கரூர். ஏப்.1–
கரூர், கோவை மாவட்டங்களில் கழகம் வெற்றி உறுதி. பெருகி வரும் மக்கள் ஆதரவை பொறுத்துக் கொள்ள முடியாமல் எதிர்க்கட்சியினர் அவதூறுகளை கிளப்பி விடுகின்றனர் என கரூர் மாவட்ட கழக செயலாளர் வி. செந்தில் பாலாஜி செய்தியாளர்களிடம் கூறினார்.
கரூர் சட்டமன்ற தொகுதி திமுக வேட்பாளர் ஆசி. எம். தியாகராஜனை ஆதரித்து மாவட்ட கழக செயலாளர் வி. செந்தில் பாலாஜி பிரச்சாரத்தை தொடங்கினார். கரூர் கோடங்கிபட்டி பட்டாளம்மன் முத்தாலம்மன் கோவிலில் வழிபாடு செய்துவிட்டு திமுக கூட்டணி கட்சி நிர்வாகிகளுடன் வீடு வீடாகச் சென்று வாக்கு சேகரித்தார். மாவட்ட கழக செயலாளர் வி.செந்தில் பாலாஜி செய்தியாளர்களை சந்தித்தார். அப்போது அவர் கூறியதாவது:-
கரூர் சட்டமன்ற தொகுதி திமுக வேட்பாளராக தலைவர் முதலமைச்சர் மு.க. ஸ்டாலின் அவர்களது ஆசியுடன் ஆசி.எம். தியாகராஜன் அவர்கள் அறிவிக்கப்பட்டுள்ளார். ஏற்கனவே கழக முக்கிய நிர்வாகிகளை சந்தித்து ஆதரவு கேட்டார். இப்போது பிரச்சாரத்தை தொடங்கியுள்ளார்.
கரூர் மாவட்டத்தில் நான்கு சட்டமன்ற தொகுதிகளிலும் உதயசூரியன் சின்னத்திற்கு பொதுமக்கள் வாக்களித்து மகத்தான ஆதரவை அளிக்குமாறு கேட்டுக்கொள்கிறேன்.
2021 தேர்தலில் நான்கு தொகுதிகளிலும் திமுகவை வெற்றி பெறச் செய்த மாவட்ட மக்களுக்கு நன்றி தெரிவிக்கும் விதமாக ஐந்து ஆண்டுகளில் கரூர் மாவட்டத்திற்கு ரூ.5000 கோடி அளவிற்கான வளர்ச்சி திட்டங்களை முதலமைச்சர் மு.க. ஸ்டாலின் அவர்கள் செயல்படுத்தி உள்ளார்கள். கரூர் மாநகராட்சியில் மட்டும் ஏறத்தாழ ரூ.1040 கோடி அளவிற்கு வளர்ச்சி திட்ட பணிகள் மேற்கொள்ளப்பட்டுள்ளன. முதலமைச்சர்அவர்களுடையதிட்டங்களை பட்டியலிட்டுவீடு வீடாகச் சென்று, உதயசூரியனுக்கு ஆதரவு தாருங்கள் என வாக்கு சேகரிக்கும் பணியில் ஈடுபட்டுள்ளோம். ஐம்பதாயிரம் வாக்குகள் வித்தியா சத்தில் கரூர் தொகுதி கழக வேட்பாளர் ஆசி. தியாகராஜன் வெற்றி பெறுவது உறுதி.
சில பேர் ஆட்சியில் இருந்தபோது எதையும் செய்யவில்லை. எதிர் முகாமினர் ஏதாவது செய்திருந்தால் தானே கூற முடியும். ஒன்றும் செய்யவில்லை என்பதால் தேர்தல் அறிக்கையை வைத்து ஓட்டு கேட்டு வருகின்றார்கள். ஆனால் கழக தலைவர் அவர்கள் வெளியிட்டுள்ள தேர்தல் அறிக்கையானது அடித்தட்டு மக்கள் வரை பயன்படக்கூடியதாக இருப்பதால் மக்களிடம் பெரும் வரவேற்பை பெற்றிருக்கிறது.
இன்றையதினம் கழகத் தலைவர் முதலமைச்சர் அவர்கள் கரூர் மாவட்டத்தில் உள்ள நான்கு சட்டமன்ற தொகுதிகளிலும் கழக வேட்பாளர்களை ஆதரித்து ராயனூரில் நடைபெறும் பிரம்மாண்ட பொதுக்கூட்டத்தில் சிறப்புரை ஆற்றுகின்றார்கள். ஒரு லட்சத்திற்கும் மேற்பட்டோர் பங்கேற்கும் வகையில் ஏற்பாடுகள் செய்யப்பட்டு வருகின்றன.
தலைவர் இட்ட கட்டளை
தலைவர் அவர்கள் இட்ட கட்டளைப்படி நான் கோவை தொகுதியில் போட்டியிடுகிறேன். முன்பு அரவக்குறிச்சியில் தலைமையின் கட்டளைப்படி போட்டியிட்டு வெற்றி பெற்றேன். அதன் பிறகு கரூரில் வெற்றி பெற்றேன். இன்றைக்கு கரூரிலும் கோவையிலும் மாபெரும் வெற்றி உறுதி என்பதை வாக்கு எண்ணிக்கை என்பது நீங்கள் தெரிந்து கொள்வீர்கள். இதை பொறுத்துக் கொள்ள முடியாமல் எதிர்க்கட்சியினர் அவதூறுகளை கிளப்பி விடுகின்றனர். கரூர் மாவட்டமும் கோவை மாவட்டமும் எனது இரு கண்கள் உயிரும் உடலும் போல.
இவ்வாறு செந்தில் பாலாஜி கூறினார்.