதிக்கப்படுகிறது.

மு.க. ஸ்டாலின் அவர்கள்,

திரும்பப் பெறு, திரும்பப் பெறு!

வக்ஃபு திருத்தச் சட்டமுன்வடிவை

திரும்பப் பெறு, திரும்பப் பெறு!

வக்ஃபு திருத்தச் சட்டமுன்வடிவை

திரும்பப் பெறு, திரும்பப் பெறு!

என்று வாசகங்களை சொல்லச் சொல்ல உறுப்பினர்கள் திரும்பச் சொன்னார்கள்.

(மேசையைத் தட்டும் ஒலி)

கறுப்பு பேட்ஜ் அணிந்து வந்த

முதல்வர் – அமைச்சர்கள் – உறுப்பினர்கள்!

மேலும் வக்ஃபு திருத்த சட்ட மசோதா நேற்று மக்களவையில் அதிகாலை 2 மணி அளவில் நிறைவேற்றப்பட்டதற்கு எதிர்ப்பு தெரிவிக்கும் வகையில் முதல்வர் மு.க.ஸ்டாலின் அவர்கள் கறுப்பு பேட்ஜ் அணிந்து சட்டப் பேரவையில் பங்கேற்றார்.

இதேபோன்று அவை முன்னவர் துரைமுருகன்,துணை முதல்வர் உதயநிதி ஸ்டாலின் உள்ளிட்ட அமைச்சர் பெருமக்கள், கழக சட்டமன்ற உறுப்பினர்கள் மற்றும் தோழமைக்கட்சி உறுப்பினர்களும் கறுப்பு பேட்ஜ் அணிந்து மக்களவையில் வக்ஃபு திருத்த மசோதா நிறைவேற்றப்பட்டதற்கு தங்களின் எதிர்ப்பை வெளிப்படுத்தினர்.