புதுடெல்லி, டிச. 12 –
நாடாளுமன்ற குளிர் கால கூட்டத் தொடர் 1.12.2025 அன்று தொடங்கியது. இத்தொடரில் மக்களவை, மாநிலங்களவைஇரு அவைகளிலும் கழக நாடாளுமன்ற உறுப்பினர்கள் தமிழ்நாட்டின் நலனுக்காக முன்னேற்றத்திற்காக நேற்று (11.12.2025) எழுப்பிய கேள்விகள் வருமாறு:
1. சிறு, குறு மற்றும் நடுத்தரத் தொழிற்துறை நிறுவனங்களுக்குபுத்துயிர் அளிக்க நடவடிக்கை என்ன?
ஆ. இராசா எம்.பி. கேள்வி
கடந்த ஐந்து ஆண்டுகளாக நெருக்கடியைச் சந்தித்து வரும் குறு, சிறு மற்றும் நடுத்தரத் தொழில்நிறுவனங்கள் துறைக்கு புத்துயிர் அளிக்க தற்போதுள்ள திட்டங்களின் விவரங்கள் குறித்து ஒன்றிய அரசிடம் மக்களவையில் திமுக துணைப் பொதுச் செயலாளர் ஆ. இராசா எம்.பி. கேள்வி எழுப்பியுள்ளார்.
குறு, சிறு மற்றும் நடுத்தரத் தொழில் நிறுவனத் துறைக்கு அவற்றின் நடைமுறை மூலதனத்திற்காக பிணையமில்லா காலக் கடன் வழங்க அரசு எடுத்துள்ள நடவடிக்கைகள் என்ன? குறு, சிறு மற்றும் நடுத்தரத் தொழில் நிறுவனங்கள் வளரவும், உலக அளவில் போட்டியிடவும் உதவும் வகையில், நிதி உதவி, ஒழுங்குமுறை மாற்றங்கள் மற்றும் தொழில்நுட்ப ஆதரவு ஆகியவற்றை உள்ளடக்கிய ஏதேனும் ஒரு தொகுப்புத் திட்டம் வகுக்கப்பட்டுள்ளதா? தமிழ்நாட்டில், எத்தனை குறு, சிறு மற்றும் நடுத்தரத் தொழில் நிறுவனங்கள் பயனடைந்துள்ளன, மற்றும் அதன் மூலம் உருவாக்கப்பட்ட வேலைவாய்ப்புகளின் எண்ணிக்கை யாது? உள்நாட்டுச் சந்தையிலும் உலக அளவிலும் அவற்றின் தயாரிப்புகளை சந்தைப்படுத்துவதை எளிதாக்குவதற்காக, பல்வேறு துறைகள் கொள்முதலில் முன்னுரிமைஅளிப்பது உட்பட, எடுக்கப்பட்ட நடவடிக்கைகளின் விவரங்கள் யாவை? எனவும் அவர் கேட்டுள்ளார்.
2.டெல்டா பகுதி விவசாயிகளின்மீது அக்கறை இல்லாத ஒன்றிய அரசு!
தஞ்சாவூர் முரசொலி எம்.பி. குற்றச்சாட்டு!
உணவுபதப்படுத்துதல் மற்றும் சேமிப்பை வலுப்படுத்த டெல்டா பகுதியின் விவசாயத் திறனைப்பயன்படுத்திக்கொள்ள ஒன்றிய அரசு நடவடிக்கை எடுக்காதது ஏன் என திமுக மக்களவை உறுப்பினர் முரசொலி கேள்வி எழுப்பியுள்ளார். விவசாய உற்பத்தித்திறனை மேம்படுத்தவும், அறுவடைக்குப் பிந்தைய இழப்புகளைக் குறைக்கவும் மற்றும் ஏற்றுமதி சார்ந்த பதப்படுத்துதலை ஊக்குவிக்கவும் முன்மொழியப்பட்ட நடவடிக்கைகளின் விவரங்கள் மற்றும் காலக்கெடு என்ன? விவசாய முக்கியத்துவம் வாய்ந்த டெல்டா பகுதியில் ஒன்றிய அரசின்போதிய ஊக்குவிப்பு இல்லாததற்கு காரணங்கள் என்ன என்றும் அவர் கேட்டுள்ளார்.
3. MSME நிறுவனங்களில் பூஜ்ஜிய குறைபாடு பூஜ்ஜியபாதிப்பு (ZED)திட்டத்தின்செயல்திறனை வெளியிடுக!
பெரம்பலூர் அருண் நேரு எம்.பி. கேள்வி
சிறு, குறு மற்றும் நடுத்தர நிறுவனங்க ளுக்கான நிலையான சான்றிதழ் திட்டம் தொடங்கப்பட்டதி
லிருந்து, பூஜ்ஜிய குறைபாடு பூஜ்ஜிய பாதிப்பு (ZED) உற்பத்தித் திட்டத்தின் கீழ் சான்றளிக்கப்பட்ட குறு, சிறு மற்றும் நடுத்தர நிறுவனங்களின் விவரங்கள் கேட்டு திமுக பெரம்பலூர் மக்களவை உறுப்பினர் அருண் நேரு கேள்வி எழுப்பியுள்ளார்.
மாநிலத்தில் உள்ள சிறு மற்றும் குறு நிறுவனங்களிடையே ZED தரநிலைகளை ஊக்குவிப்பதற்காக அரசாங்கத்தால் மேற்கொள்ளப்பட்ட நடவடிக்கைகள் என்ன என்றும் வழங்கப்பட்ட நிதி மற்றும் தொழில்நுட்ப உதவிகள் குறித்தும் அவர் கேட்டுள்ளார். நிறுவனங்களின் தயாரிப்புத் தரம், சுற்றுச்சூழல் நிலைத்தன்மை மற்றும் ஏற்றுமதிப் போட்டித்திறன் ஆகியவை குறித்தும் ZED திட்டத்தைச் செயல்படுத்துவதில் எதிர்கொள்ளப்படும் சவால்கள் குறித்தும் அருண் நேரு எம்.பி. அவர்கள் கேட்டுள்ளார்.
4.கள்ளக்குறிச்சியில் மேம்பட்ட தொழில் முனைவோர் திறன் மேம்பாட்டுத் திட்டத்தை செயல்படுத்த நடவடிக்கை என்ன?
கள்ளக்குறிச்சி மலையரசன் எம்.பி. கேள்வி
கள்ளக்குறிச்சி நாடாளுமன்றத் தொகுதியில் மேம்பட்ட தொழில்முனைவோர் திறன் மேம்பாட்டுத் திட்டத்தின் (E–SDP) தற்போதைய செயலாக்க நிலை, பயிற்சி மையங்களின் எண்ணிக்கை, நடத்தப்பட்ட திட்டங்கள், பயிற்சி பெற்றவர்கள் மற்றும் பயனடைந்த தொழில்முனைவோர்களின் எண்ணிக்கை உள்ளிட்ட விவரங்கள் குறித்து கள்ளக்குறிச்சி திமுக மக்களவை உறுப்பினர் மலையரசன் கேள்வி எழுப்பியுள்ளார்.
இத்திட்டத்தின் முக்கிய கூறுகள் மற்றும் பயிற்சி தொகுதிகள் யாவை? மேலும், வளர்ந்து வரும் தொழில்முனைவோர், புத்தொழில் நிறுவனங்கள் மற்றும் தொழில்நுட்பம் சார்ந்த நிறுவனங்களின் குறிப்பிட்ட தேவைகளைப் பூர்த்தி செய்ய இந்தத் தொகுதிகள் எவ்வாறு வடிவமைக்கப்பட்டுள்ளன? கள்ளக்குறிச்சி மக்களவைத் தொகுதியில் தொழில்முனைவோரை ஊக்குவித்தல், சுயவேலை வாய்ப்பை உருவாக்குதல் மற்றும் உள்ளூர் பொருளாதார மேம்பாடு ஆகியவற்றில் இத்திட்டத்தின் தாக்கம் என்ன? பயனாளிகளுக்குப் பயிற்சியின் தரத்தை மேம்படுத்தவும், வழிகாட்டுதலை வழங்கவும் மற்றும் நிதி உதவிகளுக்கான கோரிக்கைகளை பூர்த்தி செய்யவும் அரசை எளிமையாக அணுக செயல்திட்டங்கள் என்ன? மேம்பட்ட E–SDP திட்டத்தின் வெற்றி மற்றும் நிலைத்
தன்மையை கண்காணித்தல், மதிப்பீடு செய்தல் மற்றும் நீண்ட கால மதிப்பீடு செய்வதற்காகப் பின்பற்றப்படும் செயல்முறை என்ன? எனும் பல்வேறு கேள்விகளை அவர் எழுப்பியுள்ளார்.
5.தேசிய நெடுஞ்சாலைத் கட்டுமானங்களை கைவிடுகிறதா ஒன்றிய அரசு?
சேலம் செல்வகணபதி எம்.பி. கேள்வி!
2026ஆம் நிதியாண்டின் இறுதிக்குள் 10,000 கிலோமீட்டர் தேசிய நெடுஞ்சாலைத் திட்டங்களுக்கு ஒப்பந்தம் வழங்க அரசாங்கம் பரிசீலித்து வருகிறதா என சேலம் மக்களவை உறுப்பினர் செல்வகணபதி கேள்வி எழுப்பியுள்ளார். கடந்த மூன்று ஆண்டுகளில் ஒப்பந்தம் வழங்குவது 12,000 கிலோமீட்டரி லிருந்து 6,000 கிலோமீட்டராகக் கடுமையாகக் குறைந்துள்ளது ஏன் என்றும் ஒரு திட்டத்திற்கு ஒப்புதல் அளிப்பதற்கும் அது செயல்பாட்டிற்கு வரும் தேதிக்கும் இடையிலான காலத்தைக் குறைப்பதற்காக அரசாங்கம் எடுத்த நடவடிக்கைகள் என்ன என்றும் அவர் கேட்டுள்ளார்.
6. தமிழ்நாட்டில் SATAT திட்டத்தின்கீழ் CBG எரிவாயு ஆலைகளின் நிலை என்ன?
டாக்டர்.கலாநிதி வீராசாமி எம்.பி. கேள்வி
மலிவு விலை போக்குவரத்திற்கான நிலையான மாற்று வழி (SATAT) திட்டத்தின் கீழ், தமிழ்நாட்டில் இயங்கி வரும் ஆலைகளின் எண்ணிக்கை உட்பட, சுருக்கப்பட்ட உயிரி எரிவாயு (CBG) ஆலைகளை தற்போதைய நிலை என்ன என்று மக்களவையில் திமுக வடசென்னை உறுப்பினர் டாக்டர் கலாநிதி வீராசாமி கேள்வி எழுப்பியுள்ளார். இத்தகைய ஆலைகளை அமைப்பதற்கான அளவுகோல்கள் மற்றும் நடைமுறைகள் யாவை, மேலும் இந்தத் திட்டத்தின் கீழ் ஆதரவு பெற்ற தொழில்முனைவோர் மற்றும் அமைப்புகளின் எண்ணிக்கை என்ன? இந்த CBG ஆலைகள் புதுப்பிக்கத்தக்க எரிசக்தி உற்பத்தி, சுற்றுச்சூழல் நிலைத்தன்மை மற்றும் கிராமப்புற வளர்ச்சி ஆகியவற்றில் ஏற்படுத்தும் தாக்கம் என்ன? CBG ஆலைகளை அமைப்பதை விரைவுபடுத்தவும், இந்தத் திட்டம் பரவலாக ஏற்றுக்கொள்ளப்பட்டு வெற்றி பெறுவதை உறுதி செய்யவும் எடுக்கப்பட்டு வரும் நடவடிக்கைகள் என்ன? மேலும் பல CBG ஆலைகளை அமைப்பதற்காக விவசாயிகள் மற்றும் தொழில்முனைவோரிடையே விழிப்புணர்வையும் பங்கேற்பையும் ஊக்குவிக்க அரசாங்கம் எவ்வாறு திட்டமிட்டுள்ளது? எனும் பல்வேறு கேள்விகளை CBG ஆலைகள் குறித்து கலாநிதி வீராசாமி கேட்டுள்ளார்.
7. முறைசாரா தொழிலாளர்களின் நிரந்தர வருமானம் மற்றும் நலன் மேம்பட நடவடிக்கை என்ன?
ஆர்.கிரிராஜன் எம்.பி. கேள்வி
நாட்டின் மொத்த உள்நாட்டு உற்பத்தியில் ஏறக்குறைய 50% பங்களிக்கும் முறைசாரா தொழில் அமைப்புகளுக்கு முறையான பாதுகாப்பும் வாய்ப்புகளும் இல்லை என்பது குறித்து திமுக எம்.பி. ஆர். கிரிராஜன் மாநிலங்களவையில் கேள்வி எழுப்பியுள்ளார்.
முறைசாரா தொழிலாளர்களுக்காக ஒன்றிய அரசு கொண்டு வந்த ‘டிஜிட்டல் ஷ்ரம்சேது’ என்ற தேசியத் திட்டதின் தற்போதைய செயல்நிலை என்ன? முறைசாரா துறையில் நிதிப் பாதுகாப்பின்மை மற்றும் திறன் மேம்பாட்டுப் பயிற்சி இல்லாமை போன்ற சவால்களை எதிர்கொள்ள ஒன்றிய அரசு செயற்கை நுண்ணறிவு, பிளாக்செயின் மற்றும் அதிநவீன தொழில்நுட்பங்களைப் பயன்படுத்துகிறதா என்றும் நாட்டில் உள்ள முறைசாரா தொழிலாளர்களின் சராசரி ஆண்டு வருமானத்தை அதிகரிக்க அரசாங்கத்தால் எடுக்கப்பட்ட பயனுள்ள நடவடிக்கைகள்யாவை? என்றும் அவர் கேட்டுள்ளார்.