#Title

3.09 லட்சம் ஏக்கர் சாகுபடி செய்யப்படுகிறது கடைமடை குறுவை சாகுபடிக்கு தேவையான தண்ணீர் உள்ளது! விவசாயிகள் மகிழ்ச்சி!

தஞ்சாவூர், ஜூலை 7–

டெல்டா பாசனத்திற்காக ஜூன்-12ஆம் தேதி மேட்டூர் அணையைமுதலமைச்சர் மு.க.ஸ்டாலின் அவர்கள் திறந்து வைத்தார். பின்னர், தஞ்சாவூரில் உள்ள கல்லணையையும் பாசனத்திற்காக திறந்து வைத்தார்.

இந்த நிலையில், காவிரி டெல்டா பாசனத்தில் உள்ள கடைமடை வரை தண்ணீர் செல்வதை தமிழ்நாடு அரசு உறுதி செய்யவில்லை என எடப்பாடி பழனிசாமி குற்றம்சாட்டினார். இந்த நிலையில், வேளாண் துறை வெளியிட்டுள்ள புள்ளி விவரம் வருமாறு:–

கடைமடைக்கு தண்ணீர் கிடைப்பதை திராவிட மாடல் அரசு உறுதி செய்துள்ளதும், குறுவை சாகுபடி பரப்பை 3.09 லட்சம் ஏக்கராக அதிகரித்துள்ளது. திருவாரூர், முத்துப்பேட்டை, கோட்டூர், திருத்துறைப்பூண்டி ஒன்றியங்கள் உள்பட திருவாரூர் மாவட்டத்தில், 43 ஆயிரத்து 620 ஏக்கரில் இருந்து 86 ஆயிரத்து 92 ஏக்கராக உயர்ந்துள்ளது.

தலைஞாயிறு மற்றும் வேதாரண்யம் உள்பட நாகப்பட்டினம் மாவட்டத்தில், ஆயிரத்து 279 ஏக்கரில் இருந்து 8 ஆயிரத்து 563 ஏக்கராக பாசனப் பரப்பு அதிகரித்துள்ளது. இதேபோல், பேராவூரணி, பட்டுக்கோட்டை, மதுக்கூர் உள்ளிட்ட தஞ்சை மாவட்டத்தில் 89 ஆயிரத்து 379 ஏக்கரில் இருந்து ஒரு லட்சத்து 2 ஆயிரத்து 880 ஏக்கராக உயர்ந்துள்ளது.

மேட்டூர் அணையின் நீர்மட்டம் இந்த ஆண்டில் 2 ஆவது முறையாக முழுக் கொள்ளளவான 120 அடியை எட்டி உள்ளதை சுட்டிக்காட்டி உள்ள வேளாண் துறை, கடைமடை பகுதிகள் வரை தண்ணீர் செல்வதை உறுதி செய்துள்ளது.

தண்ணீர் கடைமடை பகுதி வரை வந்துள்ளதால் விவசாயி கள் பெரும் மகிழ்ச்சியடைந்துள்ளனர்.