சென்னை, மே 5–
மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணி யன் நேற்று முன்தினம் (03.05.2025) சென்னை மருத்துவக்கல்லூரி சார்பாக நடைபெற்ற தேசியஅளவிலான மருத்துவக் கல்வி மாநாட்டினை தொடங்கி வைத்து, போட்டியில் வெற்றி பெற்ற மருத்துவ மாணவர்களுக்கு பரிசுகளை வழங்கி, சிறப்பித்து, விழா பேரூரையாற்றினார்.
அவர் ஆற்றிய உரை வருமாறு:-
மருத்துவக் கட்டமைப்பு
தமிழ்நாட்டில் மருத்துவக்கட்டமைப்பு என்பது மிகப்பெரிய அளவில் இந்தியா மட்டுமல்ல உலக நாடுகளே பாராட்டும் வகையிலான மருத்துவக் கட்டமைப்பு தமிழ்நாட்டில் உள்ளது. 8713 துணை சுகாதார நிலையங்கள், 2286 ஆரம்பசுகாதார நிலையங்கள் மற்றும் நகர்ப்புற ஆரம்ப சுகாதார நிலையங்கள், 500 நகர்ப்புற நலவாழ்வு மையங்களும், 279 வட்டார மருத்துவமனைகளும், 37 மாவட்ட அரசு தலைமை மருத்துவ மனைகளும், 36 மருத்துவக்கல்லூரி மருத்துவமனைகளும், 22 இந்திய மருத்துவத்துறை சார்ந்த மருத்துவமனைகளும், 3 பல் மருத்துவக்கல்லூரிகளும், 2 பன்னோக்கு மருத்துவமனைகள் என்று ஏறத்தாழ 11876 மருத்துவக் கட்டமைப்புகள் தமிழ்நாட்டில் இருந்து வருகிறது.
இந்தியாவில் 36 மாநிலங்கள் இருந்தாலும்கூட, இந்த அளவிற்கு மருத்துவக் கட்டமைப்புகள் இருக்கின்ற மாநிலம் தமிழ்நாடு என்பது மகிழ்ச்சிக்குரிய ஒன்று. அந்த வகையில் இந்த மருத்துவக் கட்டமைப்பு பல்வேறு வகைகளில் சாதனை படைத்து வருகிறது. மாண்புமிகு தமிழ்நாடு முதலமைச்சர் அவர்கள் 2021 ஆகஸ்ட் திங்கள் 5 ஆம் தேதி கிருஷ்ணகிரி மாவட்டம், சாமனப்பள்ளியில் மக்களைத் தேடி மருத்துவம் எனும் திட்டத்தை தொடங்கி வைத்தார்கள்.
தமிழ்நாடுமுழுவதும் உள்ள மக்களைத் தேடி, அதாவது நீரிழிவு, உயர் இரத்த அழுத்தம், பிசியோதெரபி, டயாலிசிஸ் போன்ற நோய்களுக்கு வீடுகளைத் தேடி சென்று மருத்துவம்இந்த திட்டத்தின் நோக்கமாகும். முதலமைச்சர் அவர்கள் இத்திட்டத்தில் ஒரு கோடி பயனாளிகளை இணைக்க வேண்டும் என்று அறிவுறுத்தியிருந்தார்கள். ஆனால் இந்த திட்டத்தில் தற்போது 2 கோடி 4 இலட்சம் பயனாளிகளை கடந்து வெற்றிகரமாக நடத்தப்பட்டு வருகிறது. அதனால்தான் ஐ.நா மன்றம் கடந்த செப்டம்பர் திங்கள் 25–ஆம் தேதி அமெரிக்காவில் உள்ள நியூயார்க் பொது சபை கூட்டத்தில் உலக நாடுகளில் தொற்றா நோய்களுக்கு சிகிச்சை அளிப்பதில் எந்த பகுதி சிறப்பாக சிகிச்சை வழங்கப்பட்டு வருகிறது என்று ஆராய்ந்தபோது தமிழ்நாடு மிகச் சிறப்பாக செய்துக் கொண்டிருக்கிறது என்பதை அறிந்து தமிழ்நாடு மருத்துவத்துறைக்கு 2024–ஆம் ஆண்டிற்கான உலகளாவிய விருது United Nation Intergracy Task Force Award விருது ஐ.நா சபையால் வழங்கப்பட்டிருக்கிறது.
மேலும் இன்னுயிர் காப்போம்நம்மைக்காக்கும் 48, இதயம் காப்போம், சிறுநீரகம் பாதுகாப்போம் திட்டம், பாதம் காப்போம் திட்டம், நடப்போம் நலம் பெறுவோம், மக்களைத் தேடி ஆய்வகம் திட்டம், தொழிலாளர்களை தேடி மருத்துவம் திட்டம், செயற்கை கருத்தரித்தல் மையங்கள் என்று பல சிறப்புக்குரிய திட்டங்கள் தமிழ்நாட்டில் நடைமுறையில் இருந்து வருகிறது.
நேற்று முன்தினம் புனேவில் இந்திய மருத்துவத்திற்கான மாநாட்டில் நமது துறையின் செயலாளர் முனைவர் ப.செந்தில்குமார் சென்றிருந்தார்கள். நேற்றுக் காலை அவரிடம் பேசிக்கொண்டிருந்தபோது அவர் சொன்ன நல்ல விஷயம், இந்தியா முழுமைக்கும் உள்ள அமைச்சர்கள், அலுவலர்களிடத்தில் தமிழ்நாட்டில் குறிப்பாக ஆயுஷ் (சித்தா, ஆயுர்வேதா, யுனானி, ஹோமியோபதி, யோகா) போன்ற பல்வேறு இந்திய மருத்துவத்துறையில் நாம் செய்து வரும் நல்ல விஷயங்களை அங்கே பட்டியலிட்டு காட்டச் சொன்னதாக தெரிவித்தார்கள். தமிழ்நாடு மருத்துவக்கட்டமைப்பில் மட்டுமல்ல, இந்திய மருத்துவத்திற்கும் கூட ஒரு சிறந்த நிலையில் இருந்து கொண்டிருக்கிறது. ஆகவே இந்த மாநாட்டினை மருத்துவர் தேரணி ராஜன் அவர்கள் மிகச் சிறப்பான வகையில் நடத்திக் கொண்டிருக்கிறார்கள். குறிப்பாக 2000த்திற்கும் மேற்பட்ட மருத்துவக்கல்லூரி மாணவர்களை ஒரே இடத்தில் அமர வைத்து அவர்களை பயிற்றுவிப்பதாக இருந்தாலும் ஒரு இடத்தில் மாணவர்களை ஒருசேர நிகழ்ச்சிகளை ஒருங்கிணைத்து நடத்துவது என்பது யாரும் நினைத்து பார்க்க முடியாக விஷயமாகும்.
பணியிடங்கள் மற்றும் கலந்தாய்வு
இந்த அரசு பொறுப்பேற்றபிறகு மருத்துவப் பணியாளர் தேர்வாணையம் மூலமாக இதுவரை 25,295 மருத்துவம் சார்ந்த பணியிடங்கள் நிரப்பப் பட்டிருக்கிறது. மேலும் கடந்த மாதம் 48 பல் மருத்துவர்களுக்கு தேர்வு நடைபெற்றது. இந்த 48 பணியிடங்களுக்கு இதுவரை 11,720 பேர் தேர்வு எழுதியிருக்கிறார்கள். இதில் தேர்ச்சி பெற்றவர்கள் ஏறத்தாழ 8,000த்திற்கும் மேற்பட்டவர்கள். இவர்களுக்கு சான்றிதழ் சரிபார்ப்பு, இடஒதுக்கீடு அடிப்படையில் 48 பணியிடங்கள் தேர்வு செய்யப்படும். அந்த அளவிற்கு வெளிப்படைத்தன்மையுடன் மருத்துவப் பணியாளர் தேர்வாணையம் மூலமாக பணியிடம் நிரப்பப்பட்டு வருகிறது.
அண்மையில் 2,642 மருத்துவர் பணியிடங்கள் நிரப்பப்பட்டது. அதாவது இந்தியாவில் முதன்முறை யாக அவரவர் விரும்பும் இடங்களுக்கே கலந்தாய்வு நடத்தி பணி ஆணைகள் வழங்கப்பட்டுள்ளது. மேலும் கடந்த 4 ஆண்டுகளில் 42,718 பேருக்கு வெளிப்படைத்தன்மை யுடன் கலந்தாய்வு நடத்தப்பட்டு பணிமாறுதல்கள் வழங்கப்பட்டுள்ளது என்று மருத்துவம் மற்றும் மக்கள் நல்வாழ்வுத் துறை அமைச்சர் மா.சுப்பிரமணியன் அவர்கள் விழா பேரூரையாற்றினார்.
இந்நிகழ்வில் மருத்துவம் மற்றும் மக்கள் நல்வாழ்வுத்துறை அரசு முதன்மைச் செயலாளர் முனைவர் ப.செந்தில்
குமார், தேசிய நலவாழ்வு குழும இயக்குநர் மரு.அருண்தம்புராஜ், மருத்துவக்கல்வி மற்றும் ஆராய்ச்சி கூடுதல் இயக்குநர் மரு.தேரணிராஜன், தமிழ்நாடு உறுப்பு மாற்று ஆணையஉறுப்பினர் செயலாளர் மரு.கோபாலகிருஷ்ணன், சென்னை மருத்துவக்கல்லூரி துணை முதல்வர் மரு.கவிதா மற்றும் மருத்துவப் பேராசிரியர்கள், மாணவர்கள் கலந்து கொண்டனர்.