சென்னை, ஜூன் 6 –
முத்தமிழறிஞர் கலைஞர் நூற்றாண்டை யொட்டி கழக இளைஞர் அணி சார்பில் தமிழ்நாடு முழுவதும் அனைத்து சட்டமன்றத் தொகுதிகளிலும் ‘கலைஞர் நூலகம்’ அமைக்கப்பட்டு வருகிறது. இதுவரை 100 கலைஞர் நூலகங்கள் திறக்கப்பட்டு, பள்ளிக் குழந்தைகள் முதல் போட்டித்தேர்வுகளுக்கு தயாராகும் மாணவர்கள் வரை பலருக்கும் பயனுள்ள வகையில் செயல்பட்டு வருகின்றன.
இதில் சேப்பாக்கம்- திருவல்லிக்கேணி தொகுதியில் அமைக்கப்பட்டுள்ள கலைஞர் நூலகத்தில், கழக இளைஞர் அணி செயலாளர் துணை முதலமைச்சர் அவர்களின் வழிகாட்டுதலில், கலைஞர் நூலக மாணவர் வாசகர் சந்திப்பு, வட்ட வாரியாக நடைபெற்று வருகிறது. இதன் தொடர்ச்சியாக 04.06.2025 அன்று 119வது - வட்டத்திற்கான மாணவர் வாசகர் சந்திப்பு, சென்னை மேற்கு மாவட்ட இளைஞர் அணி சார்பாக நடைபெற்றது.
கழக இளம் பேச்சாளர் மு.ரோஜா அவர்கள் கலந்துகொண்டு, நமது திராவிட மாடல் அரசு கல்விக்கும் நாட்டின் வளர்ச்சிக்கும் கொடுக்கும் முக்கியத்துவம், அதனால் தமிழ்நாடு அடைந்த மாற்றங்கள் குறித்துப் பேசினார். “இயற்கைப் பேரிடராக இருந்தாலும், ஒன்றிய அரசின் திட்டப் (செயற்கை) பேரிடராக இருந்தாலும் சரி, தமிழ்நாடு எப்பொழுதும் முன்னெச்சரிக்கை நடவடிக்கை யில் சிறந்து விளங்குகிறது. இந்தித் திணிப்பு, புதிய கல்விக் கொள்கை, விஸ்வகர்மா போன்ற செயற்கைப் பேரிடர்களில் சிக்கிக் கொண்ட வடமாநில இளைஞர்கள் புலம்பெயர் தொழிலாளர்களாகவும், தினக் கூலிகளாகவும் பல மாநிலங்களில் பணியாற்றி வருகிறார்கள். அதேவேளையில் நம்முடைய இளைஞர்கள் பன்னாட்டு நிறுவனங்களில் உயர் பதவியில் பணியமர்த்தப் படுகிறார்கள். அதற்கு மிக முக்கியக் காரணமாய் விளங்குகிறார் நமது திராவிட மாடல் முதல்வர்” என்று மாணவர்களிடம் எடுத்துரைத்தார்.
வருகை தந்த மாணவர்களுக்கு நிகழ்ச்சியின்
நிறைவில், முத்தமிழறிஞர் பதிப்பகத்தின் வெளியீடான ‘திராவிட மாடல் அரசு’, ‘டாக்டர் கலைஞர்’ நூல்கள் வழங்கப்பட்டன.
சென்னை மேற்கு மாவட்ட இளைஞர் அணி அமைப்பாளர் வழக்கறிஞர் ப.பிரகாஷ், துணை அமைப்பாளர் வி.தினேஷ் குமார், திருவல்லிக்கேணி பகுதி துணை அமைப்பாளர்கள் கு.வெங்கடேஷ், புருஷோத்தமன், ஆர்.விக்னேஷ், செ.சதீஷ்குமார் உள்ளிட்டோர் இந்நிகழ்ச்சியில்
கலந்து கொண்டனர்.