#Title

திருச்செந்தூர் – திருத்தணி – மருதமலை மற்றும் வடலூர் வள்ளலார் தெய்வ நிலையத்தில் நடைபெற்று வரும் திருப்பணிகள்! அமைச்சர் பி.கே.சேகர்பாபு தலைமையில் ஆய்வுக் கூட்டம் நடைபெற்றது!

---------சென்னை, செப்.9–

இந்து சமய அறநிலையத்துறை அமைச்சர் பி.கே.சேகர்பாபு தலைமையில் நேற்று (08.09.2025) ஆணையர் அலுவலகத்தில் திருச்செந்தூர், திருத்தணி, மருதமலை திருக்கோயில்கள் மற்றும் வடலூர் திருஅருட்பிரகாச வள்ளலார் தெய்வ நிலையம் ஆகியவற்றில் ஒருங்கிணைந்த பெருந்திட்ட வரைவின்கீழ் (Master Plan) நடைபெற்று வரும் திருப்பணிகள் குறித்த சீராய்வுக் கூட்டம் நடைபெற்றது.

இக்கூட்டத்தில் இந்து சமய அறநிலையத்துறை அமைச்சர் திருச்செந்தூர், சுப்பிரமணிய சுவாமி திருக்கோயிலில் ரூ.306.35 கோடி மதிப்பீட்டிலும், திருத்தணி, சுப்பிரமணிய சுவாமி திருக்கோயிலில் ரூ.184.07 கோடி மதிப்பீட்டிலும், மருதமலை, சுப்பிரமணிய சுவாமி திருக்கோயிலில் ரூ.57.05 கோடி மதிப்பீட்டிலும் நடைபெற்று வரும் திருப்பணிகளில் நிறைவுற்ற பணிகள் தவிர்த்து இதர பணிகளின் முன்னேற்றம் குறித்தும், வடலூர், திருஅருட்பிரகாச வள்ளலார் தெய்வ நிலையத்தில் கட்டப்பட்டு வரும் வள்ளலார் சர்வதேச மையப் பணிகள் குறித்தும் விரிவான ஆய்வு மேற்கொண்டார்.

ஒருங்கிணைந்த பெருந்திட்ட வரைவின்கீழ், திருச்செந்தூர், சுப்பிரமணிய சுவாமி திருக்கோயிலில் ரூ.306.35 கோடி மதிப்பீட்டிலான பணிகளில் நிர்வாக அலுவலக கட்டடங்கள், அன்னதானக் கூடம், பக்தர்கள் தங்கு விடுதிகள், பக்தர்கள் வரிசைமுறை மண்டபம், முடிகாணிக்கை மண்டபம், கலையரங்கம், துணை மின்நிலையம், கழிவுநீர் சுத்தகரிப்பு நிலையம், சுகாதார வளாகம், சலவைக் கூடம், சஷ்டி மண்டபம், திருநீறு மற்றும் பஞ்சாமிர்தம் தயாரிக்கும் கூடம் உள்ளிட்ட பணிகள் நிறைவுபெற்றுள்ளன. சூரசம்ஹார கண்காட்சி கூடம், நாழிகிணறை மேம்படுத்தும் பணிகள், வெளிப்புற கழிவுநீர் குழாய்கள், பணியாளர் குடியிருப்பு மற்றும் வெளிப்புற மேம்பாட்டு பணிகள் முழுவீச்சில் நடைபெற்று வருகின்றன.

திருத்தணி, சுப்பிரமணிய சுவாமி திருக்கோயில் சார்பில் ரூ.184.07 கோடி மதிப்பீட்டில் அன்னதானக் கூடம், மூன்றாம் பிரகார ரதவீதி விரிவாக்கம், ஐந்து அடுக்கு இராஜகோபுரம், பக்தர்கள் வரிசைமுறை மண்டபம், பிரம்ம தீர்த்தம் மேம்பாட்டு பணிகள், பணியாளர் பயிற்சி மையம் மற்றும் பக்தர்களுக்கு அடிப்படை வசதிகளை மேம்படுத்தும் பணிகளும், கோவை மாவட்டம், மருதமலை, சுப்பிரமணிய சுவாமி திருக்கோயிலில் உபயதாரர் நிதி ரூ.1.86 கோடி மற்றும் திருக்கோயில் நிதி ரூ.55.19 கோடி என மொத்தம் ரூ.57.05 கோடி மதிப்பீட்டில் வசந்த மண்டபம், யாகசாலை, மடப்பள்ளி, பக்தர்கள் ஓய்வுக் கூடம், சுகாதார வளாகம், கழிவுநீர் சுத்திகரிப்பு நிலையம், கட்டணசீட்டு விற்பனை மையம், சாலை மேம்பாட்டு பணிகளும் மேற்கொள்ளப்பட்டு வருகின்றன.

மேலும், கடலூர் மாவட்டம், வடலூர், திருஅருட்பிரகாச தெய்வ நிலையத்தில் வள்ளலார் சர்வதேச மையம் அமைக்கும் பணிகளில் பிரிவு B-ல் ரூ.16.98 கோடி மதிப்பீட்டில் பக்தர்களுக்கான தங்குமிடங்கள், வைத்திய சாலை, முதியோர் இல்லம், சுகாதார வளாகம் மற்றும் சாலை மேம்பாட்டுப் பணிகள் மேற்கொள்ளப்பட்டு வருகின்றன.

இக்கூட்டத்தின் நிறைவாக, இந்து சமய அறநிலையத்துறை அமைச்சர் பேசுகையில், ஒருங்கிணைந்த பெருந்திட்ட வரைவின்கீழ் திருச்செந்தூர், திருத்தணி, மருதமலை திருக்கோயில்கள் மற்றும் வடலூர் திருஅருட்பிரகாச வள்ளலார் தெய்வ நிலையத்தில் சர்வதேச மையத்தில் அமைக்கும் பணிகளில் நிறைவுற்ற பணிகளை தவிர்த்து, இதர பணிகளை வரையறுக்கப்பட்ட நாட்களுக்குள் விரைந்து முடித்து பக்தர்களின் பயன்பாட்டிற்கு கொண்டு வரவேண்டும். இப்பணிகளில் சம்பந்தப்பட்ட திருக்கோயில்களின் அலுவலர்கள் மற்றும் பொறியாளர்கள் தனிகவனம் செலுத்தி அர்ப்பணிப்பு உணர்வுடன் பணியாற்றிட வேண்டும் என கேட்டுக் கொண்டார்.

இக்கூட்டத்தில் சுற்றுலா, பண்பாடு மற்றும் அறநிலையங்கள் துறை கூடுதல் தலைமைச் செயலாளர் மருத்துவர் க.மணிவாசன், இந்து சமய அறநிலையத்துறை ஆணையர் பி.என்.ஸ்ரீதர், கூடுதல் ஆணையர்கள் டாக்டர் சி.பழனி, திருமதி சி.ஹரிப்ரியா, பொ.ஜெயராமன், திருமதி கோ.செ.மங்கையர்க்கரசி, தலைமைப் பொறியாளர் பொ.பெரியசாமி, சிறப்புப் பணி அலுவலர் சி.லட்சுமணன், திருச்செந்தூர் திருக்கோயில் தக்கார் ஆர்.அருள்முருகன், திருத்தணி திருக்கோயில் அறங்காவலர் குழுத் தலைவர் ஸ்ரீதர், மருதமலை திருக்கோயில் தக்கார் ஜெயகுமார், கண்காணிப்பு பொறியாளர்கள் எஸ்.செல்வராஜ், எம்.பழனி, கே.சச்சிதானந்தம், இணை ஆணையர்கள் எஸ். ஞானசேகரன், திருமதி கே.ரமணி, திருமதி சி. ஜோதி, பி.ரமேஷ், அலுவலர்கள் மற்றும் பொறியாளர்கள் கலந்து கொண்டனர்.