#Title

சீர்காழி தொகுதியில் – தொழிற் பயிற்சி நிலையம் அமைத்திடுவீர்! சட்டப்பேரவையில் – மு.பன்னீர்செல்வம் கோரிக்கை !

சென்னை, ஏப். 4–

சட்டப் பேரவையில் சீர்காழி தொகுதி கழக உறுப்பினர் மு.பன்னீர் செல்வம், ‘‘சீர்காழி தொகுதியில் – தொழிற் பயிற்சி நிலையம் அமைத்திட வேண்டும்’’ என வேண்டுகோள் விடுத்தார்.

சட்டப்பேரவையில் கேள்வி நேரத்தின்போது இது குறித்து நடைபெற்ற விவாதம் வருமாறு:–

மு. பன்னீர்செல்வம்: சீர்காழி தொகுதி என்பது ஒரு பெரிய அளவிலேவளர்ச்சி பெறாத தொகுதி ஆகும். விவசாயத் தொழில்மட்டும்தான்; அதுதவிர மாணவர்கள் நிறைய படிக்கிறார்கள். அவர்கள் 10 ஆம் வகுப்பு படித்து முடித்தவுடனேயே, சுயதொழில் துவங்க வேண்டுமென்றால், அவசியமான ஒரு தொழிற்பயிற்சி நிலையம் தேவை என்பதை உணர்ந்து, தொழிற்பயிற்சி நிலையத்தை புத்தூரிலே அமைத்துக்கொடுக்க அமைச்சர் அவர்கள் முன்வருவார்களா?

அமைச்சர் சி.வி.கணேசன்: மயிலாடுதுறை மாவட்டத்தில் தற்போது 7 தனியார் தொழிற்பயிற்சி நிலையங்கள் செயல்பட்டு வருகின்றன.

எனவே, மயிலாடுதுறை மாவட்டம், சீர்காழி தொகுதியில் புதிய அரசு தொழிற்பயிற்சி நிலையம் அமைக்க தற்போது அவசியம் எழவில்லை என்பதை நான் தெரிவித்துக்கொள்ள விரும்புகிறேன். அதேநேரத்தில் இந்த நிதிநிலை அறிக்கையில் நம்முடைய நிதி மற்றும் சுற்றுச்சூழல் மற்றும் காலநிலை மாற்றத் துறை அமைச்சர் அவர்கள் மயிலாடுதுறை மாவட்டம் செம்பனார்கோவிலில் புதிய தொழிற்பயிற்சி நிலையம் இந்த ஆண்டு தொடங்கப்படும் என அறிவித்துள்ளார்கள். எனவே, நம்முடைய சட்டமன்ற உறுப்பினருடைய ஊரிலிருந்து 20 கி.மீ. தூரத்தில் அமைக்கப்பட்டுள்ளது. ஆகவே, தற்போது சீர்காழியில் புதிய தொழிற்பயிற்சி நிலையம் அமைக்க வேண்டிய அவசியம் இல்லை.

மு. பன்னீர்செல்வம்: நான் ஏற்கெனவே சொன்னதுபோல, பெரிய அளவிலே வளர்ச்சி பெறாத தொகுதி ஆகும். இன்னும் குறிப்பிட்டுச் சொல்லவேண்டுமென்று சொன்னால், தமிழ்நாடு முதலமைச்சர் அவர்கள் சீர்காழி தொகுதியினுடைய மாப்பிள்ளை; அதேபோல வேளாண்மை-உழவர் நலத் துறை அமைச்சர் அவர்கள் சீர்காழி தொகுதியினுடைய மாப்பிள்ளை; அதேபோல போக்குவரத்துத் துறை அமைச்சர் அவர்கள் சீர்காழி தொகுதி உள்ளிட்ட மயிலாடுதுறை மாவட்டத்தினுடைய மாப்பிள்ளை; இத்தனை நபர்கள் இருந்தும் இந்த சீர்காழி தொகுதிக்கு ஒருதொழிற்பயிற்சி நிலையம் கிடைக்கவில்லையென்றால், மக்கள் என்னை என்ன சொல்வார்கள்? எனவே, அமைச்சர் அவர்கள் மறுபரிசீலனை செய்து, எனக்கு ஒரு தொழிற்பயிற்சி நிலையத்தைஏற்படுத்திக் கொடுக்க முன்வருவார்களா?

அமைச்சர் சி.வி.கணேசன்: நமது தமிழக முதல்வர் அவர்கள் 2021 ஆம் ஆண்டு ஆட்சிப் பொறுப்பேற்றபோது, தமிழ்நாட்டில் இருந்த அரசு தொழிற்பயிற்சி நிலையங்களினு டைய எண்ணிக்கை 90; 2021-–2022 ஆம் ஆண்டில் ஒரு தொழிற்பயிற்சி நிலையம் தொடங்கப்பட்டது. 2022-–2023 ஆம் ஆண்டில் 11 தொழிற்பயிற்சி நிலையங்கள் தொடங்கப்பட்டன. 2024-–2025 ஆம் ஆண்டில் 13 தொழிற்பயிற்சி நிலையங்கள் தொடங்கப்பட்டன. 2025-–2026 ஆம் ஆண்டு நிதியாண்டில் நம்முடைய முதலமைச்சர் அவர்களுடைய உத்தரவினை ஏற்று, நம்முடைய நிதி மற்றும் சுற்றுச்சூழல் மற்றும் காலநிலை மாற்றத் துறை அமைச்சர் அவர்கள் 17 தொழிற்பயிற்சி நிலையங்களை இந்த ஆண்டு தொடங்குவதற்கு அனுமதிஅளித்துள்ளார்கள் என்பதை நான் மகிழ்ச்சியோடு தெரிவித்துக்கொள்ள விரும்புகின்றேன். ஆக 2021-–2022, 2022-–2023, 2024–-2025, 2025-–2026 இந்த 4 ஆண்டுகளில் மட்டும் 42 தொழிற்பயிற்சி நிலையங்கள் தொடங்கப்பட்டுள்ளன என்பதை இந்த மாமன்றத்திற்கு மகிழ்ச்சியோடு தெரிவித்துக்கொள்ள விரும்புகிறேன். (மேசையைத் தட்டும் ஒலி)

இருப்பினும் நம்முடைய சட்டமன்ற உறுப்பினர் மு. பன்னீர்செல்வம் அவர்களுடைய கோரிக்கையை ஏற்று, அதுவும் மாப்பிள்ளை தொகுதி என்று சொன்னார்கள். ஆகவே, விரைவாக முதல்வர் அவர்களுடைய கவனத்திற்கு எடுத்துச்சென்று, புதிய தொழிற்பயிற்சி நிலையம் துவங்குவதற் குரிய நடவடிக்கையை அரசு மேற்கொள்ளும் என்பதைத் தெரிவித்துக்கொள்கிறேன்.

இவ்வாறு பேரவையில் விவாதம் நடைபெற்றது.