#Title

நெல் கொள்முதலுக்கான ஈரப்பத விதிமுறைகளை 17 சதவிகிதத்திலிருந்து 22 சதவிகிதமாக எப்போது தளர்த்தப் போகிறீர்கள்? மக்களவையில் தயாநிதி மாறன் கேள்வி!

புதுடெல்லி, டிச.12 –

தமிழ்நாடு குறுவை பருவத்தில் அதிக நெல் உற்பத்தி மற்றும் கொள்முதலில் சாதனை படைத்துள்ளதையடுத்து, விவசாயிகளின் நலன் கருதி நெல் கொள்முதலுக்கான ஈரப்பத அளவை 17 சதவிகிதத்திலிருந்து 22 சதவிகிதமாக உயர்த்தி விரைந்து ஆணை வழங்கிடவும், செறிவூட்டப்பட்ட அரிசி மணிகளின் மாதிரி எடுக்கும் அதிகாரத்தை தென்னிந்திய மாநிலங்களில் உள்ள இந்திய உணவுக் கழக அதிகாரிகளுக்கு வழங்குதல் உள்ளிட்ட பல்வேறு கோரிக்கைகளை வலியுறுத்தி முதலமைச்சர் மு.க. ஸ்டாலின் அவர்கள், இந்தியப் பிரதமர் நரேந்திர மோடி அவர்களுக்கு கடந்த மாதம் 11ஆம் தேதி கடிதம் எழுதியதை தொடர்ந்து நாடாளுமன்ற குளிர்கால கூட்டத்தொடரில் கழக நாடாளுமன்ற குழுத் துணைத்தலைவர் தயாநிதி மாறன் எம்.பி., நுகர்வோர் நலம், உணவு மற்றும் பொது விநியோகத் துறை அமைச்சருக்கு பல கேள்விகளை எழுப்பினார்.

அதில், குறுவைப் பருவத்திற்கான (Kharif 2025-2026) தமிழ்நாட்டின் நெல் கொள்முதல் இலக்கை 16 லட்சம் மெட்ரிக் டன்னிலிருந்து மாற்றி இதே குறுவை பருவத்தின் கடைசியில் கொள்முதல் செய்யப்படும் மொத்த நெல் அளவிற்கேற்ப அதன் இலக்கை ஒன்றிய அரசு மறு ஆய்வு செய்து திருத்தம் மேற்கொள்ளத் தயாரா? என கேள்வி எழுப்பினார். மேலும் கொள்முதல் இழப்புகளிலிருந்து தமிழ்நாட்டு நெல் விவசாயிகளைப் பாதுகாக்க ஒன்றிய அரசு உடனடியாக எடுத்து வரும் நடவடிக்கைகளின் விவரங்கள் என்ன? என்பன போன்ற பல கேள்விகளை எழுப்பினார்.

அதன் விவரங்கள் பின்வருமாறு :-

குறுவை பருவத்திற்கான (Kharif 2025-2026) தமிழ்நாட்டின் நெல் கொள்முதல் இலக்கை 16 லட்சம் மெட்ரிக் டன்னிலிருந்து மாற்றி இதே குறுவை பருவத்தின் கடைசியில் கொள்முதல் செய்யப் படும் மொத்த நெல் அளவிற்கேற்ப அதன் இலக்கை ஒன்றிய அரசு மறு ஆய்வு செய்து திருத்தம் மேற்கொள்ளத் தயாரா? மேலும் அதற்கான அங்கீகாரத்தின் தற்போதைய நிலை என்ன? ஏதேனும் தாமதம் இருந்தால் அதற்கான காரணங்கள் என்ன?

வடகிழக்குப் பருவமழையின் அவசரத் தேவையைக் கருத்தில் கொண்டு, நெல் கொள்முதலுக்கான ஈரப்பத விதி முறைகளை 17 சதவீதத்திலிருந்து 22 சதவீதமாகத் தளர்த்தக் கோரி தமிழ்நாடு அரசு விடுத்த கோரிக்கையை ஒன்றிய அரசு மறுபரிசீலனை செய்யுமா? மேலும், இந்தக் கோரிக்கையைப்பரிசீலிப்பதற்காக அனுப்பப்பட்ட ஒன்றிய அரசின் ஈரப்பதம்மதிப்பீட்டுக் குழுக்களின் (moisture assessment teams-MAT) பரிந்துரைகளின் தற்போதைய நிலை என்ன, அந்தக் குழுவின் பரிந்துரைகள் மீது எடுக்கப்பட்/எடுக்கப்படவுள்ள நடவடிக்கைகள் என்ன?

விவசாயிகளைப் பாதுகாக்கும் நோக்கில், கடந்த காலங்களில் வழங்கப்பட்டது போல, நெல் கொள்முதலுக்கான ஈரப்பதம் அளவைத் தளர்த்த வேண்டு மென்ற தமிழ்நாடு அரசின் கோரிக்கையை ஒன்றிய அரசு மறு பரிசீலனை செய்யுமா?

அவ்வாறு செய்தால், அதன் விவரங்களும், அதற்கு ஒன்றிய அரசின் பதிலும் என்ன?

ஊட்டச்சத்துக் கலக்கப்பட்ட அரிசி (Fortified Rice Kernel -FRK) வழங்குவதில், தமிழ்நாடு அரசு கோரியுள்ளபடி, மூட்டை அளவை 25 கிலோவிலிருந்து 50 கிலோவாக அதிகரிக்கவும்,மாதிரிப் பிரிவின் (Sample Lot Size) அளவை 10 மெட்ரிக் டன்னிலிருந்து (MT) 25 மெட்ரிக் டன்னாக திருத்தி அமைக்கவும் ஒன்றிய அரசு ஒப்புதல் அளிக்குமா? அவ்வாறு ஒப்புதல் அளித்தால் அதன் விவரங்கள் என்ன, தற்போதைய நிலுவை நிலை (Status of Pending Approval) என்ன?

கொள்முதல் இழப்புகளிலிருந்து தமிழ்நாட்டு நெல் விவசாயிகளைப் பாதுகாக்க ஒன்றிய அரசு உடனடியாக எடுத்து வரும் நடவடிக்கைகளின் விவரங்கள் என்ன?

இவ்வாறு தயாநிதி மாறன் எம்.பி. கேள்விகள் எழுப்பினார்.