புதுடெல்லி, டிச.12–
நாட்டில் சமீப ஆண்டுகளாக தொடக்கக் கல்வி மற்றும் உயர்நிலைக் கல்வி கற்கும் மாணவ, மாணவிகளிடையே இடைநிற்றல் அதிகமாக இருக்கிறதா? அதற்கு காரணம் என்ன? அதை சரி செய்ய ஒன்றிய அரசு மேற்கொண்ட நடவடிக்கைகள் என்ன? என்று மாநிலங்களவையில் தி.மு.க. எம்.பி. டாக்டர் கனிமொழி என்.வி.என். சோமு கேள்வி எழுப்பி இருந்தார்.
இதற்கு ஒன்றிய கல்வித்துறை இணையமைச்சர் ஜெயந்த் சௌத்ரி அளித்த பதில்:
ஒருங்கிணைக்கப்பட்ட கல்வித் தகவல் தொகுப்பில் 2020–21 முதல் 2024–25 வரையிலான ஐந்தாண்டுகால தகவல் மற்றும் தரவுகள்படி, நாடுதழுவிய அளவில் தொடக்கக் கல்வி, உயர் தொடக்கக் கல்வி மற்றும் உயர்நிலைக்கல்வி வரையிலான வகுப்பு களில் மாணவர்கள் இடைநிற்றல் நடந்துகொண்டுதான் இருக்கிறது.
வளர்ந்த மற்றும் பெரிய மாநிலங்களைப் பொறுத்தவரை, தமிழ்நாட்டில் தொடக்க மற்றும் உயர் தொடக்கக் கல்வி பயிலும் மாணவர்களிடையே இடை நிற்றல் என்பது சுமார் 2 சதவிகிதம்தான். சில ஆண்டுகளில் இடைநிற்றலே இல்லை என்ற அளவிலும் தமிழ்நாட்டில் நல்ல சூழல் இருக்கிறது. இதுவே மற்ற மாநிலங்களில் இடைநிற்றல் 8 சதவிகிதம் வரை இருக்கிறது. உயர்நிலைக் கல்வியைப் பொறுத்தவரை, பெரிய மாநிலங்களில் 30 சதவிகிதம் வரை இடைநிற்றல் நடக்கிறது. தமிழகத்தில் இது 6 முதல் 8 சதவிகிதமாக இருக்கிறது.
அதேபோல, பட்டியலின மாணவர்களிடையே இடைநிற்றல் தரவுகளைப் பார்த்தால், மற்ற மாநிலங்களில் 35 சதவிகிதம் வரை இடைநிற்றல் உள்ள நிலையில், தமிழகத்தில் இது 10 சதமாக இருக்கிறது.
கல்வி பொதுப் பட்டியலில் உள்ளது. மிகப் பெரும்பாலான பள்ளிகள் மாநில அரசுகளின் நிர்வாகத்தின் கீழ் வருகின்றன.ஆனாலும் மாநிலங்களுக்குசமக்ர சிக்ஷா திட்டத்தின்கீழ் நிதி உதவி வழங்கப்படு கிறது. பிரதமரின் போஷன் திட்டத்தின் கீழ் அங்கன்வாடி முதல் எட்டாம் வகுப்பு வரையிலான மாணவர்களுக்கு இலவச உணவு வழங்கப்படுகிறது.
இதுதவிர, இடைநிற்றலை முழுமையாகத் தடுக்கவும் பள்ளியில் சேரும் மாணவர்களின் எண்ணிக்கையை உயர்த்தவும், கூடுதல் பள்ளிகள் திறப்பது, பள்ளிகளின் உட்கட்டமைப்பை பலப்படுத்துவது, பள்ளிகளில் கூடுதல் வசதிகளை ஏற்படுத்துவது, தங்குமிட வசதிகளை அதிகரிப்பது, இலவச தொழிற்பயிற்சி, இலவச புத்தகங் கள், இலவச சீருடை வழங்கவும் தனியாக நிதி உதவி அளிக்கப்படுகிறது. சிறப்பு கவனம் தேவைப்படும் குழந்தை களுக்கு தனியாக நிதி மற்றும் உபகரண வசதிகளும் ஒன்றிய அரசால் வழங்கப்படுகிறது.
ஒன்றிய புள்ளியியல் மற்றும் திட்ட அமலாக்கத்துறையின் தரவுகள் மற்றும் வேலைக்கு அமர்த்தப்படுபவர்களின் பின்னணியை ஆராயும் வருடாந்திர அறிக்கையின்படி, பள்ளி செல்லும் குழந்தைகள் இடையிலேயே அதை விட்டுவிடும் நிலைக்கு பல காரணங்கள் உள்ளன.
பெற்றோருக்கு வரும் வருமானம் போதாமல், குழந்தைகள் வேலைக்குச் செல்வது, கல்வியில் ஆர்வம் இல்லாமை, வீட்டுச் சூழல் கல்வி இரண்டையும் ஒருங்கிணைத்து சமாளிக்க முடியாத நிலை, மாணவர்களின் ஆரோக்கிய குறைவு, குழந்தை களுக்கு கல்வி முக்கியம் என்பதை உணராத பெற்றோர் என பல விஷயங்கள் இந்த இடைநிற்றலுக்கு காரணங்களாக உள்ளன. இவற்றை நிரந்தரமாகக் களைய பல்வேறு அமைச்சகங்கள் மூலமாக தேவையான தொடர் நடவடிக்கைகளை ஒன்றிய அரசு எடுத்து வருகிறது.
இவ்வாறு அமைச்சர்ஜெயந்த் சௌத்ரி பதிலளித்தார்.