கேள்வி – பதில்கள்
சுப்பிரமணி, மணிகண்டம் ஒன்றியம்.
கேள்வி:`உங்களுடன் ஸ்டாலின்’ முகாமில் பெறப்பட்ட மனுக்கள் அனைத்துக்கும் முடிந்தவரை தீர்வு காண்பதன் மூலம் நமது வெற்றியை உறுதி செய்ய முடியுமா?
துணை முதலமைச்சர் :நம் சுப்ரமணியன் சொன்னது 100 சதவிகிதம் உண்மை. மக்களுக்கு அரசின் அனைத்து திட்டங்களும் சென்று சேர வேண்டும் என்ற ஒரே நோக்கத்தோடு ஆரம்பிக்கப்பட்டதுதான் `உங்களுடன் ஸ்டாலின்’ முகாம். இன்றைக்கு கிட்டத்தட்ட 10,000 முகாம்கள் நடத்த வேண்டும் என்ற இலக்குடன் ஆரம்பிக்கப்பட்டு, 8,000 முகாம்கள் வெற்றிகரமாக முடிக்கப்பட்டுள்ளன. என்னுடைய தொகுதியில் மட்டுமல்ல, சென்னையில் இருக்கின்ற பல்வேறு தொகுதிகளில், அந்த முகாம்கள் நடக்கும் பொழுது நானே நேரில் சென்று, ஆய்வுசெய்து இருக்கிறேன். நம் முதலமைச்சர் அவர்களும் ஆய்வுசெய்து இருக்கிறார்கள். ஒவ்வொரு சட்டமன்ற உறுப்பினரும் அவர்களின் தொகுதியில் அந்த முகாம் நடக்கும்போது, நேரில் சென்று, மக்களோடு பயணித்து முகாம்களை நடத்தி இருக்கிறார்கள். இந்த முகாம்களுக்கு மிகப்பெரிய வரவேற்பு கிடைத்திருக்கிறது. இந்த முகாமில் கொடுக்கப்படுகின்ற கோரிக்கைகள் முடிந்த அளவுக்கு தீர்வு காண அரசு தரப்பில், முதலமைச்சர் அவர்கள் தொடர்ந்து நடவடிக்கை எடுத்து வருகிறார்கள். இதுவரைக்கும் 8,200 முகாம்கள் முடிந்திருக்கின்றன. 18 லட்சம் மனுக்களில், 12 லட்சம் மனுக்களுக்கு தீர்வு காணப்பட்டுள்ளது. இந்தியாவிலேயே இதுவரை எந்த மாநில அரசும் செய்யாத ஒரு சாதனை. மேலும், நம் தலைவர் அவர்கள் அனைத்து அரசு அதிகாரிகளையும் தீர்வுகாண முடியாத மனுக்களுக்கு உரிய விளக்கம் அளிக்க வேண்டும் என்றும் அறிவுரை கொடுத்து இருக்கிறார்.
எஸ்.சிவசுப்பிரமணியன், திருவரங்கம் பகுதி, 1–வது வார்டு.
கேள்வி:பள்ளி மாணவர்களுக்கு இலவசமாக மடிக்கணினி வழங்கும் திட்டத்தை விரைவில் வழங்க வேண்டும் என்று தலைவருக்கு ஒரு ஆலோசனை கூறி இருக்கிறார்.
துணை முதலமைச்சர் :நம் அரசு ஆட்சிக்கு வந்த பிறகு, தமிழ்நாட்டை கல்வியில் எப்படி எல்லாம் உயர்த்த முடியுமோ, குழந்தைகளை எப்படி எல்லாம் பள்ளிக்கூடத்திற்கு வரவழைக்க முடியுமோ, பள்ளிக்கூடம் படிக்கின்ற குழந்தைகள் எப்படி எல்லாம் உயர் கல்விக்கு அனுப்ப முடியுமோ, அவர்களுக்கு எப்படி எல்லாம் வேலை வாய்ப்பு பெற்று தர முடியுமோ, அதையெல்லாம் முடிந்த அளவிற்கு செய்துகொண்டு இருக்கிறோம். புதுமைப் பெண் திட்டம், தமிழ்ப் புதல்வன் திட்டமெல்லாம் மாணவர்களின் கல்விக்காக உதவுகின்ற திட்டங்கள்.
அதேபோல்தான் முதலமைச்சரின் இலவச மடிக்கணினி வழங்கும் திட்டத்தை தலைவர் அவர்கள் அறிவித்தார். அதற்கு இந்த நிதியாண்டில் 2,000 கோடி ரூபாய் ஒதுக்கீடு செய்யப்பட்டுள்ளது. மடிக்கணினி வழங்குவதற்கான அடுத்தகட்ட பணிகள், நடைபெற்று வருகின்றன. இன்னும் இரண்டு மாதங்களில் நிச்சயம் மாணவர்களுக்கு மடிக்கணினி வழங்கும் திட்டத்தை, நம் தலைவர் அவர்களே துவங்கி வைப்பார்.
சார்லஸ், மணிகண்டன் ஒன்றியம்
கேள்வி:முத்தமிழறிஞர் கலைஞர் அவர்கள் மாதம் ஒரு முறையாவது கழகத் தொண்டர்களுக்குக் கடிதம் மூலமாக, தொடர்பில் இருப்பார். கழகத்தினருக்கு உற்சாகத்தை ஊட்டுவார். அதேபோல் நீங்களும் பணியாற்றுவீர்களா?.
துணை முதலமைச்சர் :உங்களின் கருத்து சிறப்பானது. ஆனால் கலைஞர் அவர்களுக்கு நிகர் கலைஞர் அவர்கள் மட்டும்தான். அவரைப் போல இன்னொரு தலைவர் கிடையவே கிடையாது. கண்டிப்பாக இந்த முன்னெடுப்புகளை எல்லாம், நம் தலைவரின் கட்டளையை ஏற்று, என்னால் முடிந்த வரை நிச்சயமாக செய்வேன் என்பதை இங்கே கூறிக்கொள்ள விரும்புகிறேன்.
சுந்தர்ராஜ், மணிகண்டம் ஒன்றியம்
கேள்வி:தலைவர் அவர்கள் ஒன்றிய அரசை எதிர்த்து, அவர்களுக்கு அடிபணியாமல் ஆட்சி செய்வது பற்றி….
துணை முதலமைச்சர் :நம் தலைவர் அவர்கள் தமிழ்நாட்டின் எந்த உரிமையையும் இழக்கக்கூடாது என்பதில் உறுதியாக இருக்கிறார். தொகுதி மறுவரையறையை ஒன்றிய அரசு கொண்டு வரும்போது, இந்தியாவிலேயே முதன் முறையாக நம் முதலமைச்சர் அவர்கள்தான் இப்படி ஒரு பிரச்சினை வரப்போகிறது. ஒன்றிய அரசு இதை திட்டமிட்டுள்ளார்கள் என்று ஆரம்பித்தார். அதன்பிறகுதான் மற்ற முதலமைச்சர்கள் எல்லாம் இவர் சொல்வது சரி என்று சொன்னார்கள். மற்ற முதலமைச்சர்கள் எல்லாம் தமிழ்நாட்டு முதலமைச்சர் என்ன சொல்கிறார், தமிழ்நாடு அரசு என்ன முடிவு எடுக்கிறது என்று பார்க்கிறார்கள். நீட் தேர்வு, வரி பகிர்வில் பாரபட்சம், சிறப்பு வாக்காளர் பட்டியல் திருத்தம், கல்விக்கான நிதி ஒதுக்குவது, ஒரே நாடு ஒரே தேர்தல், ஒன்றிய அரசு பட்ஜெட்டில் தமிழ்நாடு அரசுக்கு பாரபட்சம், இந்தித் திணிப்பு, தொகுதி மறுவரையறை இப்படி தமிழ்நாட்டு மக்களுக்கு எதிரான அனைத்து திட்டங்களையும் ஒன்றிய அரசு கொண்டு வரும்போது, நம் முதலமைச்சர் அவர்கள்தான் அதற்கு முதல் ஆளாக எதிர்த்து குரல் கொடுத்துக்கொண்டு இருக்கிறார்.
ஜெயச்சந்திரன், மணிகண்டம் ஒன்றியம்
கேள்வி:இளைஞர்களுக்கு கழகத்தில் கூடுதல் வாய்ப்புகள் வழங்க வேண்டும் ?
துணை முதலமைச்சர் :ஜெயச்சந்திரன் அவர்களுக்கு நன்றி. வட்டம், கிளை, பாகம் வாரியாக இன்றைக்கு இளைஞர் அணிக்கு அமைப்பாளர்கள், துணை அமைப்பாளர்களை நாங்கள் ஒவ்வொரு மாவட்டம் வாரியாக, மாவட்ட, ஒன்றிய, வட்டக் கழகச் செயலாளர்களின் பரிந்துரைப் பட்டியலை எடுத்துக்கொண்டு, நேர்காணல் நடத்தி, முரசொலியில் தினந்தோறும் அறிவிப்புகள் வந்துகொண்டு இருக்கின்றன. நிர்வாகிகள் தங்கள் குடும்பத்தில் உள்ளவர்களை கழகத்தில் முழுமையாக செயல்பட வைத்தாலே நமக்கு இணையான இளைஞர் ஆதரவு இருக்கின்ற கட்சி, இந்தியாவிலேயே இருக்காது. நம் வீட்டில் இருந்து இளைஞர்களை ஈடுபட வைக்க வேண்டும். நீங்கள் அனைவரும் உங்கள் பகுதியில் உள்ள இளைஞர்களிடம் சென்று கழக அரசின் சாதனைகளை அவர்களுக்கு ஞாபகப்படுத்த வேண்டும். பல இளைஞர்கள் நம் கழகத்தில் சேர்வதற்கு நீங்கள் உறுதுணையாக இருக்க வேண்டும். இளைஞர்களை மூத்த முன்னோடிகளாகிய நீங்கள் வழிநடத்த வேண்டும். அவர்களுக்கு இயக்கத்தின் கொள்கைகள், வரலாற்றைச் சொல்லித் தர வேண்டும்.
கனகராஜ், மணிகண்டம் ஒன்றியம்
கேள்வி:காலனி என்றச் சொல் இன்றும் பயன்பாட்டில் உள்ளது. அதை நீக்க உடனடியாக நடவடிக்கை மேற்கொள்ள வேண்டும் ?
துணை முதலமைச்சர் :`காலனி’ என்ற பெயரை மாற்ற, நம் தலைவர் அவர்கள்தான அரசாணை வெளியிட்டார்கள். எப்படி கலைஞரின் ஆட்சியில் சமத்துவப்புரத்தைக் கட்டி, அனைவரும் சமம் என்பதை உருவாக்கினாரோ, அதேபோல் இன்றைக்கு கலைஞர் வழியில் நம் தலைவர் அவர்கள் காலனி என்ற வார்த்தையை ஒழிப்பதற்கான அரசாணையை வெளியிட்டு இருக்கிறார்கள். விரைவில் நடவடிக்கைகள் மேற்கொள்ளப்படும் என்பதைத் தெரிவித்துக் கொள்கிறேன்.
மருதகுமார், அந்தநல்லூர் ஒன்றியம்
கேள்வி:கிளைச் செயலாளர்களை நீங்கள் அதிகம் ஊக்குவிக்க வேண்டும்.
துணை முதலமைச்சர் :நம் கழகத்தைச் சேர்ந்த எந்தவொரு நிர்வாகியும், கழகப் பணிகளில் சோர்வடைந்ததில்லை. சோர்வடைந்தால்தான் நான் சென்று ஊக்குவிப்பதற்கான வேலை வரும். நம் கழக நிர்வாகிகள் போன்று இந்தியாவில் எந்தவொரு கட்சியிலும் சிறப்பாக செயல்படக்கூடியவர்கள் கிடையாது. தற்போது வட்ட, கிளைக் கழகச் செயலாளர்களுடன் புகைப்படம் எடுத்துக்கொள்ள வேண்டும் என்பதற்காகத்தான், நானே உங்களைத்தேடி இங்க வந்துள்ளேன். தலைவர் அவர்களுக்கு வட்ட, கிளைச் செயலாளர்கள் மீது தனிப்பாசம் உண்டு. ஏனென்றால், நீங்கள்தான் கழகத்தின் ஆணிவேர். நீங்கள் இல்லை என்றால் இந்த இயக்கம் கிடையாது.
மனோகர், மணிகண்டம் ஒன்றியம்.
கேள்வி:கிளைக் கழகச் செயலாளர்களை 6 மாததுக்கு ஒரு முறையாவது நீங்கள் சந்திக்க வேண்டும்.
துணை முதலமைச்சர் :டாக்டர் கலைஞர், நம் தலைவர் அவர்களைப்போல தொடர்ந்து நானும் கிளை, வட்டக் கழகச் செயலாளர்களை சந்தித்து வருகிறேன். நீங்கள் எப்போது சென்னைக்கு வந்தாலும், நான் உங்களை சந்திப்பேன். இளைஞர் அணியின் தலைமை அலுவலகம், அன்பகத்தின் கதவுகள் திறந்தே இருக்கும். அடுத்த 5 மாதங்கள் பூத் கமிட்டி நிர்வாகிகளிலிருந்து, மாவட்டக் கழக நிர்வாகிகள் வரை அனைவரும் ஒவ்வொரு நாளும், ஒவ்வொரு மணித்துளியும் மிகமிக முக்கியம் என்பதை நீங்கள் உணர வேண்டும். நம் கழக ஆட்சி மீண்டும் அமைய வேண்டும் என்றால், நம் தலைவர் அவர்கள் தொடர்ந்து இரண்டாவது முறையாக முதலமைச்சர் நாற்காலியில் அமர வேண்டுமென்றால், நீங்கள் அத்தனைபேரும் இதே உணர்வோடும், எழுச்சியோடும் மக்களை சந்தித்து பிரச்சாரத்தை மேற்கொள்ள வேண்டும்.
தலைவர் அவர்கள் நாம் 200 தொகுதி வெற்றிபெற வேண்டும் என்று இலக்கு கொடுத்திருக்கிறார். நாம் அனைவரும் அடுத்த 5 மாதம் இந்தத் தேர்தல் பணியில் ஈடுபட்டோம் என்றால், 200 இல்லை 200–க்கும் அதிகமான தொகுதிகளில் நம் திராவிட முன்னேற்றக் கழக அணி நிச்சயம் வென்று காட்டும்.
இலக்கு 200 க்கு முதல் தொகுதியாக இந்த திருவரங்கம் தொகுதி நிச்சயமாக அமையும். அதை நீங்கள் செய்துகாட்ட வேண்டும். திருவரங்கம் மட்டுமல்ல, மத்திய மாவட்டத்துக்கு உட்பட்ட மூன்று தொகுதியிலும் சென்ற முறை வாங்கிய வாக்கு வித்தியாசத்தைவிட, இந்த முறை அதிகமான வாக்கு வித்தியாசத்தை நீங்கள் வாங்கி கொடுக்க வேண்டும். தலைவர் அவர்கள் உங்கள் மீது நம்பிக்கை வைத்துள்ளார். அந்த நம்பிக்கையை நீங்கள் நிறைவேற்றிக் காட்டுங்கள்.
இந்த சிறப்பான நிகழ்ச்சியை ஏற்பாடு செய்த முதன்மைச் செயலாளர் அண்ணன் நேரு அவர்களுக்கும், மாவட்டக் கழகச் செயலாளர்களுக்கும், வந்திருக்கின்ற அனைத்து சட்டமன்ற உறுப்பினர்களுக்கும், அனைத்து நிர்வாகிகளுக்கும், கலைஞரின் உடன்பிறப்புகள் அத்தனைபேருக்கும் நன்றி.
தமிழ்நாடு போராடும், தமிழ்நாடு வெல்லும்!