சென்னை, ஏப். 4 –
தமிழ்நாட்டைச் சேர்ந்த ஒவ்வொரு சட்டமன்றத் தொகுதிக்கும் சட்டமன்ற உறுப்பினர் அலுவலகக் கட்டிடம் அரசால் கட்டித் தரப்பட வேண்டும் என ஏற்கெனவே அரசாணை வெளியிடப்பட்டு நடைமுறையில் இருந்து வருகிறது. எனினும், எழும்பூர் சட்டமன்றத் தொகுதிக்கென சட்டமன்ற அலுவலகக் கட்டிடம் இல்லாமல் இருந்தது. மாண்புமிகு முதல்வர் மு.க.ஸ்டாலின் அவர்களின் தலைமையில் கழக ஆட்சி அமைந்தவுடன், எழும்பூர் சட்டமன்ற உறுப்பினராகத் தேர்ந்தெடுக்கப்பட்ட வழக்கறிஞர் இ.பரந்தாமன், எழும்பூர் சட்டமன்றத் தொகுதிக்குச் சட்டமன்ற உறுப்பினர் அலுவலகக் கட்டிடம் இல்லை என்பதையும், அலுவலகக் கட்டிடம் கட்டித் தரப்பட வேண்டும் என்பதையும் மாண்புமிகு முதல்வர் அவர்களின் கவனத்திற்கு எடுத்துச் சென்றார். இக்கோரிக்கையைப் பரிசீலித்த மாண்புமிகு முதல்வர் அவர்கள் எழும்பூர் தொகுதி உட்பட சட்டமன்ற அலுவலகக் கட்டிடம் இல்லாத அனைத்துத் தொகுதிகளிலும் சட்டமன்ற அலுவலகக் கட்டிடம் கட்டித் தருவதற்கான உத்தரவைப் பிறப்பித்தார்.
மாண்புமிகு முதல்வர் அவர்களின் இந்த உத்தரவின் அடிப்படையில், எழும்பூர் தொகுதிக்கான சட்டமன்ற உறுப்பினர் அலுவலகக் கட்டிடம், எழும்பூர் தொகுதி, வார்டு எண்.108, மேயர் இராமநாதன் சாலை, சேத்துப்பட்டு காவல் நிலையத்திற்கு அருகில் உள்ள சென்னை மாகராட்சிக்குச் சொந்தமான காலிமனையில் கட்டுவதற்கான நிர்வாக ஆணை பிறப்பிக்கப்பட்டது. மாண்புமிகு நகராட்சி நிர்வாகத்துறை அமைச்சர் கே.என்.நேரு அவர்கள் சென்னை மாநகராட்சிக்குச் சொந்தமான இந்த நிலத்தை, சட்டமன்ற உறுப்பினர் அலுவலகக் கட்டிடம் கட்டுவதற்கு ஏற்ப நிலத்தின் உரிமையைப் பொதுப்பணித்துறைக்கு மாற்றி அளித்தார். நில உரிமை மாற்றத்திற்குப் பிறகு, மாண்புமிகு பொதுப்பணித்துறை அமைச்சர் எ.வ.வேலு அவர்கள் அக்காலிமனையில் ரூ.85 இலட்சம் மதிப்பீட்டில் எழும்பூர் தொகுதிக்கான சட்டமன்ற உறுப்பினர் அலுவலகக் கட்டிடம் கட்டித் தருவதற்கான நிர்வாக மற்றும் நிதி ஒப்புதலை வழங்கினார்.
இதனைத் தொடர்ந்து, எழும்பூர் தொகுதி, வார்டு எண்.108, மேயர் இராமநாதன் சாலை, சேத்துப்பட்டு காவல் நிலையத்திற்கு அருகில் ரூ.85 இலட்சம் மதிப்பீட்டில் எழும்பூர் சட்டமன்றத் தொகுதிக்கான சட்டமன்ற அலுவலகம் கட்டிடம் கட்டித் தரும் திட்டப் பணிக்கு கழகச் சட்டத்துறை இணைச் செயலாளரும் எழும்பூர் சட்டமன்ற உறுப்பினருமான வழக்கறிஞர் இ.பரந்தாமன் அடிக்கல் நாட்டினார்.
இந்நிகழ்வின்போது, எழும்பூர் சட்டமன்றத் தொகுதிக்கான சட்டமன்ற உறுப்பினர் அலுவலகம் கட்டும் திட்டப் பணிக்கு ஒப்புதல் அளித்த மாண்புமிகு முதல்வர் அவர்களுக்கும், இக்கோரிக்கைக்கு உறுதுணையாக இருந்த மாண்புமிகு துணை முதலமைச்சர் அவர்களுக்கும், சென்னை மாநகராட்சிக்குச் சொந்தான நிலத்தைச் சட்டமன்ற அலுவலகக் கட்டிடம் கட்டுவதற்கு ஏற்ப நில உரிமையினை மாற்றித் தந்த மாண்புமிகு நகராட்சி நிர்வாகத்துறை அமைச்சர் கே.என்.நேரு அவர்களுக்கும், ரூ.85 இலட்சம் மதிப்பீட்டில் சட்டமன்ற அலுவலகம் கட்டுவதற்கு நிர்வாக மற்றும் நிதி ஒப்புதலை வழங்கிய மாண்புமிகு பொதுப்பணித்துறை அமைச்சர் எ.வ.வேலு அவர்களுக்கும் சட்டமன்ற உறுப்பினர் இ.பரந்தாமன், தனது தொகுதி மக்களின் சார்பாக நன்றியினைத் தெரிவித்தார்.
இந்நிகழ்வில் பெருநகர சென்னை மாநகராட்சி அதிகாரிகள், பொதுப்பணித்துறை அதிகாரிகள் மற்றும் எழும்பூர் தொகுதியைச் சேர்ந்த தி.மு.கழக நிர்வாகிகள், செயல்வீரர்கள்; கூட்டணிக் கட்சிகளைச் சேர்ந்த நிர்வாகிகள் உள்ளிட்டு இருநூறுக்கும் மேற்பட்டோர் கலந்துகொண்டனர்.
எழும்பூர் தொகுதி, வார்டு எண்.108, மேயர் இராமநாதன் சாலை, சேத்துப்பட்டு காவல்நிலையத்திற்கு அருகில் ரூ.85 இலட்சம் மதிப்பீட்டில் எழும்பூர் சட்டமன்றத் தொகுதிக்கான புதிய அலுவலகக் கட்டிடம் கட்டும் திட்டப் பணிக்கு, கழகச் சட்டத்துறை இணைச் செயலாளரும் எழும்பூர் சட்டமன்ற உறுப்பினருமான வழக்கறிஞர் இ.பரந்தாமன் அடிக்கல் நாட்டினார்.