புதுடெல்லி, பிப். 2–
2026-–27-ம் நிதியாண்டுக் கானநிதிநிலை அறிக்கையை நிதியமைச்சர்நிர்மலா சீதாராமன் மக்களவையில் நேற்று தாக்கல் செய்தார்.
வேலைவாய்ப்பை உருவாக்கவும், இறக்குமதியை குறைக்கவும் அரசு நடவடிக்கை எடுத்து வருவதாக அவர் கூறினார்.
மேலும் அவர் நாட்டின் பொருளாதாரம் சீரான வேகத்தில் முன்னேறி வருவதாகவும் தெரிவித்த அவர், உயிரி மருத்துகள் உற்பத்தி திட்டத்திற்கு அடுத்த 5 ஆண்டுகளில் 10ஆயிரம் கோடி ரூபாய் ஒதுக்கீடு செய்யப்படும் என்றும் கூறினார். மின்னணு தொழில்நுட்ப வளர்ச்சிக்கு ரூ. 40ஆயிரம் கோடி ஒதுக்கீடு செய்யப்படும் செமி கண்டக்டர் உற்பத்தி திட்டம் 2.Oசெயல்படுத்தப்படும் ஒடிசா, கேரளா,ஆந்திரா, தமிழ்நாடு ஆகிய மாநிலங்களில் அரிய வகை கனிமங்கள் உற்பத்தி வழித்தடம் அமைக்கப்படும்.
ஒன்றிய நிதிநிலை அறிக்கையில், நாட்டில் நீர்வழிப்பாதை போக்குவரத்து மேம்படுத்த 20 புதிய அறிவிப்புகளை வெளியிட்டார். சரக்கு பயன்பாட்டிற்கு தேசிய நீர்வழிப்பாதைகள் 5 ஆண்டுகளில் அமைக்கப்படும் என்று கூறினார். உத்தரகாண்ட், இமாச்சல பிரதேசம், ஜம்மு காஷ்மீரில் மலை ரயில் சேவை மேம்படுத்தப்படும் என்றும்குறிப்பிட்டார். நாடு முழுவதும் 7 அதிவேக புதிய ரயில் வழித்தடங்கள் அமைக்கப்படும்என்று அறிவித்துள்ளார். சென்னை- பெங்களூரு மற்றும் சென்னை - ஐதராபாத்துக்கு அதிவேக ரயில்பாதை அமைக்கப்படும் என்று நிதியமைச்சர் நிர்மலா சீதாராமன் தெரிவித்துள்ளார்.
புற்றுநோய் சிகிச்சைக்கு பயன்படுத்தும் 17 மருந்துகளுக்கு சுங்க வரி நீக்கப்பட்டுள்ளது. அரிய வகை நோய்களுக்கான மருந்துகளின் இறக்குமதிக்குமான வரிகளும் நீக்கம் செய்து அறிவிக்கப்பட்டுள்ளது.
மின்சார வாகனங்களை ஊக்குவிக்கும் வகையில் லித்தியம் பேட்டரி தயாரிக்க பயன்படுத்தப்படும் பொருட்களுக்கு இறக்குமதி வரி இல்லை. ஆழ்கடல், பிரத்யேக பொருளாதார மண்டலத்தில் பிடிக்கப்படும் மீன்களுக்கு முழு வரி விலக்கு அளிக்கப்படும் என்று தெரிவிக்கப்பட்டுள்ளது.
இந்தியாவில் உள்ள டேட்டா மையங்களுக்கு 2047 ஆம் ஆண்டு வரை வரி கிடையாது. பங்குகளை திருப்பி வாங்கும் நிறுவனங்களுக்கு மூலதன ஆதாய வரி விதிக்கப்படும்.வெளிநாடு வாழ் இந்தியர்கள் சொத்துக்களை விற்கும்போது செலுத்த வேண்டிய வருமான வரி குறைக்கப்பட்டுள் ளது. உள்நாட்டில் பயிற்சி விமானங்களை உற்பத்தி செய்ய பயன்படுத்தும் மூலப்பொருட்களுக்கு சுங்க வரி நீக்கப்பட்டுள்ளது. கடல்சார்ந்த ஏற்றுமதி பொருட்களை உற்பத்தி செய்ய இறக்குமதி செய்யப்படும் மூலப்பொருட்களுக்கு வரிச்சலுகை அளிக்கப்பட்டுள்ளது. காலணிகள் ஏற்றுமதி செய்வோருக்கு மூலப் பொருட்களை வரி இல்லாமல் இறக்குமதி செய்ய சலுகை வழங்கப்படும் என்றும் ஒன்றிய அரசின் பட்ஜெட்டில் தெரிவிக்கப்பட்டுள்ளது.
ஆதிச்சநல்லூர்
தமிழ்நாட்டில் ஆதிச்சநல்லூர் உள்பட நாடு முழுவதும் 15 தொல்லியல் தலங்கள் கலாச்சார மையங்களாக மேம்படுத்த நடவடிக்கை எடுக்கப்படும் என்று நிதியமைச்சர் நிர்மலா சீத்தாராமன் தெரிவித்தார். பொதிகை மலையில் மலையேற்ற சுற்றுலாவை ஊக்குவிக்க நடவடிக்கை எடுக்கப்படும் என்றும், சென்னை பழவேற்காடு ஏரியில் பறவைகள் காட்சி மையம் அமைக்கப்படும் என்றும் நிதியமைச்சர் நிர்மலா சீதாராமன் கூறியுள்ளார்.
பங்குச் சந்தை வீழ்ச்சி
நிதி அறிக்கை தாங்கல் செய்த நிலையில் நேற்று மும்பை பங்குச் சந்தை குறியீட்டெண் சென்செக்ஸ் 2 ஆயிரத்திற்கும் மேல் சரிந்தது. தேசிய பங்குச் சந்தை நிஃப்டியும் 700 புள்ளிகளுக்கு மேல் சரிந்தது. அனைத்து துறை சார்ந்த நிறுவனங்களிலும் வாங்கிய பங்குகளை முதலீட்டாளர்கள் விற்பனை செய்து வருவதால், இந்திய பங்குச் சந்தைகள் கடும் சரிவை சந்தித்துள்ளதாக நிபுணர்கள் தெரிவித்துள்ளனர்.