#Title

செய்யாற்றின் குறுக்கே தரைப்பாலம் கட்டித் தரப்படும்! சட்டப்பேரவையில் – அமைச்சர் துரைமுருகன் உறுதி!

சென்னை, ஏப். 4–

சட்டப்பேரவையில் கேள்வி நேரத்தின்போது நடைபெற்ற விவாதம் வருமாறு:–

அக்ரி. எஸ்.எஸ். கிருஷ்ணமூர்த்தி: போளூர் சட்டமன்றத் தொகுதி, போளூர்-வந்தவாசி சாலை- தேவிகா புரத்திலிருந்து பத்தியாவரம், ஓதலவாடி வழியாக சதுப்பேரிபாளையம் சாலையின் குறுக்கே செல்கிற செய்யாற்றின் குறுக்கே கட்டப்பட்டிருந்த தரைப்பாலம் கடந்த ஃபெஞ்சல் புயலின் காரணமாகவும், கடுமையாகப் பெய்த மழையின் காரணமாகவும் அடித்துச் செல்லப்பட்டுவிட்டது. மாண்புமிகு அமைச்சர் அவர்கள் அந்தப் பகுதியை நன்றாக அறிந்தவர். அந்தப் பகுதியிலே நாடாளுமன்றத் தேர்தலிலே போட்டியிட்டவர். எனவே, அந்தப் பகுதி மக்களினுடைய நலன் கருதி, அந்தப் பாலத்தின் வழியாக தினந்தோறும்

2 ஆயிரத்திற்கும் அதிகமான மாணவ, மாணவிகள் பள்ளிகளுக்குச்செல்கிற காரணத்தினாலே தரைப்பாலமாக அமைத்து தர வேண்டும். எனவே, பொதுமக்களின் நலன் கருதி, பாதிக்கப்பட்ட, அடித்துச் செல்லப்பட்ட அந்தப் பாலத்தை மீண்டும் கட்டித் தர அரசு ஆவன செய்யுமா?

அமைச்சர் துரைமுருகன்: நான், Parliament election-ல் அந்தத் தொகுதியில் நின்றேன் என்று உறுப்பினர் அவர்கள் சொல்கிறார்கள். அப்போதுதான் ஓட்டு போடவில்லையே... இப்போது கேட்டால் எப்படி? (சிரிப்பு)

அந்த தரைப்பாலம் என்னுடைய துறையின்கீழ் வருகிறதா அல்லது நெடுஞ்சாலைத் துறை அமைச்சர் அவர்களுக்கு வருகிறதா என்பதை ஆய்வு செய்து, யாருடைய துறையின்கீழ் வருகிறதோ, அந்தத் திட்டம் நிறைவேற்றித் தரப்படும்.

இவ்வாறு பேரவையில் விவாதம் நடைபெற்றது.