சென்னை, ஜன.1–
‘தினகரன்’ நாளேட்டின் நேற்று திராவிட மாடல் என்ற தலைப்பிட்டு தலையங்கம் எழுதியுள்ளது.
அத்தலையங்கத்தில் முதல்வர் மு.க.ஸ்டாலின் பெண்களுக்கான திட்டங்களை நிறைவேற்றியதால் அவர் செல்லுமிடமெல்லாம் பெண் சக்திகள் திரண்டு வரவேற்கிறார்கள் என்று பெருமிதத்துடன் குறிப்பிட்டுள்ளது.
‘தினகரன்’ நாளேட்டின் நேற்றைய தலையங்கம் வருமாறு:–
பெண்களுக்கு அதிகாரம் அளிப்பது தான் திராவிட மாடல். பெண் சக்தியை ஆக்கப்பூர்வமாக பயன்படுத்துவதும், அவர்கள் உழைப்புக்கு அங்கீகாரம் அளிப்பதும், அவர்களின் உயர்கல்வியையும், வேலை வாய்ப்பையும் முதன்மையாக கொண்டு செயல்படுவதும்தான் முதல்வர் மு.க.ஸ்டாலின் ஆட்சியின் சிறப்பு அம்சம். அதை நோக்கியே அவர் நடைபோடுகிறார். அந்த இலக்கை நோக்கித்தான் இந்த நான்கரை ஆண்டுகள் ஆட்சி நடந்துள்ளது. அதனால் தான் முதல்வர் மு.க.ஸ்டாலின் போகும் இடம் எல்லாம் பெண் சக்தி அவரை திரண்டு வரவேற்கிறது, கொண்டாடுகிறது.
பெண்கள் படிக்கக் கூடாது, அடுப்படியை தாண்டி செல்லக்கூடாது, ஆண்களை சார்ந்து மட்டுமே இருக்க வேண்டும் என்று இருந்த சமூகத்தின் தடைகளை எல்லாம் உடைத்தது திராவிட மாடல் தான். தேவதாசி முறை ஒழிப்பு, பெண்களுக்கு சொத்துரிமை, பெண்களின் கல்வி உரிமை என அதிக அளவு உரிமை இந்தியாவில் மற்ற மாநிலங்களை விட தமிழ்நாட்டில் திராவிட மாடல் ஆட்சியில் வழங்கி இருப்பதால் தான் பெண்களின் முன்னேற்றம் பலமடங்கு உயர்ந்துள்ளது. உள்ளாட்சி அமைப்புகளில் பெண்களுக்கு 50 சதவீத இடஒதுக்கீடு, தமிழ்நாட்டில் அதிக பெண் மேயர்கள் என சமூகத்தை மாற்றி இருக்கிறது மு.க.ஸ்டாலின் தலைமையிலான அரசு. சட்டமன்றத்திலும், நாடாளுமன்றத்திலும் ஆண்களுக்கு நிகராக பெண்களுக்கும் சமஅதிகாரம் வழங்கும் சட்டத்தையும் அமல்படுத்த போராடி வருகிறது தி.மு.க.
கலைஞர் மகளிர் உரிமைத்தொகை, மகளிர் விடியல் பயணம், புதுமைப் பெண் திட்டம் என முதல்வர் மு.க.ஸ்டாலினின் திராவிட மாடல் ஆட்சியில் பெண்கள் நலனுக்காக கொண்டு வரப்பட்ட திட்டங்கள் ஏராளம். 1989ல் மகளிர் சுயஉதவி குழு துவங்கி, இப்போது 1 லட்சத்து 39 ஆயிரத்து 560 கோடி ரூபாய் கடன் வழங்கி சாதித்ததும் திராவிட மாடல் அரசுதான். பணிபுரியும் பெண்கள் தங்குவதற்காக இதுவரை 19 தோழி விடுதிகள் உருவாக்கப்பட்டு, பணியிடங்கள் மட்டுமல்லாமல் தங்கும் இடமும் பாதுகாப்பானதாக மாற்றி சாதித்து இருக்கிறது முதல்வர் மு.க.ஸ்டாலின் தலைமையிலான அரசு.
பெண்களுக்கான திட்டங்களை, திராவிட மாடல் அரசு போன்று, வேறு எந்த அரசும் செய்திருக்க முடியாது. பெண்களின் வாக்கு வங்கியை நோக்கி அல்ல, அவர்களது வளர்ச்சியை நோக்கி நகர்ந்து கொண்டு இருக்கிறது முதல்வர் மு.க.ஸ்டாலின் அரசு. 2026 சட்டப்பேரவைத் தேர்தலில் வெற்றி பெற்றாலும் பெண்களுக்கான ஆட்சியாகத்தான் திராவிட மாடல் ஆட்சி இருக்கும் என்று உறுதி அளித்திருக்கிறார் முதல்வர். ஆனால் நாட்டின் பெண்கள் அதிகம் பயன்பெற்ற 100 நாள் திட்டத்தை குழிதோண்டி புதைத்து இருக்கிறது ஒன்றிய பா.ஜ அரசு. 125 நாள் வேலை என்று ஆசை காட்டி நிதிச்சுமையை மாநில அரசுகள் மீது சுமத்தி, திட்டங்கள் ஒதுக்கும் அதிகாரத்தை டெல்லியில் வைத்துக்கொண்டு 100 நாள் வேலைத் திட்டத்திற்கு மூடுவிழா நடத்தியிருக்கிறது மோடி அரசு.
இன்னும் சொல்லப்போனால் மும்மொழி கொள்கையை ஏற்கவில்லை என்ற ஒரே காரணத்திற்காக தமிழ்நாட்டிற்கான கல்வி நிதியை மறுத்து இருக்கிறது ஒன்றிய அரசு. அவர்கள் தான் காசி தமிழ்சங்கம் நடத்தி ராமேஸ்வரத்தில் நிறைவு விழா நடத்தி இருக்கிறார்கள். அந்த விழாவுக்கு வந்த ஒன்றிய கல்வி அமைச்சர் தர்மேந்திரபிரதான், ஒன்றிய அரசின் மும்மொழிக்கொள்கையை தமிழ்நாட்டு மக்கள் ஏற்றுக்கொண்டு விட்டார்கள் என்றுகதை விட்டுக் கொண்டு இருக்கிறார். தமிழ்நாடுஅவர்களை இன்னும் உள்ளே விடாமல் இருப்பதற்கும் காரணம் புரிகிறது, திராவிட மாடல் ஆட்சியின் வெற்றியின் மகத்துவமும் இதன் மூலம் தெரிகிறது.
இவ்வாறு ‘தினகரன்’ நாளேடு தலையங்கத்தில் குறிப்பிடப்பட்டுள்ளது.
தூத்துக்குடி மாவட்டம் - விளாத்திகுளம் ஊராட்சி ஒன்றியம், குளத்தூர் ஊராட்சி, இராமச்சந்திராபுரம் கிராமத்தில் பகுதி நேர நியாய விலைக்கடை கட்டிடத்தினை விளாத்திகுளம் சட்டமன்ற உறுப்பினர்,ஜீ.வி. மார்க்கண்டேயன் திறந்து வைத்தார்.நிகழ்வில் விளாத்திகுளம் ஒன்றிய செயலாளர்கள் சின்னமாரிமுத்து, இம்மானுவேல், உள்ளிட்ட கழக நிர்வாகிகள், பொதுமக்கள் கலந்து கொண்டனர்.