சென்னை, பிப்.2–
“கழகத் தலைவர் – முதல்வர் மு.க.ஸ்டாலின் அவர்கள் தலைமையில், நாளை நடைபெறும், அண்ணா நினைவு நாள் அமைதிப் பேரணியில், சென்னை தெற்கு மாவட்டக் கழகத்தினர் பெருந்திரளாகப் பங்கேற்பீர்!” என, மாவட்டச் செயலாளர் – அமைச்சர் மா.சுப்பிரமணியன் வேண்டுகோள் விடுத்துள்ளார்.
அவரது அறிக்கை வருமாறு:–
“ஆற்றோரத்திலே ஆடுமேய்த்து, மலைச்சரிவிலே, மாடு மேய்த்து மானையும், பன்றியையும், வெட்டித்தின்று நெருப்பையும்,நீரையும் கும்பிட்டு சோமரசமும், சுராபானமும் பருகி, பவுண்டரீக யாகமும், பிறவும் செய்து கிடந்த கூட்டம், கோட்டைகளைத் தகர்த்து ,கொத்தளங்களைத் தூளாக்கி, படைபல வென்று, தடைபலத் தகர்த்து , தன்மானத்தையே, தரணி வாழ் மக்கள் போற்ற வேண்டும் எனப் பரணிபாடி, வாழும் தமிழர்களான நம்மை நிந்திப்பதா?”
எனக்கேட்டு, நமக்கெல்லாம் சுயமரியாதை உணர்வை ஊட்டிய பேரறிஞர் அண்ணா அவர்களின் 57ஆவது ஆண்டு நினைவு நாளையொட்டி அவருக்கு மரியாதை செலுத்துகிற வகையில் தமிழ்நாட்டின் முதலமைச்சர் கழகத்தலைவர் தளபதி அவர்கள் தலைமையில் நாளை (03.02.2026) காலை சரியாக 7.00 மணி அளவில் அமைதிப் பேரணி நடைபெற உள்ளது.
வாலாசா சாலையில் அமைந்துள்ள அறிஞர் அண்ணா சிலையில் இருந்து கடற்கரை நினைவிடம் நோக்கி செல்கின்ற இந்த அமைதிப் பேரணியில், சென்னைத் தெற்கு மாவட்டத்திற்கு உட்பட்ட நாடாளுமன்ற, சட்டமன்ற உறுப்பினர்கள், தலைமைக்கழக நிர்வாகிகள், தலைமைச் செயற்குழு, பொதுக்குழு உறுப்பினர்கள், தொகுதிப் பார்வையாளர்கள், பகுதி மற்றும் ஒன்றிய செயலாளர்கள், பகுதிக் கழக நிர்வாகிகள்,வட்டக் கழக செயலாளர்கள், மாவட்டப் பிரதிநிதிகள்,
இளைஞரணி, மகளிரணி, மாணவரணி, மகளிர் தொண்டர் அணி, தொழிலாளரணி, தொண்டரணி, தொழில் நுட்ப அணி, வழக்கறிஞர் அணி, பொறியாளர் அணி, இலக்கிய அணி, ஆதிதிராவிடர் நலக்குழு, சிறுபான்மை நல உரிமைப் பிரிவு, மீனவரணி, நெசவாளர் அணி, வர்த்தகர் அணி, விளையாட்டு மேம்பாட்டு அணி,மருத்துவர் அணி, விவசாய அணி, விவசாயத் தொழிலாளர் அணி, ஆட்டோ ஓட்டுனர் அமைப்பு தொ.மு.ச உள்ளிட்ட அனைத்து அணிகளின் மாவட்ட, பகுதி அமைப்பாளர்கள், துணை அமைப்பாளர்கள், மற்றும் கழகத்தின் அனைத்து நிலை சார்ந்த செயல்வீரர்கள், வீராங்கனை கள் அனைவரும் பெருமளவில் பங்கேற்று வீரவணக்கம் செலுத்திட வேண்டுகிறேன்.
இவ்வாறு அவர் தனது அறிக்கையில் குறிப்பிட்டுள்ளார்.