சென்னை, ஏப். 4–
சட்டப் பேரவையில் கேள்வி நேரத்தின்போது, உத்திரமேரூர் தொகுதி கழக உறுப்பினர் க.சுந்தர், “உத்திரமேரூர் தொகுதியில் 10 கிராமங்களுக்குப் பயனளிக்கக் கூடிய கூட்டுக் குடிநீர்த் திட்டத்தை நிறைவேற்றித் தர வேண்டும்” என்று கோரிக்கை விடுத்தார்.
சட்டப் பேரவையில் கேள்வி நேரத்தின்போது நடைபெற்ற விவாதம் வருமாறு:–
க.சுந்தர்: மாண்புமிகு பேரவைத் தலைவர் அவர்களே, உத்திரமேரூர் ஊராட்சி ஒன்றியத்தில் அண்ணாத்தூர் மற்றும் சித்தனக்காவூர், தண்டரை, திருப்பினாயூர், திருவந்தவார், ஆலப்பாக்கம் போன்ற 10 கிராமங்களுக்கு இந்தக் கூட்டுக் குடிநீர் திட்டத்தை, தமிழ்நாடு குடிநீர் வடிகால் வாரியத்தின் மூலமாக செயல்படுத்தவேண்டுமென்று ‘உங்கள் தொகுதியில் முதலமைச்சர்’ திட்டத்தின்கீழ் கோரிக்கை வைக்கப்பட்டிருக்கிறது. அங்கே குடிநீரின் தன்மை சரியில்லாத காரணத்தினால், அதுசம்பந்தமாக ஏற்கெனவே குடிநீர் வடிகால் வாரியம் மூலமாக ஒரு மதிப்பீடு தயார் செய்யப்பட்டிருக்கிறது. அதற்கு குறைந்தது ஒரு 5 கோடி ரூபாய் தேவைப்படுகின்றது. தற்போது போதுமான நிதி இல்லை. நிதியில்லாத காரணத்தினால் அது தடைப்பட்டு நிற்கின்றது. அதை அமைச்சர் அவர்கள் நிறைவேற்றித் தருவார்களா?
அமைச்சர் கே.என்.நேரு: மொத்தம் தமிழ்நாட்டில் 19 கூட்டுக் குடிநீர் திட்டங்கள், புதிய திட்டங்கள் உருவாக்கப்பட்டன. அதிலே, ஒன்றிய அரசினுடைய ஜல் ஜீவன் திட்டத்திலே அவர்களே நிதி ஒதுக்கித் தருவதாக சொல்லியிருக்கிறார்கள். இப்போது இந்த ஆண்டு, முதலமைச்சர் அவர்கள், மாண்புமிகு நிதி அமைச்சர் அவர்கள் சட்டமன்றத்திலே 7 திட்டங்களை அறிவித்தார்கள். மேற்கொண்டு ஏற்கெனவே அறிவித்த திட்டங்கள் 3, ஆக மொத்தம் 10 திட்டங்கள். இப்போது மேலும் ஒரு புதிய திட்டத்தைச் சேர்த்து 11 திட்டங்களுக்குரிய நிதியை இந்த ஆண்டு மாநில அரசின் சார்பாக கொடுப்பதாக நிதி துறை அமைச்சர் அவர்களும் நிதி துறைச் செயலாளர் அவர்களும் ஒத்துக்கொண்டிருக்கிறார்கள். இது பெரிய அளவிலே வருகிற ஒரு 50 M.L.D., 100 M.L.D. என்கிற அளவுக்கு வருகிற ஒரு திட்டம். உறுப்பினர் அவர்கள் உத்திரமேரூர் தொகுதியிலே அவருடைய பகுதியிலே பத்தே பத்து கிராமங்களுக்கு தேவை என்று சொல்லியிருக்கிறார். அதற்கு ரூபாய் 5 கோடிதான் தேவை என்று சொல்லியிருக்கிறார். உரிய முறையிலே, அதை இந்த ஆண்டே செய்வதற்கு அனைத்து நடவடிக்கைகளும் எடுக்கப்படும் என்பதைத் தெரிவித்துக்கொள்கிறேன்.
இவ்வாறு பேரவையில் விவாதம் நடைபெற்றது.