சென்னை, மே 5 –
சட்டப் பேரவையில் நிதி, சுற்றுச் சூழல், ஆதி திராவிடர் நலத்துறை மானியக் கோரிக்கையில் பரமக்குடி தொகுதி உறுப்பினர் செ.முருகேசன் பேசுகையில் பரமக்குடி நகராட்சிக்கு பாதாள சாக்கடைத் திட்டத்தை அமைத்துத் தர வேண்டும் என்ற கோரிக்கை விடுத்தார்.
சட்டப் பேரவையில் சட்டமன்றம், ஆளுநர் நிதி, சுற்றுச்சூழல் ஆதிதிராவிடர் நலத்துறை மானியக் கோரிக்கையில் பரமக்குடி செ.முருகேசன் பேசியதாவது:
தந்தை பெரியார், பேரறிஞர் அண்ணா, முத்தமிழறிஞர் கலைஞர் ஆகியோரின் வழியில் மக்களுக்கான நல்லாட்சியை நடத்திவரும் முதலமைச்சர் அவர்களுக்கு எனது பணிவான வணக்கத்தைத் தெரிவித்துக்கொள்கிறேன். முதலமைச்சர் அவர்களுக்கும், துணை முதலமைச்சர் அவர்களுக்கும் எனது பணிவான வணக்கத்தைத் தெரிவித்துக்கொள்கிறேன். அவை முன்னவர் அவர்களுக்கும், அமைச்சர் பெருமக்களுக்கும். . .
அவை முன்னவர் அவர்களுக்கும், அரசு தலைமை கொறடா அவர்களுக்கும், எங்கள் மாவட்ட அமைச்சர் பால்வளத் துறை அமைச்சர் அவர்களுக்கும், எங்களது மாவட்ட கழகச் செயலாளர், இராமநாதபுரம் சட்டமன்ற உறுப்பினருமான அருமை காதர்பாட்சா முத்துராமலிங்கம் அவர்களுக்கும்,
சக சட்டமன்ற உறுப்பினர்கள் அனைவருக்கும் எனது பணிவான வணக்கத்தைத் தெரிவித்துக்கொள்கிறேன். 2025-–2026 ஆம் ஆண்டிற்கான நிதிநிலை அறிக்கையில், நீதி, சுற்றுச்சூழல் மற்றும் காலநிலை மாற்றத் துறை மற்றும் ஆதி திராவிடர் மற்றும் பழங்குடியினர் நலத் துறை மானியக் கோரிக்கையில் எனக்கு பேச வாய்ப்பளித்த முதலமைச்சர் அவர்களுக்கும் எனது பணிவான வணக்கத்தைத் தெரிவித்துக்கொள்கிறேன்.
இமானுவேல் சேகரனார்க்கு மணி மண்டபம்!
பட்டியலின மக்கள் மற்றும் பிற்படுத்தப்பட்ட மக்களின் உயர்விற்காக போராடி தன் உயிரையும் தியாகம் செய்த சுதந்திரப் போராட்ட வீரர் தியாகி இமானுவேல் சேகரனார் அவர்களுக்கு பரமக்குடியில் 3 கோடி ரூபாயில் மணி மண்டபம் அமைத்து அவர்களின் பிறந்த நாள் அரசு விழாவாக அறிவித்த மாண்புமிகு முதலமைச்சர் அவர்களுக்கும் எனது நன்றியினைத் தெரிவித்துக்கொள்கின்றேன். (மேசையைத் தட்டும் ஒலி) தியாகி இமானுவேல் சேகரனார் அவர்களுடைய முழு உருவ வெண்கல சிலையுடன்கூடிய மணி மண்படம் அமைத்து தந்த முதலமைச்சர் அவர்களுக்கு எனது சார்பிலும், தேவேந்திரகுல வேளாளர் மக்களின் சார்பிலும் கோடான கோடி நன்றியினைத் தெரிவித்துக்கொள்கிறேன்.
அதேபோல், பசும்பொன் முத்துராமலிங்கத் தேவர் அவர்களின் நினைவிடம் அமைந்துள்ள பசும்பொன் கிராமத்திற்கு போக்குவரத்து நெரிசலே இல்லாமல் வந்து செல்வதற்கு பல பொது மக்களின் நலன் கருதி பார்த்திபனூரில் புறவழிச்சாலை அமைத்துத் தந்த முதலமைச்சர் அவர்களுக்கும் எனது நன்றியைத் தெரிவித்துக்கொள்கிறேன்.
முத்தமிழறிஞர் தலைவர் கலைஞர் அவர்கள் வழியில் நல்லாட்சி நடத்திவரும் திராவிட மாடல் அரசு நான்கு ஆண்டுகளில், பரமக்குடி தொகுதிக்கு வைகை ஆற்றின் குறுக்கே மந்திவலசை பகுதியில் பொது மக்கள் பயன்பெறும் வகையில் புதிய மேம்பாலம் அமைக்கப்பட்டுள்ளது.
அதேபோல், பரமக்குடி அரசு மாவட்ட தலைமை மருத்துவமனைக்கு அதிநவீன வசதிகளுடன்கூடிய கூடுதல் மருத்துவமனை கட்டடங்கள் கட்டப்பட்டு வருகிறது.
அதேபோல், பரமக்குடி நகராட்சிக்கு சந்தைக்கடை பகுதியில் புதிதாக வணிக வளாகக் கட்டடம் அமைத்துத் தருமாறு மாண்புமிகு முதலமைச்சர் அவர்களைக் கேட்டுக்கொள்கிறேன்.
கழிவுநீர் சுத்திகரிப்பு நிலையம் அமைத்துத் தர வேண்டுமென்று கேட்டுக்கொள்கிறேன். அதேபோல், நெசவாளர்களின் நலன் கருதி கைத்தறி மற்றும் துணி நூல் துறையின் சார்பில் பரமக்குடியில் புதிய ஜவுளிப் பூங்கா அமைக்க பணிகள் துவங்கப்பட்டுள்ளன.
இதுபோன்ற எண்ணற்ற திட்டங்களை எனது பரமக்குடி தொகுதிக்கு தந்த முதலமைச்சர் அவர்களுக்கு எனது சார்பிலும், எனது பரமக்குடி தொகுதி மக்களின் சார்பிலும் நன்றியினைத் தெரிவித்துக்கொள்கிறேன்.
தந்தை பெரியார் நினைவு சமத்துவபுரம்!
வீடு இல்லாமல் விளிம்பு நிலையில் வாழும் ஆதி திராவிட மக்களின் நலன் கருதி ஆதி திராவிடர் வீட்டுவசதி கழகம் ஆரம்பித்து, concrete வீடு கட்டித் தந்தவர் முத்தமிழறிஞர் தலைவர் கலைஞர் அவர்கள். சாதி மத பேதங்களை ஒழித்த தந்தை பெரியார் அவர்களின் பெயரில் அனைத்து மதத்தினரும், அனைத்து சாதியினரும் அருகருகே வசிக்கும் வகையில் தந்தை பெரியார் நினைவு சமத்துவபுரங்களை உருவாக்கித் தந்தவர் முத்தமிழறிஞர் தலைவர் கலைஞர் அவர்கள். ஏழை மக்கள் முன்னேற வேண்டுமென்பதற்காக ஆதி திராவிட நலத் துறை சார்பில் கறவை மாடுகள், ஆடுகள் வழங்கி, அவர்கள் வாழ்வில் முன்னேற வழிகாட்டியாக இருந்தவர் முத்தமிழ றிஞர் தலைவர் கலைஞர் அவர்கள். அதேபோல், முதலமைச்சர் அவர்களும் ஏழை ஆதி திராவிட மாணவ, மாணவியர்கள் தங்கள் வாழ்வில் முன்னேற கல்வி ஒரு தடையாக இருக்கக்கூடாது என்பதற்காக பட்டப்படிப்பு முதல் மருத்துவ மேற்படிப்பு வரை படிக்க கல்வி கடன் வழங்கி, மாணவர்களின் வாழ்வில் ஒளி ஏற்றியுள்ளார்கள்.
அதேபோல், பட்டப்படிப்பு படித்த ஆதி திராவிட இளைஞர்களுக்கும், இளம் பெண்களுக்கும் தொழில் முனைவோர்களாக உருவாக TAHDCOமூலம் மானியத்துடன்கூடிய கடன் உதவி வழங்கப்பட்டு வருகிறது.
அதேபோல் பட்டப்படிப்பு படித்த ஆதி திராவிட இளைஞர்களுக்கு திறன் மேம்பாட்டு பயிற்சி வழங்கப்பட்டு வருகிறது. இதுபோன்ற எண்ணற்ற திட்டங்களை ஆதி திராவிட மக்களுக்கு மட்டுமே அல்லது அனைத்து மக்களும் பயன்பெறும் வகையில் திராவிட மாடல் அரசை நமது முதலமைச்சர் அவர்கள் வழிநடத்தி வருகிறார்கள்.
பாதாளச் சாக்கடை திட்டம்!
பரமக்குடி நகராட்சி அதிக மக்கள்தொகை கொண்ட நகராட்சியாகும். இதனால் பரமக்குடிநகராட்சிக்கு பாதாள சாக்கடை திட்டம் அமைத்துத் தர முதலமைச்சர் அவர்களை பணிவுடன் கேட்டுக்கொள்கிறேன்.
பரமக்குடி நகராட்சி, முதல்நிலை நகராட்சியாக உள்ளது. அதை சிறப்பு நிலை நகராட்சியாக தரம் உயர்த்தித் தருமாறு முதலமைச்சர் அவர்களை கேட்டுக்கொள்கிறேன்.
பரமக்குடி தொகுதி, பரமக்குடி காக்காதோப்பு முதல் எமனேஸ்வரம் வரை வைகை ஆற்றின் குறுக்கே உயர்மட்ட மேம்பாலம் அமைத்துத்தர முதலமைச்சர் அவர்களைக் கேட்டுக்கொள்கின்றேன்.
பரமக்குடி பகுதியில் காலை, மாலை நேரங்களில் போக்குவரத்து நெரிசல் அதிகம் ஏற்படுகின்றது. இதனால், பள்ளி, கல்லூரிகளுக்கு செல்லும் மாணவ மாணவியர்கள், அலுவலகங்களுக்கு செல்லும் ஊழியர்கள், பொது மக்கள் ஆகியோர் சிரமப்படுகின்றனர். அங்கே போக்குவரத்து நெரிசல் குறைப்பதற்கு நடவடிக்கை எடுக்க வேண்டும். பொது மக்களின் நலன் கருதி, பரமக்குடி நகரின் அருகே உள்ள எஸ்.அண்டக்குடி ஊராட்சியில் நவீன வசதிகளுடன் புதிய பேருந்து நிலையம் அமைத்துத் தருமாறு முதலமைச்சர் அவர்களைக் கேட்டுக்கொள்கின்றேன்.
இந்த மாமன்றத்தில் எனக்கு பேச வாய்ப்பளித்த முதலமைச்சர் அவர்களுக்கு நன்றியினைத் தெரிவித்துக்கொள்கிறேன்.
என்னுடைய வெற்றிக்காக பாடுபட்ட கூட்டணிக் கட்சி நிர்வாகி களுக்கும், தொண்டர்களுக்கும், என்னை வெற்றிபெற செய்த பரமக்குடி சட்டமன்றத் தொகுதி வாக்காளர்களுக்கும் எனது நன்றியினை மீண்டும் தெரி வித்துக்கொள்கின்றேன்.
இவ்வாறு செ. முருகேசன் பேசினார்.