சென்னை, ஏப். 4 –
‘கச்சத் தீவை திரும்பப் பெறுதல்’ குறித்து சட்டப்பேரவையில் நேற்று முன்தினம் தாம் முன்மொழிந்த ‘அரசினர் தனித் தீர்மானத்தை’ வரவேற்றும் – ஆதரித்தும் உரையாற்றிய அத்தனை பேருக்கும் தமிழ்நாட்டு மக்களின் சார்பிலும், தமிழ்நாட்டு மீனவர்கள் சார்பிலும் தமது இதயப்பூர்வமான நன்றியினைத் தமது உரையில் முதல்வர் மு.க.ஸ்டாலின் தெரி வித்துக் கொண்டார்.
இதுகுறித்து முதல்வர் அவர்களின் உரை வருமாறு:
கச்சத்தீவைத் திரும்ப பெறுதல் குறித்த இந்த அரசினர் தீர்மானத்தின்மீது பல்வேறு உறுப்பினர்கள் பேசியிருக்கிறார்கள். உறுப்பினர் தி. வேல்முருகன் , இதை வரவேற்றுப் பேசுகையில், கன்னியாகுமரி மற்றும் திருத்தணி இணைக்கப்பட்ட அதே நாளில் உரிமைப் போர் தொடங்கியிருப்பதாகக் குறிப்பிட்டு, உணர்ச்சிப் பெருக்கோடு தன்னுடைய உரிமைக் குரலை இங்கே பதிவு செய்திருக்கிறார்.
மீனவர்கள் படக்கூடிய
துன்பங்கள்!
அதேபோன்று ஈ.ஆர். ஈஸ்வரன் இந்தப் பிரச்சினையை அரசியல்ரீதியாக பார்க்காமல், தமிழ்நாட்டு மீனவர்கள் மற்றும் படகுகள் தொடர்ந்து சிறை பிடிக்கப்பட்டு வருவதைப் பற்றிக் குறிப்பிட்டு, இந்தத் தீர்மானத்தை வரவேற்றுப் பேசியிருக்கிறார்கள். ப. அப்துல் சமது மற்றும் மு. ஜெகன் மூர்த்தி தமிழ்நாட்டு மீனவர்கள் படக்கூடிய துன்பங்களைக் குறித்து குறிப்பிட்டு, இந்தியப் பிரதமர் இலங்கை செல்லும்போது, இதுகுறித்துப் பேசவேண்டுமென்று வலியுறுத்திக்காட்டி, தீர்மானத்தை வரவேற்றிருக்கிறார்கள்.
பரப்பப்படும் உண்மைக்கு
மாறான செய்திகள்!
அதேபோன்று, டாக்டர் தி.சதன் திருமலைக்குமார் , வைகோ நாடாளுமன்றத்தில் இதுதொடர்பாக வலியுறுத்திப் பேசியதைக் குறிப்பிட்டு தீர்மானத்தை வரவேற்றிருக்கிறார்கள். உறுப்பினர் ட்டி. இராமச்சந்திரன் உரையாற்றுகையில், 1974 மற்றும் 1976 ஆம் ஆண்டுகளில் போடப்பட்டிருக்கக்கூடிய ஒப்பந்தங்கள் குறித்து விரிவாக உரையாற்றி, கருத்துகளைத் தெரிவித்து வரவேற்றிருக்கிறார்.
இந்திய கம்யூனிஸ்ட் கட்சியினுடைய மார்க்சிஸ்ட் கட்சி உறுப்பினர் வி.பி. நாகைமாலி உரையாற்றுகையில், நீதிமன்ற வழக்கு குறித்தும், நாம் எடுக்க வேண்டிய முடிவு குறித்தும் தனது கருத்துக்களைத் தெரிவித்திருக்கிறார்கள்.
எஸ்.எஸ். பாலாஜி உரையாற்றுகையில் தமிழ்நாடு அரசோடு கலந்தாலோசிக்காமல், நாடாளுமன்றத்தில் உரிய வகையில் ஒப்புதல் பெறாமல், 1974 ஆம் ஆண்டு போடப்பட்ட ஒப்பந்தம் குறித்து வெளியில் பரப்பப்படும் உண்மைக்கு மாறான செய்திகள் குறித்து விரிவாகப் பேசியிருக்கின்றார்.
பாரதிய ஜனதா கட்சியைச் சார்ந்த உறுப்பினர் திருமதி வானதி சீனிவாசன் உரையாற்றுகையில் மீனவர் நலன் காக்க தனி அமைச்சகம் உருவாக்கப்பட்டது போன்ற நல்ல விஷயங்களைக் குறிப்பிட்டு, அன்றைக்கு இந்த ஒப்பந்தம் குறித்து நாடாளுமன்றத்தில் விவாதம் நடைபெற்றபோது மறைந்த பாரத பிரதமர் வாஜ்பாய் கடுமையாக எதிர்த்தது பற்றிக் குறிப்பிட்டு, வரலாற்றுத் தவறு சரிசெய்யப்பட வேண்டுமெனக் குறிப்பிட்டார்.
எங்களால் இயலும் என்று சொல்பவர்கள் கடந்த 10 ஆண்டுகளாக அன்றைக்கு ஆட்சியில் இருந்தவர்கள் வலியுறுத்திய போதும், இப்போது கடந்த 4 ஆண்டுகளாக நாங்கள் வலியுறுத்தி வருகிறபோதும் ஒன்றிய அரசு செவிசாய்க்கவில்லை.
இன்றைக்கு இந்தத் தீர்மானம் ஒருமனதாக நிறைவேற்றப்பட்டு ஒன்றிய அரசுக்கு அனுப்பப்பட்ட பிறகாவது செய்வதற்கு நம்முடைய உறுப்பினர் அங்கிருக்கக்கூடிய தலைவரிடத்திலே வற்புறுத்துவார்கள் என்று நம்புகிறேன். அவரும் தீர்மானத்தை வரவேற்றிருக்கிறார். மகிழ்ச்சி.
அதேபோல, ஜி.கே. மணி இதை வரவேற்று உரையாற்றியிருக்கிறார். மேலும், தீர்மானத்தை நிறைவேற்றி ஒன்றிய அரசுக்கு அனுப்புவதோடு, ஒரு குழு இந்தியப் பிரதமர் அவர்களை நேரில் சந்தித்து தமிழ்நாட்டு மீனவர்கள் படும் வேதனையைப் பற்றிய விவரங்களைச் சுட்டிக்காட்டி, கச்சத்தீவை மீட்க வேண்டியதன் அவசியத்தைப் பற்றி வலியுறுத்த வேண்டுமென்று குறிப்பிட்டி ருக்கிறார். அதையும் வரவேற்றிருக்கிறார்.
கு.செல்வபெருந்தகை உரையாற்றுகையில், 1921 ஆம் ஆண்டு முதல் நடைபெற்ற நிகழ்வுகளையெல்லாம் குறிப்பி ட்டு, தீர்மானத்தை வரவேற்றுப் பேசியிருக்கிறார்.
அதேபோல, எதிர்க்கட்சித் தலைவர் அவர்களும் இடையிடையிலே கொஞ்சம் முரண்பாடான சில கருத்துகளைத் தெரிவித்தாலும், அதை யெல்லாம் மறந்து, இந்தத் தீர்மானத்தை உளப்பூர்வமாக வரவேற்றுப் பேசியிருக்கிறார்.
எனவே, அத்தனைப் பேருக்கும் இந்த நேரத்தில் நான் தமிழ்நாட்டு மக்களின் சார்பில், தமிழ்நாட்டு மீனவர்களின் சார்பில் எனது இதயபூர்வமான நன்றியைத் தெரிவித்துக்கொள்கிறேன். (மேசையைத் தட்டும் ஒலி) நன்றி, வணக்கம்.
இவ்வாறு முதல்வர் மு.க.ஸ்டாலின் அவர்கள் உரையாற்றினார்.