காரைக்குடி, பிப்.2–
‘‘நூறு நாள் வேலைத் திட்டம் மகாத்மா காந்தியின் பெயரிலேயே தொடரா விட்டால் மக்கள் துணையுடன் திரும்பப் பெற வைப் போம்” என்று முதல்வர் மு.க.ஸ்டாலின் அவர்கள் காரைக்குடியில் நடைபெற்றஅரசு விழாவில் உரையாற்றும்போது ஒன்றிய அரசுக்கு எச்சரிக்கை விடுத்தார்.
முதல்வர் மு.க.ஸ்டாலின் அவர்கள் 31.1.2026 அன்று சிவகங்கை மாவட்டம், காரைக்குடியில் நடைபெற்ற அரசு விழாவில் கலந்து கொண்டு ஆற்றிய உரை வருமாறு:–
சிவகங்கை என்றாலே சிலிர்ப்பு! ஏன் தெரியுமா? இன்றைக்கு நேற்று அல்ல,பல்லாயிரம் ஆண்டுகளுக்கு முன்பாகவேதமிழ் நாகரிகம் ஓங்கியிருந்ததற்கான கீழடித் தடயங்கள் கிடைத்த மண் இந்த மண்! பலரின் வீரத்தால், தியாகத்தால் சிவந்த மண்! முத்து வடுகநாத பெரிய உடையாத் தேவர் – அவர் மனைவி வீரமங்கை வேலுநாச்சியார் – அவரது மகள் வெள்ளச்சி நாச்சியார் என்று ஒரு குடும்பம் வாழையடி வாழையாக ஆங்கிலேயர்களை எதிர்த்து நின்று தாய்நிலத்தை காத்த மண் இது!
விடுதலை மற்றும் தியாகத்தின் அடையாளங்களாக வாழ்ந்து, இந்த மண்ணுக்கு உரமாகியுள்ள மருது சகோதரர்களை தந்த மண் அல்லவா சிவகங்கை! இவர்கள் மட்டுமல்ல! அடுத்த நிமிடம் மரணம் என்று தெரிந்தே, உடலில்நெருப்பைக் கட்டிக்கொண்டு, ஆயுதக் கிடங்கு களில் குதித்த குயிலி வாழ்ந்த மண் இந்த மண்! அதனால்தான், இவர்கள் பெயரை எல்லாம் சொல்லி, இங்கே நிற்கும்போது எனக்குள்ளே தமிழ் வீரமும், உணர்ச்சியும் பொங்கி எழுகிறது!
இந்த விழாவை மிகச்சிறப்பாக ஏற்பாடு செய்திருக்கின்ற அமைச்சர் பெரியகருப்பன் அவர்களுக்கும், மாவட்ட ஆட்சியர் பொற்கொடி அவர்களுக்கும், மாவட்டஅதிகாரிகள் அனைவருக்கும் என்னுடைய பாராட்டுக்கள்! வாழ்த்துகள்!
முன்னாள் ஒன்றிய அமைச்சர் அண்ணன் சிதம்பரம் அவர்கள் இங்கே குறிப்பிட்டுச் சொன்னார்; அலுவலகத்திற்கு அதைத் தொடர்ந்து என்னுடைய இல்லத்திற்கு வந்து, என் கல்லூரிகளின் திறப்பு விழாவிற்கு நேரில் வரவேண்டும் எனக் கேட்டார். நான் தேதி கொடுத்தேன்.கொடுத்தேன் என்று சொல்வதைவிட அவர்சொன்னதை நான் ஒப்புக்கொண்டேன்; அதுதான் உண்மை. அதைப் பயன்படுத்திக் கொண்டு நம்முடைய பெரியகருப்பன் அவர்கள், அவருடைய பெயரைப்போலவே பெரிய விழாவாக இதை ஏற்பாடு செய்திருக்கிறார்.ஒரு கல்லில் இரண்டு மாங்காய்கள் என்று சொல்வார்களே, அதைப்போல ஒரு தேதியை பெற்றுக் கொண்டு 5 நிகழ்ச்சிகளை அவர் நடத்தியிருக்கிறார்.
ஐந்து விழாக்கள்!
நேற்று மாலை 3 விழாக்கள் – முதலில்,
•
பொதுவுடைமை இயக்கத்தின் மாபெரும் தலைவராக இருந்த தோழர் ஜீவா அவர்கள், அண்ணல் காந்தியடிகளை சந்தித்த வரலாற்றுச் சிறப்புமிக்க இடம் சிராவயலில், தமிழ்நாடு அரசின் சார்பில், சிலையுடன் கூடிய நினைவரங்கத்தை திறந்து வைத்தேன்.
•
அடுத்து, “தவத்திரு குன்றக்குடி அடிகளார் அவர்களின் நூற்றாண்டு விழாவை, அரசு சார்பில் கொண்டாடுவோம்” என்று அறிவித்திருந்தோம். குன்றக்குடி மடத்தில் இன்றைய அடிகளார் மிகச்சிறப்பாக அதை ஏற்பாடு செய்திருந்தார்.
•
அந்த நிகழ்ச்சிக்கு அடுத்து, திராவிட இயக்கத்தின் பகுத்தறிவு கவிஞர் என்று தந்தை பெரியாரால் போற்றப்பட்ட சிறப்புக்குரிய கவியரசு முடியரசனார்அவர்கள். இன்னும் சொன்னால், தலைவர்கலைஞருக்கு நெஞ்சுக்கு நெருக்கமான கவிதைத் தோழர்.அவருடைய சிலையைத் திறந்து வைத்தேன். இதுமட்டுமா!
•
இன்று கானாடுகாத்தான் பேரூராட்சியில் செட்டிநாடு வேளாண்மைக் கல்லூரி மற்றும் ஆராய்ச்சி நிலையத்திற் கான புதிய கட்டடங்களை திறந்து வைத்திருக்கிறேன். 330 ஏக்கரில், அந்தக் கல்லூரி அமைந்திருக்கிறது. தற்போது 361 மாணவிகள், 128 மாணவர்கள் என்று மொத்தம் 489 மாணவர்கள் இளங்கலை வேளாண்மை படித்துக் கொண்டு வருகிறார்கள். அந்தக் கல்லூரியில் மானாவாரி வேளாண்மை ஆராய்ச்சிநிலையமும் செயல்பட்டு வருகிறது. 61 கோடியே 79 இலட்சம் ரூபாய் செலவில் பன்முகத் தன்மை கொண்ட மாதிரி வேளாண் காடுகள் ஒன்றும் அமைக்கப்பட்டிருக்கிறது.
முதலமைச்சர் மு.க.ஸ்டாலின் அவர்கள் 31.1.2026 அன்று சிவகங்கை மாவட்டம், காரைக்குடியில் நடைபெற்ற அரசு விழாவில், 2,559 கோடியே 50 இலட்சம் ரூபாய் செலவிலான 49 முடிவுற்ற பணிகளை திறந்து வைத்து, 13 கோடியே 36 இலட்சம் ரூபாய் மதிப்பீட்டிலான 28 புதிய திட்டப் பணிகளுக்கு அடிக்கல் நாட்டினார். இந்நிகழ்ச்சியில், அமைச்சர்கள் கே.என்.நேரு, எம்.ஆர்.கே.பன்னீர்செல்வம், கே.கே.எஸ்.எஸ்.ஆர்.ராமச்சந்திரன், தங்கம் தென்னரசு, எஸ்.ரகுபதி, கே.ஆர்.பெரியகருப்பன், ஆர்.எஸ்.ராஜகண்ணப்பன், சிவ.வீ.மெய்யநாதன், முனைவர் டி.ஆர்.பி.ராஜா, ஒன்றிய முன்னாள் அமைச்சரும், நாடாளுமன்ற உறுப்பினருமான ப.சிதம்பரம், நாடாளுமன்ற உறுப்பினர் கார்த்தி ப.சிதம்பரம், சட்டமன்ற உறுப்பினர்கள் திருமதி ஆ.தமிழரசி, மாங்குடி, டாக்டர் முத்துராஜா, முன்னாள் அமைச்சர்கள் அன்வர் ராஜா, தென்னவன், வேளாண்மை - – உழவர் நலத்துறை செயலாளர் வ.தட்சிணாமூர்த்தி, சிவகங்கை மாவட்ட ஆட்சித் தலைவர் திருமதி கா.பொற்கொடி மற்றும் அரசு உயர் அலுவலர்கள் கலந்து கொண்டனர்.