#Title

திராவிட இயக்கக் கொள்கைச் சிங்கம் இன்று, முரசொலி செல்வம் முதலாமாண்டு நினைவு நாள்! திருவுருவப் படத்திற்கு முதல்வர் மு.க.ஸ்டாலின் மலரஞ்சலி செலுத்துகிறார் !

சென்னை, அக். 10 –

பேரறிஞர் அண்ணாவின் அன்பில் திளைத்தவர், முத்தமிழறிஞர் கலைஞரின் நெஞ்சில் நீங்கா இடம் பிடித்தவர், முதல்வர் – கழகத் தலைவர் மு.க.ஸ்டாலின் அவர்களுக்கு உற்ற துணையாக பக்க பலமாக இருந்தவர். எல்லாவற்றிற்கும் மேலாக கழகத்தின் கேடயமாகத் திகழ்ந்தவர் மறைந்த முரசொலி செல்வம் அவர்கள்.

கடந்த ஆண்டு இதே நாளில் திடீரென இவ்வுலகை விட்டு அவர் நீங்கியபோது, கதறியழாத¬¬¬¬ கழக உள்ளங்களே இல்லை. அவர் பயன்படுத்திய பேனா மட்டுமல்ல அவரது எழுத்துக்களை சுவாசித்த அத்துணை நல் உள்ளங்களும் சொல்லொணா துயரில் ஆழ்ந்தன எனில் அது மிகையல்ல.

‘முரசொலி’யின்

35 ஆண்டுகால ஆசிரியர்!

முத்தமிழறிஞர் கலைஞரின் மூத்த பிள்ளையான ‘முரசொலி’யின் பணிகளைத் தன் தோளில் சுமந்துகொண்டு இளமைப் பருவம் முதலே திறம்படச் செயலாற்றியவர்.

தலைசிறந்த எழுத்தாளர் -– பத்திரிகையாளர் –- நூலாசிரியரான இவர், பத்திரிகைச் சுதந்திரத்தைப் பாதுகாத்த கருத்துரிமைப் போராளி.

கழகத்தின் போர்வாளான ‘முரசொலி’ நாளேட்டில் 35 ஆண்டுகளுக்கும் மேலாக ஆசிரியராகப் பொறுப்பேற்று தன் எழுத்துகளால் ஜனநாயகக் குரலாக ஒலித்தவர்.

கூண்டிலேறி கருத்துரைத்தவர்!

அடக்குமுறைக்கு அஞ்சாமல் சட்டமன்றத்தில் கூண்டிலேறி கருத்துரைத்தவர். தேர்தல் களம் முதல் திரைப்படப் பணிகள் வரை அனைத்துத் துறைகளிலும் முத்திரையைப் பதித்தவர். எந்த நிலையிலும் கழகமே மூச்சு என வாழ்ந்த ஆழமான கொள்கைவாதி.

‘சிலந்தி’ என்ற பெயரில் முரசொலியில் அவர் எழுதிய நையாண்டியும் நகைச் சுவையும் ததும்பும் கட்டுரைகள் கழகத்தின் இளைய தலைமுறையினருக்குக் கொள்கை இரத்தம் பாய்ச்சும் வலிமை கொண்டவை. தன் இறுதிமூச்சு நிற்கும் வரை முரசொலியில் கட்டுரை எழுதியவர்.

முரசொலியில் தன்னுடைய கட்டுரைகளைப் போலவே திராவிட இயக்கத்தின் இளைய எழுத்தாளர்களுடைய கட்டுரைகளைத் தொடர்ந்து பதிவு செய்து ஊக்குவித்தவர் அவர். தொலைக்காட்சி விவாதங்களில், சமூக வலை தளங்களில் கருத்துரைப்போரைத் தேடிக் கண்டறிந்து இயக்கத்தின் படைக்கலனாக மாற்றியவர்.

பண்பின் திருவுருவம்!

“சிறுவயது முதலே எனக்கு அண்ணனாக -– வழிகாட்டியாக, இயக்கப் பணி களில் ஆலோசனைகள் வழங்கி, நெருக்கடி நேரங்களில் தெளிவான தீர்வுகளை முன்வைத்து, கழகத்துடனான என் வளர்ச்சியில் தோளோடு தோள் நின்றவர். மிச்சமிருந்த தோளை நான் இழந்தேன். கழகத்தின் கொள்கைத் தூண் ஒன்றை நாம் இழந்தோம். “போய்விட்டீர்களே.. போர்முரசே.. திராவிட முரசொலித்த முரசொலி செல்வமே.. பண்பின் திருவுருவமே... திராவிட இயக்கத்தின் படைக்கலனே... கழகத்தின் கொள்கைச் செல்வமே.. நெஞ்சிலும் நினைவிலும் என்றும் நிலைத்திருப்பீர்!” என கழகத் தலைவர் முதல்வர் மு.க.ஸ்டாலின் அவர்கள் தனது இரங்கலில் குறிப்பிட்டிருந்தது நினைவு கூரத்தக்கது.