#Title

இராஜபாளையம் தொகுதியில் அரசு கலை – அறிவியல் கல்லூரி தொடங்கிடுவீர்! இராஜபாளையம் – முதுகுடி வரை நான்கு வழிச்சாலை அமைத்திடுவீர்! சட்டப்பேரவையில் – எஸ்.தங்கபாண்டியன் வலியுறுத்தல்!

சென்னை, ஏப். 3–

சட்டப்பேரவையில், மானியக் கோரிக்கைகள் மீதான விவாதத்தில் பங்கேற்றுப் பேசிய இராஜபாளையம் தொகுதி கழக எம்.எல்.ஏ., எஸ்.தங்கபாண்டியன், ‘‘இராஜபாளையம் தொகுதியில் அரசு கலை – அறிவியல் கல்லூரி தொடங்கிட வேண்டும்!’’ என்றும் – ‘‘இராஜபாளையம் முதல் முதுகுடி வரை நான்கு வழிச் சாலை அமைத்திட வேண்டும்’’ என்றும் கோரிக்கை விடுத்தார்.

அவர் விடுத்த கோரிக்கை வருமாறு:

ராஜபாளையம் தொகுதியில்

செயல்படுத்திய திட்டங்கள்:

நம்முடைய முதலமைச் சர் அவர்களால் கொண்டு வரப்பட்ட, ராஜபாளையம்–சத்திரப்பட்டி இரயில்வே மேம்பாலம் அமைத்தல்; நீதிமன்றக் கட்டடம் கட்டுதல்; தாமிரபரணி கூட்டுக் குடிநீர்த் திட்டம் செயல்படுத்துதல்; தமிழ்நாடு குடிசைமாற்று வாரியம்மூலம் 864 வீடுகள் கட்டுதல்; வட்டாரப் போக்குவரத்துக் கிளை அலுவலகம், RTO office அமிழ் ஓட்டல் அருகில் புதிதாக அமைத்தல்; 5 கோடியே 55 இலட்சம் ரூபாய் மதிப்பீட்டில் தேவதானம் அன்னை தவம்பெற்ற நாயகி திருக்கோயில் தெப்பத்தை சீரமைத்து, 30 ஆண்டுகளுக்குப் பிறகு நமது கழக ஆட்சியில் 12–3–2025 அன்று தெப்பத் திருவிழா வெகு சிறப்பாக நடைபெற்றது; ராஜபாளையம் பழைய பேருந்து நிலையம் புதுப்பிக்கப்பட்டது; ராஜபாளையம் நகராட்சிக்கு 24x7 குடிநீர் திட்டப் பணி நடை பெற்று வருகிறது; செட்டியார்பட்டி பேரூராட்சிக்கு கூடுதல் கூட்டுக் குடிநீர்த் திட்டம் வழங்கப்பட்டது; குடிநீருக்காக 24 மணி நேரமும் மும்முனை மின்சாரம் வழங்கப்பட்டது;

சேத்தூர் பேரூராட்சிக்கு கூடுதல் கூட்டுக் குடிநீர்த் திட்டமும் வழங்கப்பட்டது; புதிய பத்திரப் பதிவு அலுவலகம் அமைக்கப்பட்டுள்ளது; புதிய யூனியன் ஆபிஸ் அலுவலகம் கட்டப்பட்டுள்ளது; திருமங்கலம் –ராஜபாளையம் நான்குவழிச் சாலைஅமைக்க முயற்சிகள் மேற்கொள்ளப்பட்டு, தற்போது பணிகள் முடிவடையும் நிலையில் உள்ளன; இதுபோன்ற எண்ணற்ற திட்டங்கள் முதலமைச்சர் அவர்களால் ராஜபாளையம் தொகுதிக்கு கொண்டுவரப்பட்டன என்பதை நான் மகிழ்ச்சியுடன் தெரிவித்துக்கொள்கிறேன். அதற்கு உறுதுணையாக இருந்த துணை முதலமைச்சர் அவர்களுக்கும், எங்களுடைய மாவட்டத்தை சார்ந்த இரண்டு அமைச்சர் பெருமக்களுக்கும் ராஜபாளையம் பொதுமக்கள் சார்பாக மனமார நன்றி தெரிவித்துக்கொள்கிறேன்.

வனப் பகுதிகளில் அமைந்துள்ள கோவில்களுக்குச் செல்லும் பாலங்கள் மற்றும் வனப் பகுதிகளில் பொதுமக்களுக்குத் தேவையான பணிகளை மேற்கொள்ள வனத் துறையிட மிருந்து அனுமதி பெறுவதில் பல்வேறு சிக்கல்களும், சவால்களும் உள்ளன. ஆகவே, வனத் துறையிடம் பாலம் உள்ளிட்ட பல்வேறு பணிகளுக்கு அனுமதி பெறும் நடைமுறையை எளிமையாக்க நடவடிக்கை மேற்கொள்ளுமாறு அமைச்சர் அவர்களைக் கேட்டுக்கொள்கிறேன்.

தமிழ்நாட்டில் மேற்குத் தொடர்ச்சி மலைகள், ஆடு, மாடுகள் மேய்ப்பதன்மூலம் செடி, கொடிகள், பூக்கள் வளர்ந்து பசுமையாகக் காணப்படும்.தற்போது அதற்கான அனுமதி இல்லை. எனவே, மேற்குத்தொட ர்ச்சி மலைகளில் ஆடு, மாடுகள் மேய்க்க அனுமதி வழங்கிட நடவடிக்கை மேற்கொள்ள வேண்டும் என்று அமைச்சர் அவர்களைக் கேட்டுக்கொள்கிறேன்.

விவசாய நிலத்தை வன விலங்குகள் சேதப்படுத்தினால் வழங்கப்படும் இழப்பீடு சதவிகிதத்தை உயர்த்த வேண்டும் என்றும், தமிழ்நாடு வனத் துறை அதிகாரிகளுக்கு குடியிருப்புக் கட்டடம் கட்ட நடவடிக்கை மேற்கொள்ள வேண்டும் என்றும் அமைச்சர் அவர்களைக் கேட்டுக்கொள்கிறேன்.

நெசவாளர்கள் நலன்

காக்கும் திட்டங்கள்:

முன்பு பேரறிஞர் அண்ணா அவர்களும், தலைவர் கலைஞர் அவர்களும் காஞ்சிபுரம் வீதிகளில் தங்களது தோள்களில் கைத்தறியால் நெய்த ஜவுளிகளைச் சுமந்து சென்று, விற்பனை செய்து நெசவாளர்க ளுக்கு ஆதரவாக இருந்தார்கள். 1996 ஆம் ஆண்டு தி.மு.க. ஆட்சியில் முத்தமிழறிஞர் கலைஞர் அவர்கள் முதலமைச்சராக இருந்தபோதுதான், கைத்தறிக்கு ஆண்டு முழுவதும் தள்ளுபடி மானியம்; நெசவாளர்களுக்குக் காப்பீட்டுத் திட்டம்; நெசவாளர் குடும்ப நல நிதித் திட்டம்; நெசவாளர் இலவச குடியிருப்புத் திட்டம்; நெசவாளர்களுக்கு தனி வாரியம்; நெசவாளர்களுக்கு 500 யூனிட் கட்டணமில்லா மின்சாரம் போன்ற பல்வேறு திட்டங்கள் முத்தமிழறிஞர் கலைஞர் அவர்களால் வழங்கப்பட்டன. தற்போது, நமது முதலமைச்சர் அவர்களுடைய ஆட்சியில் 1 இலட்சத்து 68 ஆயிரம் பெடல் தறி நெசவாளர்கள் பயனடையும் வகையில், கட்டணமில்லா மின்சாரம் 1,000 யூனிட்டாக உயர்த்தப்பட்டுள்ளது. (மேசையைத் தட்டும் ஒலி)

அதேபோல், 73,642 கைத்தறி விவசாயிகள்பயன் பெறும் வகையில் கட்டணமில்லா மின்சாரம் 300 யூனிட்டாகவும் உயர்த்தப்பட்டுள்ளது. நெசவாளர் கூட்டுறவுச் சங்க தனி அலுவலர்களுக்கு கூட்டுறவு சங்கத்தின்மூலம் வழங்கிய சம்பளத்தை ரத்து செய்து அதை அரசே வழங்கி கூட்டுறவுச் சங்கத்தை பாதுகாத்தது நமது அரசு. தற்போதுஆண்டு முழுவதும் 12 மாதங்களும் தொடர்ச்சியாக வேலைவாய்ப்பு வழங்கி வருகிறது நமது கழக அரசு.

நெசவாளர்களுக்கு வழங்கிவரும் அடிப்படை கூலியில் 10 சதவீதம், அகவிலைப்படியில் 10 சதவீதமாக கூலி உயர்வு வழங்க வேண்டும் என்று தொடர்ந்து கடந்த 10 ஆண்டுகளாக அண்ணா திராவிட முன்னேற்றக் கழக அரசால் வழங்கப்படாத கூலியை நம்முடைய மாண்புமிகு முதலமைச்சர் அவர்கள் வழங்குவார் என்று நெசவாளர்கள் எதிர்ப்பார்த்துக் கொண்டிருக்கிறார்கள் என்பதை இந்த நேரத்தில் நான் சொல்லக் கடமைப்பட்டிருக்கின்றேன். அதுபோல், இந்தக் கூலி உயர்வை தமிழ்நாட்டிலுள்ள நெசவாளர் பெருமக்களும் மிகவும் எதிர்பார்த்துக் கொண்டிருக்கிறார்கள்.

ஆண்டு முழுவதும் ஜனதா ரக சேலை ரகங்களை வழங்கிட வேண்டும் என்று கேட்டுக்கொள்கிறேன். அதேபோல், நெசவாளர்களுக்கு வழங்கப்பட்டுவரும் பென்சன் தொகை ரூபாய் 1,200–லிருந்து ரூபாய் 2,000 ஆக உயர்த்த வேண்டும் என்று கேட்டிருக்கிறார்கள். 60–வயது அடைந்த நெசவாளர்களுக்கு எவ்வித நிபந்தனை யுமின்றி மீண்டும் ஓய்வூதியம் வழங்க வேண்டும். நெசவாளர்களுக்கு தனியாக காப்பீட்டு திட்ட அட்டை வழங்க வேண்டும். நெசவாளர்களுக்கு தனியாக ஆண்டு முழுவதும் இலவச கண் பரிசோதனை மற்றும் ஆபரேசன், ஆஸ்துமா சிகிச்சை வழங்க வேண்டும். நெசவாளர்களுக்கு ஆண்டுதோறும் தறிநாடா, அச்சுபண், விழுது, பெடல் தறி போன்ற உபகரணங்கள் வழங்க வேண்டும். நெசவாளர்களுக்கு தறியுடன்கூடிய இலவச வீட்டுமனை பட்டா வழங்க வேண்டும். நெசவாளர்களுக்கு புங்கர் பீமா யோஜனா திட்டத் தின்கீழ் நெசவாளர்கள் 50 வயதுக்குள் இறந்தால் ரூபாய் 2 லட்சம் மற்றும் 50 முதல் 60 வயதுக்குள் இறந்தால் ரூபாய் 60 ஆயிரமும் என வழங்கிய திட்டத்தினை மீண்டும் செயல்படுத்த வேண்டும்.

சேலை, வேஷ்டி மற்றும் காடா–வை உற்பத்தி செய்ய மாறி மாறி வழங்காமல், சேலையை விருதுநகர் மாவட்டத்திற்கும், வேஷ்டியை கன்னியாகுமரி மாவட்டத்திற்கும், காடாவை ஈரோடு மாவட்டத்திற்கும் நிரந்தரமாக வழங்க நடவடிக்கை எடுக்க வேண்டும் என்று கேட்டுக்கொள்கிறேன்.

தமிழ்நாடு முதலமைச்சர் அவர்களின் திட்டங்களும், சாதனைகளும். குடும்பத் தலைவிகளுக்கு கலைஞர் மகளிர் உரிமைத் தொகை திட்டம்மூலம் மாதம் 1000 ரூபாய், மகளிர்களுக்கு கட்டணமில்லா பேருந்து வசதி திட்டம், அரசு பள்ளி மற்றும் அரசு உதவிபெறும் பள்ளிகளில் காலை சிற்றுண்டி திட்டம், புதுமைப்பெண் திட்டம், தமிழ்புதல்வன் திட்டம், இன்னுயிர் காக்கும் நம்மை காக்கும் 48 திட்டம், மக்களைத் தேடி மருத்துவம், தற்போது பட்ஜெட் டில் அறிவித்த சிறப்பான திட்டங்கள்–மாணவ, மாணவியர்களுக்கு மடிக்கணினி, தாயுமானவர் திட்டம்: பெற்றோரை இழந்த குழந்தைகளுக்கு உதவித்தொகை மாதம் ரூ 2,000 மற்றும் 1,125 மின் பேருந்துகள். அதேபோல், அனைத்து மாநகராட்சிகளிலும் முதல்வர் படிப்பகம், அன்புச்சோலைமூலம் முதியோர் பகல் நேர பராமரிப்பு மையம், ஒரு லட்சம் மகளிர்களை தொழில்முனைவோர் ஆக்கும் சிறப்பு திட்டங்கள், 5 இலட்சம் புதிய பட்டாக்கள் வழங்கும் திட்டம், இந்தியாவிலேயேஇவ்வளவு திட்டங்களை கொண்டுவந்த ஓர் முதலமைச்சர் என்றால், அது நம்முடைய தமிழ்நாடு முதலமைச்சர் அவர்கள்தான் என்பதை இந்த நேரத்தில் பதிவிட விரும்புகிறேன். (மேசையைத் தட்டும் ஒலி)

அப்பா–க்கு ஓர் கவிதை. அன்பு என்றால் தாய்; அக்கறை என்றால் அக்கா; ஆதரவு என்றால் அண்ணன்; பாசம் என்றால் தம்பி; பரிவு என்றால் தங்கை; நட்பு என்றால் நண்பன்; அத்தனையும் கொண்டவர்தான் அப்பா.. அவர்தான் நம் முதல்வர் அப்பா. (மேசையைத் தட்டும் ஒலி)

தமிழ் வாழ்க, தமிழ்நாடு வெல்க, தமிழ்நாடு முதலமைச்சர் அவர்கள், பல்லாண்டு பல்லாண்டு வாழ்க, வாழ்க எனக் கூறி இராஜபாளையம் தொகுதியில் வளர்ச்சி திட்டப்பணிகளான

1.அரசு மகளிர் கலைக் கல்லூரி அமைக்க வேண்டும்.

2.சங்கரன்கோவில் முக்கு முதல் முதுகுடி நான்கு வழிச்சாலை வரை உள்ள இருவழிச் சாலையை நான்கு வழிச்சாலையாக மாற்ற வேண்டும்.

3.இராஜபாளையம் மேற்கு தொடர்ச்சி மலைப்பகுதியில் அமைந்துள்ள நீர்காத்த அய்யனார் கோவிலுக்குச் செல்ல பாலம் அமைக்க வேண்டும்.

4.அய்யனார் கோவில்சாஸ்தா கோவில் மற்றும் சஞ்சீவி மலைப்பகுதிகளை சுற்றுலா தலமாக தரம் உயர்த்த வேண்டும்.

எனது இக்கோரிக்கைகளை நிறைவேற்றித் தர வேண்டுமெனக் கோருகிறேன்.

இவ்வாறு அவர் பேசினார்.