#Title

சேலம் மாவட்டத்தில் மாற்றுத் திறனாளிகளுக்கு ரூ.199.12 கோடியில் நலத்திட்டங்கள்! அமைச்சர் இரா.இராஜேந்திரன் பேச்சு!

சேலம், டிச.12–

தமிழ்நாட்டிலேயே சேலம் மாவட்டத்தில் தான் அதிக எண்ணிக்கையில் பெட்ரோல் ஸ்கூட்டர் வழங்கப்பட்டுள்ளது என்றும் கடந்த 4 1/2 ஆண்டுகளில் மாற்றுத்திறனாளிகளுக்கென சேலம் மாவட்டத்தில் மட்டும் ரூ.199.12 கோடி மதிப்பிலான பல்வேறு நலத்திட்டங்கள் செயல்படுத்தப்பட்டுள்ளன என்றும் அனைத்து நாடுகள் மாற்றுத்திறனாளிகள் தின விழாவில் 143 பயனாளிகளுக்கு ரூ.1 கோடி மதிப்பிலான நலத்திட்ட உதவிகளை வழங்கி சுற்றுலாத்துறை அமைச்சர் இரா.இராஜேந்திரன் தெரிவித்தார்.

------------------------------------------------------------------------------------------------------------------------------------------------------------------------------------------- சுற்றுலாத்துறை அமைச்சர் இரா.இராஜேந்திரன் தலைமையில் அனைத்து நாடுகள் மாற்றுத்திறனாளிகள் தின விழா சேலம், தொங்கும் பூங்கா பல்நோக்கு அரங்கில் மாவட்ட ஆட்சித்தலைவர் டாக்டர் இரா.பிருந்தாதேவி, முன்னிலையில் நடைபெற்றது.

இந்நிகழ்ச்சியில் சுற்றுலாத்துறை அமைச்சர் இரா.இராஜேந்திரன் பேசியதாவது:

முத்தமிழறிஞர் கலைஞர் அவர்கள் மாற்றுத்திறனாளிகள் மீது அக்கறையோடு பல்வேறு திட்டங்களை நிறைவேற்றி தந்திருக்கிறார்கள். அதேபோன்று, தமிழ்நாடு முதலமைச்சர் அவர்கள் மாற்றுத்திறனாளிகள் நலத்துறையினை தனது நேரடிக்கட்டுப்பாட்டின் கீழ் வைத்து அவர்களின் நலனுக்காக பல்வேறு நலத்திட்டங்கள் செயல்படுத்தி வருகிறார்.

மாற்றுத்திறனாளிகளின் உரிமைகளை பாதுகாத்து, சமுதாயத்துடன் இணைந்து வாழ மக்களிடையே விழிப்புணர்வு ஏற்படுத்தும் விதமாக ஒவ்வொரு ஆண்டும் டிசம்பர் 3ஆம் நாள் உலக மாற்றுத்திறனாளிகள் தினம் கடைப் பிடிக்கப்படுகிறது. அந்த வகையில் “தடைகளை தகர்ப்போம் அனைவரையும் உள்ளடக்கிய சமுதாய வளர்ச்சி பாதை அமைப்போம்” என்ற இலட்சிய நோக்குடன் இந்த நலத்திட்ட உதவிகள் வழங்கும் நடைபெற்று வருகிறது. மாற்றுத்திறனாளிகள் நலன் காப்பதில் முன்மாதிரி அரசாக தமிழ்நாடு அரசு உள்ளது. இந்தியாவிலேயே முதன் முதலாக மாற்றத்திறனாளிகளை உள்ளாட்சிகளில் நியமனம் செய்யப்பட்டுள்ளனர்.

மாற்றுத்திறனாளிகள் நலத்துறை மூலம் சேலம் மாவட்டத்தில் 15,264 நபர்கள் மாதம் ரூ.2000 ஓய்வூதியமாக பெற்று பயனடைந்து வருகின்றனர். குறிப்பாக, சேலம் மாவட்டத்தில் இதுவரை 83,645 மாற்றுத்திறனாளிகளுக்கு அடையாள அட்டை வழங்கப்பட்டுள்ளது. சுய தொழில் புரிய ஆர்வமுள்ள 18 வயது முதல் 45 வயது வரை உள்ள மாற்றுத்திறனாளிகளுக்கு ரூ. 75,000 வங்கிக் கடன் ரூ.25,000 மானியத்துடன் வழங்கப்படுகிறது.

மேலும், கல்வி உதவித் தொகை, பட்டப்படிப்பு உதவித் தொகை, திருமண நிதி உதவி மற்றும் 8கிராம் தங்கம் வழங்கப்படுகிறது. அரசு பேருந்தில் மாற்றுத் திறனாளிகளுக்கான 75% இலவச பேருந்து கட்டண சலுகையும், கல்வி நிறுவனங்களில் 5% இட ஒதுக்கீடும், அரசுத்துறை மற்றும் அரசு நிறுவனங்களில் 4 % இட ஒதுக்கீடும் வழங்கப்படுகிறது. மூன்று சக்கர வாகனம் பெட்ரோல் ஸ்கூட்டர், பேட்டரியால் இயங்கும் சக்கரநாற்காலி, பார்வை குறைபாடு உள்ள மாற்றுத் திறனாளிகளுக்கு கருப்பு கண்ணாடிகள், காதொலிக் கருவிகள். கால் தாங்கிகள் ஊன்றுகோள்கள் என உதவி உபகரணங்கள் வழங்கப்பட்டு வருகிறது.

தொடர்ந்து 5 லட்சம் வரை முதலமைச்சரின் விரிவான மருத்துவ காப்பீடு திட்டமும், தமிழ்நாட்டிலேயே சேலம் மாவட்டத்தில் தான் அதிக எண்ணிக்கை பெட்ரோல் ஸ்கூட்டர் வழங்கப்பட்டுள்ளது. கடந்த 4% ஆண்டுகளில் சேலம் மாவட்டத்தில் 2,05,491 பயனாளிகளுக்கு ரூ.199.12 கோடி மதிப்பீட்டில் நலத்திட்ட உதவிகள் வழங்கப்பட்டுள்ளது. இன்றைய தினம் நடைபெற்று வரும் இவ்விழாவின் மூலம் இணைப்புச்சக்கரம் பொருத்தப்பட்ட பெட்ரோல் ஸ்கூட்டர், பேட்டரியால் இயங்கும் சிறப்பு வகை சக்கர நாற்காலி, பேட்டரியால் இயங்கும் சக்கர நாற்காலி, மோட்டார் பொருந்திய தையல் இயந்திரம் என மொத்தம் 143 மாற்றுத் திறனாளி களுக்கு ரூ.1 கோடியே 43 ஆயிரம் மதிப்பில் நலத்திட்டஉதவிகள் வழங்கப்படுகிறது.

தமிழ்நாடு முதலமைச்சர் அவர்களால் செயல்படுத்தப்பட்டுவரும் இத்தகைய நலத்திட்ட உதவிகளைப் பெற்றுள்ள பயனாளிகள் இதை பயன்படுத்தி தங்கள் வாழ்வில் மென்மேலும் முன்னேற்றம் அடைய வேண்டுமென கேட்டுக்கொள்கிறேன்.

இவ்வாறு சுற்றுலாத் துறை அமைச்சர் இரா.இராஜேந்திரன் பேசினார்.

இதனைத்தொடர்ந்து, சுற்றுலாத்துறை அமைச்சர் இரா.இராஜேந்திரன், அனைத்து நாடுகள் மாற்றுத்திறனாளிகள் தின விழாவையொட்டி மாற்றுத்திறனாளிகளுக்கென மாவட்ட அளவில் நடத்தப்பட்ட பல்வேறு விளையாட்டுப் போட்டிகள் மற்றும் ஓவியப்போட்டிகளில் வெற்றி பெற்றவர்களுக்கு பரிசு மற்றும் பாராட்டுச்சான்றிதழ்களும், மாற்றுத்திறனாளி களுக்காக சிறப்பாக சேவைபுரிந்து வரும் சிறப்பு பள்ளிகள் மற்றும் தன்னார்வ தொண்டு நிறுவனங்களைப் பாராட்டி நினைவு பரிசுகளை வழங்கினார்கள்.

முன்னதாக சென்னையில் 03.12.2025 அன்று நடைபெற்ற அனைத்து நாடுகள் மாற்றுத்திறனாளிகள் தின விழாவில் சிறப்பான ஓவியத்திற்கான முதல் பரிசு பெற்று முதலமைச்சர்அவர்களிடம் ரூ.10,000த்திற்கான காசோலை மற்றும் பாராட்டுச் சான்றிதழ்களை பெற்ற மாணவர்கள் அமைச்சர் இரா.இராஜேந்திரனிடம் வாழ்த்துப் பெற்றனர்.

இந்நிகழ்ச்சியில், மாநகராட்சி மேயர் ஆ.இராமச்சந்திரன், சேலம் மேற்கு சட்டமன்ற உறுப்பினர் இரா.அருள், மாவட்ட மாற்றுத்திறனாளிகள் நல அலுவலர் திருமதி செண்பகவள்ளி, மாற்றுத்திறனாளிகள் நல சங்கத் தலைவர் அத்தியண்ணா உள்ளிட்ட தன்னார்வலர்கள், மாற்றுத்திறனாளிகள் கலந்து கொண்டனர்.