சென்னை, மார்ச் 26 –
சென்னை ராயப்பேட்டையில் நடைபெற்ற நிகழ்ச்சி ஒன்றில், தமிழ்நாடு சட்டமன்றத் தேர்தல் கையேடு 2026- ஐ தலைமைத் தேர்தல் அதிகாரி அர்ச்சனா பட்நாயக் வெளியிட்டார். இந்த கையேட்டில் தமிழ்நாட்டில் ஏற்கனவே நடைபெற்ற தேர்தல் குறித்தான அனைத்து விவரங்களும் விரிவாக இடம் பெற்றுள்ளன. இந்நிலையில், நிகழ்ச்சியில் உரையாற்றிய தமிழ்நாடு தலைமை தேர்தல் அதிகாரி அர்ச்சனா பட்நாயக்,
தமிழ்நாட்டில் கடந்த காலங்களில் நடைபெற்ற தேர்தல்களில் நகர்ப்புறத்தில் பதிவாகும் வாக்குகளின் எண்ணிக்கை குறைவாகவே இருந்ததாகவும், அதனால், தற்போது நகர்ப்புறத்தில் வாக்குபதிவை அதிகரிக்க தேர்தல் ஆணையம் பல்வேறு முயற்சிகளை மேற்கொண்டு வருவதாக தெரிவித்தார். இதை யடுத்து, செய்தியாளர்களுக்கு பேட்டியளித்த தலைமை தேர்தல் அதிகாரி அர்ச்சனா பட்நாயக், வணிகர்கள் மற்றும் பொதுமக்கள் ஐம்பதாயிரத்திற்கும் மேல் எடுத்துச் செல்ல வேண்டும் என்று கோரிக்கை வைத்துள்ளதாகவும், இதனை தலைமைத் தேர்தல் ஆணையத்தின் கவனத்திற்கு கொண்டு சென்று நடவடிக்கை எடுக்கப்படும என்று தெரிவித்தார். இதனிடையே, மருத்துவ காரணத்திற்காக மட்டும், பொதுமக்கள் 50 ஆயிரம் ரூபாய்க்கு மேல் பணம் எடுத்துச் சென்றால் அதற்கான ஆதாரத்தை whatsapp உள்ளிட்ட சமூக வலைதளம் வழியாக கூட காண்பித்து எடுத்து செல்லலாம் என கூறினார்.