ஓ
ர் அரசியல் இயக்கத்தின் தலைவர், தான் ஈடுபட்ட ஒவ்வொரு துறையிலும் உச்சபட்ச சாதனையை நிகழ்த்தி இருக்கிறார் என்றால், உலக அளவில் குறிப்பிடத்தக்க ஒரே தலைவர் முத்தமிழறிஞர் டாக்டர் கலைஞர் அவர்கள் மட்டும்தான்.
அரசியல், இலக்கியம், சினிமா, பத்திரிக்கை என இயங்கிய துறைகளில் எல்லாம் தமது முத்திரையை பதித்தவர். அவர் படைப்புகளுக்கு ஈடு இணையில்லை என்று சொல்லும் அளவுக்கான உயரத்தை நிறுவி விட்டுச் சென்றிருக்கிறார் டாக்டர் கலைஞர்.
கலைஞர் தனது அரசியல் பயணத்தில் எண்ணற்ற சட்டங்களையும், திட்டங்களையும் தீட்டி தமிழ்நாட்டின்வளர்ச்சியில் நூற்றாண்டு ஆலமரமாய் நிறைந்தி ருக்கிறார்.
அவரது ஆளுமைத் திறன், நான் அறிந்தவரையில் மிக நுணுக்கமானது. அனைத்து வாய்ப்புகளிலும் சமூக நீதியை நிலைநாட்டுவதே அவரது இலக்காக இருந்தது. அதற்காக நுணுக்கமாக ஆராய்வார்.
பேரறிஞர் அண்ணா, தந்தை பெரியார் ஆகியோரை அறிந்து இருக்கிறோம். அவர்களுடனான அனுபவம் நமக்கு இல்லாமல் இருக்கலாம். ஆனால், அவர்கள் இல்லாத இடத்தை நிரப்பியது மட்டுமல்ல; அவருக்கென்றே ஒரு தனி இடத்தை உருவாக்கி, சமூகநீதி அரசியலை இன்னும் ஒரு நூற்றாண்டுக்கு முன்னெடுத்துச் சென்றவர் கலைஞர்.
என் அளவில், கலைஞர் அவர்களை மாபெரும் தலைவராக நான் பார்க்கிறேன். கலைஞரோடு பயணப்பட்டதன் அனுபவம் என்பது, பேரறிஞர் அண்ணா, தந்தை பெரியார் ஆகியோருடன் பயணப்பட்டது போன்ற அனுபவமாகும்.
கல்வி, வேலைவாய்ப்பு, பணியிடங்கள் என அனைத்து மட்டங்களிலும் சமூக நீதி வேண்டும் என அவர் கண்ட கனவுகள் தான் எத்தனை எத்தனை..
சமச்சீர் கல்வி அவர் ஆட்சிக் காலத்தில் கொண்டுவரப்பட்டது. காலமாற்றத்துக்கு ஏற்ற கல்வி குறித்த சிந்தனையை அவர்தான் முன்வைத்தார். எல்லோரும் சமமான கல்வி பயில வேண்டும்., சமமான வாய்ப்புகளை மணவர்கள் அடைந்திட வேண்டும்., என்ற குறிக்கோ ளுடன் கல்வியில் சிறந்த மாநிலமாகத் தமிழ்நாட்டை முன்னேற்றிட, புதிய சமசீர் பாடத்திட்டங்களை உருவாக்கினார். ஆனால், பின்னர் அதற்கு சிக்கல் வந்தபோது பதறினார். ஆம்.. அவரின் மாபெரும் கனவாக இருந்த சமச்சீர் கல்விக்கு ஆபத்து என்றபோது, உண்மையிலேயே அவர் வருத்தப்பட்டார். 2011 ஆம் ஆண்டில் சமச்சீர் கல்வி தொடர்பான வழக்கு தாக்கல் ஆனபோது, என்னை வழக்காடுமாறு பணித்தார்.
கழகத்தின் சார்பாக எண்ணற்ற வழக்குகளில் நான் வழக்காடி இருந்தாலும், கலைஞர் என்னை உச்சிமுகர்ந்து பாராட்டிய வழக்கு என்றால், சமச்சீர் கல்வி வழக்கில் பெற்ற வெற்றிதான் என் நினைவுக்கு வரும்.
அண்ணா நூற்றாண்டு நூலக வழக்கும் அப்படித்தான். அந்த வழக்கிற்காக அவர் பல ஆலோசனைகள் வழங்கியதுடன், பல தரவுகளையும் திரட்டித் தந்தார். வழக்கில் வெற்றி பெற்று திரும்புகிறோம். அண்ணா அறிவாலயத்தில் பத்திரிகையாளர்கள் கூட்டம். நான் அண்ணா அறிவாலயத்திற்கு சென்று தலைவருக்கு வணக்கம் வைக்கிறேன். “வாய்யா வின்சன்” என்று எனக்கு புதிய பெயர் சூட்டி அழைக்கிறார். என் பெயருக்கான அர்த்தம் மாபெரும் மதிப்புடன் அன்று உயர்ந்தது. அதனை என்றென்றைக்கும் என்னால் மறக்க முடியாது.
அதே போன்று, கழகத்தலைவர் தளபதியார் அவர்களின் தலைமையில், நான் பெற்ற முதல் வெற்றியே கலைஞருக்காகத்தான் என்று நெஞ்சம் நிமிர்த்தி சொல்லிக் கொள்வேன்... 2018 ஆம் ஆண்டு ஆகஸ்டு 7 அன்று முத்தமிழ் அறிஞர் கலைஞர் அவர்கள் மறைந்த நிலையில், மறுநாள் அதாவது ஆகஸ்டு 8 அன்று மெரினாவில் தம் அண்ணனுக்கு அருகில் அவர் துயில் கொள்வதற்கான இடத்தை சட்டப்போராட்டத்தின் வழியே உறுதி செய்து வெற்றி கண்டோம். அந்த வகையில் தமக்கான நீதியையும் போராடியே பெற்ற மாவீரர் அவர்..
சமூக நீதிக்குக் கேடு நேரும் பொழுதெல்லாம் அதனைத் தடுக்க தன்னால் இயன்ற அனைத்து வழிகளிலும் போராடியவர் அவர்..போராடியதோடு மட்டுமல்லாமல் அப்போராட்டத்தில் வெற்றி கண்டு சமூக நீதியை நிலை நிறுத்தியவர்.. அவருடைய வார்ப்பாகத்தான் இன்றைக்கு நம் கழகத்தலைவர் தளபதி அவர்கள் சமூகநீதி அரசியல் களத்தில் இந்தியாவிற்கே வழி காட்டிக் கொண்டிருக்கிறார்.
அந்த வகையில் இந்திய அரசியல் வரலாற்றில் சமூக நீதிச் சூரியனாய் முத்தமிழ் அறிஞர் டாக்டர் கலைஞர் அவர்களின் புகழ் என்றும் நிலைத்திருக்கும்.