#Title

க ல்வியை இல்லம் தேடிச் சென்று வழங்கிய திராவிட மாடல் ஆட்சியின் முதல்வருக்கு, பயனடைந்த மாணவச்செல்வங்கள் நன்றியுடன் நடத்திக் காட்டிய கண்களைக் குளமாக்கும் உணர்ச்சிமிகு நிகழ்ச்சிகள் அண்மையில் நடந்தேறின.

சென்னை நேரு உள்விளையாட்டு அரங்கத்தில் 25.9.2025 ஆம் நாள் தெலுங்கானா மாநில முதல்வர் ரேவந்த்ரெட்டி அவர்கள் சிறப்பு விருந்தினராகக் கலந்து கொண்ட “கல்வியில் சிறந்த தமிழ்நாடு” நிகழ்ச்சியில் தமிழ்நாடு . முதல்வர் முத்துவேல் கருணாநிதி ஸ்டாலின் அவர்களும், . துணை முதல்வர் உதயநிதி ஸ்டாலின் அவர்களும் மற்றும் அமைச்சர்களும், பல்துறை அறிஞர்களும், கலைத்துறை இயக்குனர்களும், நடிகர்களும், தமிழ்நாடு அரசின் உயர் அதிகாரிகளும், சமூக ஆர்வலர்களும் கலந்து கொண்டனர். இந்த நிகழ்ச்சியின் முக்கிய நோக்கம், சமூக-பொருளாதார ஏற்றத்தாழ்வற்ற அனைத்துக் குடும்பங்களைச் சார்ந்த அரசுப் பள்ளிகளில் பயிலும் இருபால் மாணவர்களுக்கும், விரும்பிய கல்வி கற்பதற்கும் வெளிநாடு சென்று கல்வி கற்பதற்கும், விளையாட்டுப் போட்டிகளில் கலந்து கொள்வதற்கான பயிற்சிகளில் பயிற்சி பெறவும், குடும்பங்களின் பொருளாதாரச் சூழ்நிலைகள் தடையாக இருக்குமாயின் அத்தகைய தடைகளைத் தகர்த்துவிட்டு விரும்பிய கல்வியை விளையாட்டுப் பயிற்சியை, விளையாட்டில் கலந்து கொள்ளும் வாய்ப்பை, விரும்பும் இடத்தில் பெறுவதற்கான வாய்ப்பினை உள்நாட்டிலும், வெளிநாட்டிலும் திராவிட மாடல் அரசு உருவாக்கும் என பிரகடனப்படுத்திய தோடு மட்டுமல்லாமல், அதற்கான செயல்திட்டங்களையும் திராவிட மாடல் ஆட்சியின் தலைவர் . தமிழ்நாடு முதல்வர் அவர்கள் அறிவித்தார்.

அப்படி அறிவிக்கப்பட்டத் திட்டங்கள்தான் “தமிழ்ப் புதல்வன்”, “புதுமைப்பெண்”, “நான் முதல்வன்” ஆகிய திட்டங்களாகும்.

இந்தத் திட்டங்களுக்கு இருபால் மாணவர்களை ஊக்குவிக்கும் உயர்ந்த நோக்கத்துடன், அறிவிக்கப்பட்ட “காலை உணவுத் திட்டம்” தொடக்கநிலையிலேயே வெற்றிகரமாகச் செயல்படுத்தப்பட்டு வருகிறது. இந்தத் திட்டம் பல மாநிலங்களுக்கு மட்டுமல்லாமல், வெளிநாடுகளுக்கும் திசை வழிகாட்டும், ஓர் கலங்கரை விளக்கமாகக் கருதப்படுகிறது. ஆம்! பின்பற்றவும்படுகிறது. இந்தத் திட்டங்களால் பன்முக ஆற்றலைப் பெற்று பயனடைந்த இருபால் மாணவர்களும் இந்த நிகழ்ச்சியில் கலந்து கொண்டு தங்களின் அபிலாசைகளையும், ஏக்கங்களையும், குடும்பச் சூழ்நிலைகள் மற்றும் ஏழ்மைக் காரணமாக கானல் நீராகிவிடுமோ என்ற துயரத்திலும், துன்பத்திலும் கண்களைக் குளமாக்கிக் கொண்டிருந்த சூழ்நிலையில், . தமிழ்நாடு முதல்வரின் கல்வி வளர்ச்சிக்கான திட்டங்களாக கருதப்படும் “நான் முதல்வன்”, “புதுமைப்பெண்”, “தமிழ்ப் புதல்வன்” ஆகிய திட்டங்களின் மூலம் அரசுப் பள்ளிகளில் படித்த இருபால் மாணவர்களுக்கும் உதவித்தொகை வழங்கப்பட்டதன் மூலம் ஏக்கப்பெருமூச்சுகளோடும், தங்களின் அபிலாசைகள் நிறைவேறுமா? என்ற கேள்விக்குறியோடும் தவித்துக்கொண்டிருந்த இருபால் மாணவர்களும், உதவித்தொகைகளைப் பெற்று, தங்களுடைய குறிக்கோள்களை வெற்றிகரமாக நிறைவு செய்தப்பின்னர் நேரு உள்விளையாட்டு அரங்கத்தில் நன்றி தெரிவிக்கும் முறையில் குழுமியிருந்த இருபால் மாணவர்கள் தெரிவித்த உணர்வுப்பூர்வமான வாழ்க்கைப் போராட்டத்தில், . தமிழக முதல்வரின் திட்டங்கள் எப்படியெல்லாம் தங்களுக்கு உதவிக்கரம் கொடுத்து தங்களது வெற்றியை உறுதி செய்தது என்பன போன்றச் செய்திகளை கண்ணீர்மல்க விளக்கிச் சொல்லிய இருபால் மாணவர்களின் சோக வரலாறு பார்வையாளர்களின் கண்களைக் குளமாக்கியது என்பதை என்னால் நேரடியாகவே காண முடிந்தது.

அரங்கத்திலே அமர்ந்திருந்த அனைவரும் இருபால் மாணவர்களின் இலக்கு நோக்கிய வெற்றிக்கு எப்படி திராவிட மாடல் ஆட்சியின் திட்டங்கள் பாதைகளாகவும், படிக்கட்டுகளாகவும் அமைந்தன என்பதை விளக்கிச் சொல்லும் பொழுது அரங்கத்தில் அமர்ந்திருந்த அனைவரின் கண்களிலும் கண்ணீர் வழிந்தோடியதைப் பார்க்க முடிந்தது. இந்த அளவிற்கு உணர்வுப்பூர்வமான திட்டங்களை நிறைவேற்றி, விரும்பிய கல்வி என்பது எட்டாக்கனி என்ற ஏங்கித்தவித்த ஏழை மாணவர்களுக்கு எவ்வளவு உயரத்தில் கல்வி எட்டாக்கனியாக இருந்தாலும், அதை ஏழை மாணவர்களின் கரங்களில் சேர்ப்பிக்கும் மனிதாபிமான செயல்களைச் செய்துக்காட்டிய . தமிழக முதல்வரையும், துணை முதல்வரையும் நோக்கி மன்றத்தில் அமர்ந்திருந்த அனைவரின் பார்வையும் நன்றியைத் தெரிவித்தது. அந்தப் பார்வை நிச்சயம் அந்த மகத்தான மனிதநேய தலைவர்களுக்கு நன்றி தெரிவிக்கும் பார்வையாகத்தான் அறிய முடிகிறது.

கல்வி என்பது குறிப்பிட்ட சமுதாயத்திற்கோ, வாய்ப்பு வசதியுள்ளவர்களுக்கோ மட்டும் உரித்தானதல்ல. மாறாக, எங்கோ மலைப்பகுதிகளில், காட்டுப் பகுதிகளில், போக்குவரத்து தொடர்பில்லாத குக்கிராமங்களில் வாழக்கூடிய, அன்றாடம் உழைத்து வாழக்கூடிய, அதுமட்டுமல்ல சமுதாயத்தின் அடித்தளத்தில் வாழ்க்கைப் போராட்டத்தை ஒவ்வொரு நொடிப்பொழுதும் நடத்திக்கொண்டிருக்கக் கூடிய சாதாரண, சாமானிய உழைப்பாளிகளின் வாரிசுகளுக்கும் கல்வி என்பது அவர்களது உரிமை. அந்த உரிமையை உறுதி செய்ய வேண்டிய கடமை மக்களாட்சிக்கு உண்டு என்பதை உணர்ந்து, அதனை தலையாயக் கடமையாகக் கருதி நிறைவேற்றிச் சாதனைப் படைத்த முதல் மாநிலம் தமிழ்நாடு என்பதையும் முதலமைச்சர் முத்துவேல் கருணாநிதி ஸ்டாலின் என்பதையும், வரலாறு பொன்னெழுத்துக்களால் பதிவு செய்திருக்கிறது!! இந்த நிகழ்வில் ஆய்வுக்குரிய முக்கியமான செய்தி எதுவெனில், மண்ணுக்குள் மட்டும் இயற்கை வளங்கள் பொதிந்து கிடக்கவில்லை. மாறாக, மனித மூளையின் அடுக்குகளுக்குள்ளே அறிவும், ஆற்றலும் புதைந்து கிடைக்கிறது! இந்த ஆற்றலும், அறிவும் ஜாதி, மதம், இனம் பார்த்து படிவதில்லை. மாறாக, எல்லா மனிதனிடமும் ஆற்றலும், அறிவும் வேறுபாடின்றி புதைந்து கிடக்கின்றது என்பதுதான் எதார்த்தம்!! எங்கோ வாழுகின்ற மனிதர்களாக இருந்தாலும், எப்படிப்பட்ட சூழ்நிலையில் வாழுகின்ற மனிதர்களாக இருந்தாலும் அவர்களது ஆற்றலை வெளிப்படுத்தும் வாய்ப்பும், வசதியும் கிடைக்குமானால், நிச்சயம் ஆற்றலும், அறிவும் தங்குதடையின்றி வெளிப்படும் என்பதில் ஐயமில்லை.

இந்த அறிவியல் பூர்வமான உண்மைகளை ஆய்ந்தறிந்த தமிழ்நாட்டின் முதல்வரும், துணை முதல்வரும் அறிவியல் பூர்வமான திட்டங்கள் மூலம் மேற்கொண்ட அகழாய்வின் வெளிப்பாடுதான் இந்தத் திறமைகள் என்பதையும், மாணவர்களிடமிருந்து இந்த ஆற்றலையும், திறமையையும் வெளிப்படுத்திய சமூக விஞ்ஞானிகள்தான் இவர்கள் என்பதையும் எதிர்கால சமுதாயம் மதிப்பீடு செய்துப் போற்றிப்பாராட்டும் என்பதில் கிஞ்சிற்றும் ஐயமில்லை.

துணை முதல்வர் விளையாட்டுத்துறையில் மேற்கொண்ட தனிகவனமும், அக்கறையும் தமிழ்நாட்டு இளைஞர்கள் விளையாட்டுப் போட்டிகளில் அகிலஇந்திய அளவிலும், உலக நாடுகள் அளவிலும் நடைபெறுகிறப் போட்டிகளில் குறிப்பிடத்தக்க விளையாட்டுகளில் முதலிடத்தில் வெற்றி பெறுகிறார்கள் என்றால், அதற்கான ஊக்கத்தையும், உத்வேகத்தையும், அதற்கான மற்ற வாய்ப்புகளையும், சூழ்நிலைகளையும் உருவாக்கித்தந்த பெருமை முதலமைச்சரையே சாரும் என்றால், அது எந்த வகையிலும் மிகையான கூற்றல்ல. இது மட்டுமல்ல, மாற்றுத்திறனாளிகள், திருநங்கைகள் இவர்களுக்கெல்லாம் சமூகத் தகுதியை வழங்கி கல்வி கற்றுக்கொள்வதற்கு வாய்ப்பினை உருவாக்கி அவர்களது திறமைகளை வெளிக்கொண்டு வந்து அவர்களுக்கான ஆற்றலையும், பெருமையையும் உருவாக்கித்தந்த தனிப்பெரும் கருணையுள்ளம் . தமிழக முதல்வருக்கும், துணை முதல்வருக்கும் நிரம்ப உண்டு என்பதை நம்மாலே அறிய முடிகிறது. மாற்றுத்திறனாளிகளும், திருநங்கைகளும் ஒரு காலத்தில் சமூகத்தால் புறக்கணிக்கப்பட்டவர்கள் என்பதை நாம்அறிவோம். ஆனால், திராவிட மாடல் ஆட்சி அப்படி புறக்கணிக்கப்பட்டவர்களுக்கெல்லாம், பாதுகாக்கின்ற சட்டங்களையும் அவர்களுக்கு சமூக அந்தஸ்தை வழங்கக்கூடிய கல்வி, வேலைவாய்ப்பு, விளையாட்டுப் போட்டிகளில் முன்னுரிமை ஆகியவைகளை வழங்கி, அவர்களுடைய திறமைகளை வெளிக்கொண்டுவந்த வரலாற்று நிகழ்வுகளும் இந்த திராவிட மாடல் ஆட்சியிலே தான் அரங்கேறியிருக்கிறது. இந்த நிகழ்ச்சி நடைபெற்றுக்கொண்டிருக்கின்ற ஒரு காலகட்டத்தில், ஈடுபாட்டுடன் உன்னிப்பாக கவனித்துக் கொண்டிருந்த முதல்வர் அவர்கள் ஒரு மாணவி தன்னுடைய பெற்றோரை விழிக்கும் பொழுது தன்னுடைய பெற்றோர் துப்புரவுத்தொழிலாளர்கள் என்று குறிப்பிட்டார். உடனடியாக, முதல்வர் அவர்கள் தலையிட்டு, துப்புரவுத்தொழி லாளர் என்று விழிக்க தேவையில்லை. மாறாக, தூய்மைப்பணியாளர்என்று குறிப்பிட வேண்டும் என்ற திருத்தத்தைத் தெரிவித்தார்.

இதிலிருந்து, முதலமைச்சரின் சிந்தனை எதுவெனில், வார்த்தைகளில்கூட அவர்கள் செய்யும் தொழிலுக்கு கலங்கத்தை உருவாக்கிவிடக் கூடாது. அதன் மூலம் தாழ்வுமனப்பான்மையையும் உருவாக்கக் கூடாது என்ற உளவியல் சிந்தனைதான் காரணம் என்பதை உணர முடிகிறது. எனவே, தமிழ்நாட்டின் முதல்வர் சிந்தனையிலும், செயலிலும் “எல்லோருக்கும் எல்லாம்” என்ற அடிப்படைக் கோட்பாட்டில் எள்ளின் முனையளவுக்கூட சேதம் ஏற்பட்டுவிடக்கூடாது என்பதில், அக்கறையோடும், ஆர்வத்தோடும் இருக்கிறார் என்பதுதான் இந்த நிகழ்வு உணர்த்தும் பாடமும், படிப்பினையுமாகும். இந்தத் திட்டத்தாலே பயன்பெற்ற இன்னொரு மாணவி, தான் ஆசிரியராக வேண்டும் என்ற விருப்பத்தை தெரிவித்தவுடன், அந்த மாணவியை அழைத்து தன் சட்டைப்பையிலேயிருந்த பேனாவை எடுத்து வழங்கி வாழ்த்துத் தெரிவித்தார். இன்னொரு மாற்றுத்திறனாளி ஒருவர் தன்னுடைய திருமணத்திற்கு துணை முதல்வர் வரவேண்டும் என்ற வேண்டுகோளை ஏற்றுத் துணை முதல்வர் தன்னுடைய சொந்த ஊருக்கே வருகைத்தந்து எங்களை வாழ்த்தினார் என்ற செய்தியை கண்ணீர்மல்க தெரிவித்த பொழுது, மன்றத்திலிருந்த அனைவரும் துணை முதல்வரைப் பாராட்டி மகிழ்ந்தனர். நிகழ்ச்சியின் ஒரு கட்டத்தில் முதல்வர் அவர்கள் இருபால் மாணவர்களுடைய வாழ்க்கைச் சூழ்நிலைகளையும், திராவிட மாடல் ஆட்சியின் திட்டப்பயன்கள் எந்த அளவிற்கு அவர்களது வாழ்க்கையில் மறுமலர்ச்சியை உருவாக்கியிருக்கிறது என்பதை எண்ணி, மகிழ்ந்து மாணவச்செல்வங்களையெல்லாம் பாராட்டினார்.

இந்த நிகழ்ச்சி என்பது, உணர்வுப்பூர்வமான ஒரு குடும்ப நிகழ்ச்சியாகவும், அந்த குடும்பத்தின் வாரிசுகள் பெற்ற வெற்றிகளைப் பாராட்டுகின்ற ஓர் வரலாற்று நிகழ்வாகவும்தான் அனைவராலும்மதிப்பீடு செய்யப்படுகிறது. இந்த நிகழ்ச்சிகள் ஒவ்வொரு மாவட்ட தலைநகரிலும் நடத்தப்பட வேண்டும் என்பதே கண்டோர் அனைவரின் விருப்பமும் எதிர்பார்ப்புமாகும்!