புதுடெல்லி, மார்ச் 26–
இந்தியா – அமெரிக்கா இடையேயான வர்த்தக ஒப்பந்தத்தின் தாக்கம் குறித்து ஒன்றிய அரசு துறை ரீதியான ஆய்வுகளை மேற்கொண்டதா? என்றும் தமிழ்நாட்டில் அமைந்துள்ள, தேசிய அளவிலான முக்கிய ஜவுளி மற்றும் ஆடை ஏற்றுமதி பாதிக்காமல் இருக்கவும் தொழிலாளர்கள் வேலை வாய்ப்பை உறுதி செய்யவும் எடுத்துள்ள நடவடிக்கை என்ன? என்றும் மக்களவையில் கழக நாடாளுமன்ற குழுத் துணைத் தலைவரும் கழக விளையாட்டு மேம்பாட்டு அணிச் செயலாளருமான தயாநிதி மாறன் எம்.பி. கேள்வி எழுப்பியுள்ளார்.
அதன் விவரங்கள்
வருமாறு:
இந்தியா – அமெரிக்கா இடையேயான வர்த்தக ஒப்பந்தத்தின் தாக்கம் குறித்து ஒன்றிய அரசு துறை ரீதியான ஆய்வுகளை மேற்கொண்டதா? குறிப்பாக இந்த ஒப்பந்தத்தால் தமிழ்நாட்டில் அமைந்துள்ள, தேசிய அளவிலான முக்கிய ஜவுளி மற்றும் ஆடை ஏற்றுமதிகள் பாதிக்கப்படுமா என்பது பற்றி ஆய்வு செய்யப்பட்டதா ?
அமெரிக்காவுக்குச் செல்லும்இந்திய ஜவுளி மற்றும் ஆடை பொருட்களுக்கு விதிக்கப்படும் 18 சதவீத வரி, பிற நாடுகளின் ஏற்றுமதி வரியுடன் ஒப்பிடும்போது குறைவாக இருக்குமா? அப்படி இருக்கும்போது அது இந்தியப் பொருட்களின் போட்டித்தன்மையை குறைவான நிலையிலேயேவைத்திருக்குமா?
வர்த்தக ஒப்பந்தத்தை இறுதி செய்யும் முன், ஜவுளி ஏற்றுமதியாளர்கள் சங்கங்கள், குறு,சிறு, நடுத்தர தொழில் நிறுவனங்கள் மற்றும் தொழிலாளர் பிரதிநிதி களுடன் ஒன்றிய அரசு கலந்தாலோசனை செய்ததா? அவ்வாறெனில் தமிழ்நாட்டு பிரதிநிதிகள் முன்வைத்த பிரச்சனைகள், கோரிக்கைகள் என்ன?
தொடர் வரிவிதிப்பு காரணமாக வார்த்தக வாய்ப்பு குறையும் பட்சத்தில் ஏற்றுமதி பாதித்தால், ஜவுளி உற்பத்தி அதிகமுள்ள பகுதிகளில் தொழிலாளர்களின் வேலைவாய்ப்பை பாதுகாக்க ஒன்றிய அரசு முன்னெடுத்துள்ள நடவடிக்கைகள் என்னென்ன?
புதிய வர்த்தக விதிகளால் பாதிக்கப்படும் ஜவுளி தொழிலாளர்கள் மற்றும் ஏற்றுமதியாளர்களின் வாழ்வாதாரத்தைப் பாதுகாப்பதற்காக சந்தை பரவலாக்கல், ஊக்கத்தொகை உள்ளிட்ட ஆதரவு நடவடிக்கைகளை ஒன்றிய அரசு முன்னெடுத்து ள்ளதா?
இவ்வாறு அவர் கேள்வி எழுப்பினார்.