காஞ்சிபுரம், ஆக.8–
ரூ.115 கோடிமதிப்பில் கட்டப்பட்டுள்ள மாவட்டஅரசு தலைமை மருத்துவமனையை திறந்து வைக்கவும் - பல்லாவரத்தில் 20 ஆயிரம் ஏழை - எளியவர்களுக்கு ரூ.1700 கோடி மதிப்பிலான இலவச வீட்டுமனைப் பட்டாக்களை வழங்கிடவும் நாளை 9-ஆம் தேதி காலை வருகை தரும் முதல்வர் அவர்களுக்கு, பல்லாவரம் முதல் - தாம்பரம் வரை வழியெங்கும் மக்கள் திரண்டு நின்று எழுச்சியுடன் கோலாகலமான வரவேற்பு அளிக்க ஏற்பாடுகள் செய்யப்பட்டுள்ளதாகமாவட்ட தி.மு.க.செயலாளர் - அமைச்சர் தா.மோ.அன்பரசன் கூறியுள்ளார்.
இது குறித்து அவர் வெளியிட்டுள்ள அறிக்கை வருமாறு:-
நாளை ஆகஸ்ட் 9-ஆம் தேதி காலை 9.00 மணியளவில் ரூ.115 கோடி மதிப்பில் தாம்பரத்தில் புதிதாக கட்டப்பட்டுள்ள மாவட்ட அரசு மருத்துவமனை திறப்பு வழா மற்றும் கண்டோன்மெண்ட் பல்லாவரத்தில் 20 ஆயிரம் ஏழை - எளியவர்களுக்கு ரூ.1700 கோடி மதிப்பிலான இலவச வீட்டுமனைப்பட்டாக்கள் வழங்கிடும் மாபெரும் விழா நாளை 9-ஆம் தேதி காலை 10.00 மணியளவில் நடைபெற உள்ளது.
கழகத் தலைவர் - முதல்வர் தளபதி அவர்கள் இந்த இரு விழாக்களிலும் பங்கேற்று தாம்பரத்தில் அரசு தலைமை மருத்துவமனையை திறந்து வைத்து, பின்னர் அவர் ஆலந்தூர் தொகுதி, கண்டோன்மெண்ட் பழைய டிரங்க் சாலையில் அமைக்கப்பட்டுள்ள திடலில் நடைபெறும் விழாவில் பங்கேற்று 20,000 பேருக்கு இலவச வீட்டுமனை பட்டாவையும் வழங்கி பேருரை ஆற்றுகிறார்.
இம்மாபெரும் விழாவில் கலந்துகொள்ள தாம்பரம் மற்றும் பல்லாவரத்திற்கு வருகை தரும் நம்முடைய ஒப்பாரும் - மிக்காரும் இலா, நம் நெஞ்சம் நிறைந்த அன்புத் தலைவர் தமிழக முதல்வர் அவர்களுக்கு பல்லாவரம் பான்ட்ஸ் கம்பெனி பாலத்தில் இருந்து தாம்பரம் அரசு மருத்துவமனை வரை வழியெங்கும் கழகத்தினரும் - பொது மக்களும் ஆயிரக்கணக்கில் அணி திரண்டு நின்று கோலாகலமான வரவேற்பு அளிக்கப்பட உள்ளது.
அதேபோல தாம்பரம் அரசு தலைமை மருத்துவமனையை திறந்து வைத்துவிட்டு க.பல்லாவரத்திற்கு வருகை தரும் நம்முடைய உயிரனைய அன்புத்தலைவர் முதல்வர் அவர்களுக்கு கண்டோன்மெண்ட் பல்லாவரம் குன்றத்தூர் சாலை சந்திப்பு முதல் அரசு விழா நடைபெறும் பழைய டிரங்க் சாலை வரை பொதுமக்களும் - கழகத்தினரும் ஆர்ப்பரித்து நின்று உற்சாக வரவேற்பு அளிக்க உள்ளனர்.
இந்த இரு வரவேற்பு நிகழ்ச்சியிலும் மாவட்டம் முழுவதிலும் இருந்து கழகத்தினர் அனைவரும் பல்லாயிரக்கணக்கில் அலைகடலென திரண்டு வந்து மிகவும் எழுச்சியான முறையில் வரவேற்பு அளித்திட வேண்டும் என்று அன்புடன் அழைக்கிறேன்.
இவ்வரவேற்பு நிகழ்ச்சிகளில் பங்கேற்பது “நமது கடமை” “நமது உரிமை” என்ற அந்த லட்சிய உணர்வோடு கழகத்தினர் அனைவரும் தமது கரங்களில் கழக கொடியேந்தி அலைகடலென திரண்டுவாரீர் ! வாரீர் ! என்று அன்புடன் அழைக்கிறேன்.
இவ்வாறு அவர் அறிக்கையில் கூறியுள்ளார்.
முத்தமிழறிஞர் கலைஞர் அவர்களின் நினைவு நாளை முன்னிட்டு அவரது நினைவிடத்தில் நேற்று முத்தமிழறிஞர் கலைஞர் அவர்களின் செயலாளர் முனைவர் கி.இராஜமாணிக்கம் ஐ.ஏ.எஸ். (ஓய்வு) மற்றும் அவரது புதல்வர் இரா.அருள் செல்வன், கலைஞர் இல்ல உதவியாளர் சு.மோகன் ஆகியோர் மலரஞ்சலி செலுத்தினர்.