சென்னை, ஏப். 4 –
சட்டப்பேரவையில் உறுப்பினர் கேள்விக்கு பதிலளிக்கையில் அமைச்சர் கே.ஆர்.பெரியகருப்பன் நகர்ப் பகுதிகளில் நியாய விலைக் கடை அமைக்க குறைந்த பட்சம் 800 குடும்ப அட்டைகள் இருக்க வேண்டும் என்று தெரிவித்தார்.
இது குறித்து திண்டிவனம் தொகுதி, தானங்குப்பம் ஊராட்சியில் உள்ள நியாய விலைக் கடைக்கு புதிய கட்டடம் கட்ட அரசு முன்வருமா? என்று அ.தி.மு.க. உறுப்பினர் பொ.அர்ஜூனன் கேட்ட கேள்வியைத் தொடர்ந்து அமைச்சர் கே.ஆர்.பெரியகருப்பன் அளித்த பதில் வருமாறு:–
விழுப்புரம் மாவட்டம், திண்டிவனம் தொகுதி, ஒலக்கூர் ஒன்றியம், ஓங்கூர் தொடக்க வேளாண்மைக் கூட்டுறவுக் கடன் சங்கத்தின் கட்டுப்பாட்டின்கீழ் 834 குடும்ப அட்டைகளுடன் ஓங்கூர் முழுநேர நியாய விலைக் கடை செயல்படுகிறது. இக்கடையில் தானங்குப்பம் கிராமத்திலுள்ள 89 குடும்ப அட்டைதாரர்களும் பொது விநியோகத் திட்டப் பொருட்களைப் பெற்று வருகின்றனர். இந்நிலையில் தானங்குப்பத்தில் தனியாக நியாய விலைக் கடை இல்லாத நிலையில், நியாய விலைக் கடைக்கு புதிதாக கட்டடம் கட்ட வேண்டிய நிலை எழவில்லை .
தானங்குப்பத்திலேயே கடை வேண்டுமா? அங்கு 89 கார்டுகள் மட்டுமே உள்ளன. 89 கார்டுகளுக்காக ஒரு தனிக் கடையை அமைப்பதென்பது சற்று சிரமம். ஏற்கெனவே அதற்கென விதிகள் இருக்கின்றன. ஆனால், அந்தப் பகுதியில் பார்த்தோமானால், 48 கார்டுகளுக்குக்கூட ஒரு கடை இருக்கிறது.
குறிப்பாக, ஓங்கூர் தொடக்க வேளாண்மைக் கூட்டுறவுக் கடன் சங்கத்தின் ஓங்கூர் நியாய விலைக் கடை 834 குடும்ப அட்டைகளுடனும், கும்பூர் நியாய விலைக் கடை 339 குடும்ப அட்டைகளுடனும், பாதிரி நியாய விலைக் கடை 338 குடும்ப அட்டைகளுடனும், கச்சப்பட்டு நியாய விலைக் கடை 48 குடும்ப அட்டைகளுடனும் செயல்பட்டு வருகின்றன. இதில் 48 கார்டுகளுக்குக்கூட ஒரு கடை இருக்கிறது. அது எவ்வாறு ஏற்பட்டிருக்கும் என்றால், முதலில் தாய்க் கடை ஆரம்பிக்கப்பட்டிருக்கும். பின்னர், பகுதி நேரக் கடைகள், புதிய கடைகள் கோரும்போது, அங்குள்ள கார்டுகளின் எண்ணிக்கை குறைந்து 48 கார்களுக்காக ஒரு நியாய விலைக் கடை செயல்பட்டு வருகிறது. அதன் பிறகுதான், 2006 ஆம் ஆண்டில், புதிய அரசாணை எண் 147, நாள் 24–8–2006 வெளியிடப்பட்டு, அதில் சில விதிமுறைகள் வகுக்கப்பட்டு நடைமுறையிலுள்ளன.
அந்த அடிப்படையில்தான், நகரப் பகுதிகளில் குறைந்தபட்சம் 800 குடும்ப அட்டைகள் இருக்க வேண்டும்; கிராமப் பகுதிகளில் 500 குடும்ப அட்டைகள் இருக்க வேண்டும்; மலைப் பிரதேசங்களைப் பொறுத்தவரை 400 குடும்ப அட்டைகள் இருக்க வேண்டும் என்று எண்ணிக்கை அளவிலும், தாய்க் கடைக்கும், அதிலிருந்து பிரிக்கப்படும் பகுதி நேரக் கடைக்கும் இடையே 1.5 கி.மீ. தூரம் இருக்க வேண்டும்; பிரிக்கப்படும் பகுதி நேரக் கடையில் குறைந்தபட்சம் 150 குடும்ப அட்டைகள் இருக்க வேண்டும்; பிரித்தபின் தாய்க் கடையிலும் 500 குடும்ப அட்டைகள் இருக்க வேண்டும் என விதிமுறைகள் உள்ளன. இவ்வாறு விதிகள் இருக்கும்போது,அதற்கு எந்த வகையிலும் பொருந்தாத நிலையில், 89 குடும்ப அட்டைகளுக்காக ஒரு கடையைக் கேட்பதென்பது நியாயமாகத் தெரியவில்லை.இருப்பினும் உறுப்பினர் அவர்களின்கோரிக்கை பரிசீலிக்கப்படும்.
இதுவும் விதிகளைத் தளர்த்த வேண்டிய ஒரு கேள்வியாகத்தான் இருக்கிறது. ஏனெனில், கீழாதனூரில் மொத்தமே 387 கார்டுகள்தான் அங்கு இருக்கின்றன. அதிலே காலனி பகுதி, ஊர்ப் பகுதி என்று இரண்டு பிரிவுகளாக இருக்கிறது. ஊர்ப் பகுதியில் 90 கார்டுகள்தான் இருக்கின்றன. காலனி பகுதியில் 297 கார்டுகள் இருக்கின்றன. இப்போது இவர்கள் சட்டமன்ற உறுப்பினர் நிதியிலிருந்து புதிதாக நியாய விலைக் கடை கட்டும்போது என்ன செய்திருக்கிறார்கள் என்றால், காலனி பகுதியில் 297 கார்டுகள் இருக்கிற காரணத்தால் அங்கு கட்டிவிட்டார்கள். அது நியாயம். ஆனால், இப்போது ஊர்க்காரர்கள் நாங்கள் அங்கே சென்று வாங்குவதா என்று கேட்கிறார்கள். இடைப்பட்ட தூரமும் 2 கிலோ மீட்டராக இருக்கிறது. எதிர்காலத்தில் மாவட்ட ஆட்சியர் அளவில், மாவட்ட அளவில் நீங்கள் முயற்சி செய்தால் விதிகளைத் தளர்த்தி செய்வதற்கு முயற்சிகளை மேற்கொள்ளலாம்.
இவ்வாறு அமைச்சர் கே.ஆர்.பெரியகருப்பன் பதிலளித்தார்.