புதுடெல்லி, மார்ச் 26–
மேற்குவங்கத்தில் வாக்காளர் பட்டியலில் பெயர்களைச் சேர்ப்பது உள்ளிட்ட பணிகளில் நிலவும் குழப்பம் மற்றும் உரிய படிவங்கள் வழங்கப்படாதது குறித்து உச்சநீதிமன்றம் தேர்தல் ஆணையத்திடம் சரமாரியாக கேள்விகளை எழுப்பியுள்ளது. இந்த விவகாரத்தில் தேர்தல் ஆணையத்தின் செயல்பாடு, ஜனநாயகத்திற்கு எதிராக உள்ளதாகவும், எந்தவித முன்னறி விப்பும் இன்றி வாக்காளர் பட்டியலில் இருந்து பெயர்கள் நீக்கப்படுவது மிகவும் ஆபத்தானது என்றும் உச்சநீதிமன்றம் கவலை தெரிவித்துள்ளது.
எஸ்.ஐ.ஆர். பணிகளின்போது, மேற்குவங்கத்தில் பலருக்கு முறையாக படிவம் வழங்கப்படவில்லை என்றும் குற்றச்சாட்டு எழுந்துள்ளது.
மேலும், வாக்காளர்கள் பெயர்கள் பட்டியலில் இருந்து நீக்கப்பட்டது குறித்து எந்தவித தகவலும் சம்பந்தப்பட்ட நபர்களுக்கு தெரிவிக்கப்படவில்லை. இந்நிலையில், நாட்டின் பல்வேறு மாநிலங்களில் எஸ்.ஐ.ஆர் பணிகள் நடைபெற்று முடிந்த நிலையில், மேற்குவங்கத்தில் மட்டும் ஏன் குழப்பம் நிலவுகிறது என்றும் தேர்தல் ஆணையத்தை உச்சநீதிமன்றம் சாடியுள்ளது.