புதுடெல்லி, ஏப்.2
மேற்காசியப் போரால் பெர்சிய வளைகுடாவில் சிக்கித்தவிக்கும் இந்திய நாட்டைச் சேர்ந்த மாலுமிகளின் நிலை குறித்து, நாடாளுமன்றத்தில் துறைமுகங்கள், கப்பல் மற்றும் நீர்வழிகள் அமைச்சகத்திடம் ஈரோடு கே.இ.பிரகாஷ் கேள்வி எழுப்பியிருந்தார்.
இதற்கு அளிக்கப்பட்டுள்ள விவரங்களில் இருந்து, வெளிநாட்டுக் கப்பல்களில் பணிபுரிந்து வந்த இந்திய நாட்டைச் சேர்ந்த மாலுமிகளில் 3 பேர் கொல்லப்பட்டுள்ளனர், 4 பேர் காயமுற்றுள்ளனர், ஒருவரைக் காணவில்லை ஆகிய அதிர்ச்சித் தகவல்கள் வெளிவந்துள்ளன. இந்தியக் கப்பல்களில் பணியாற்றுபவர்களின் நிலை குறித்த விவரங்களை ஒன்றிய அரசு வழங்கவில்லை.
தக்க நேரத்தில் உரிய பாதுகாப்பு நடவடிக்கைகளை எடுத்து நம் நாட்டு குடிமக்களை காக்கத்தவறிய இந்த ஒன்றிய அரசிற்கு, எனது வலுவான கண்டனங்களை தெரிவித்துக்கொள்கிறேன்.
1. கொல்லப்பட்ட இந்திய மாலுமிகள் குறித்து - பதிலடி நடவடிக்கை எடுக்காத ஒன்றிய அரசு
மேற்காசியப் போர் பதற்றம் ஏற்பட்ட சூழலில் இருந்தே, வெளிநாட்டுக் கப்பல்கள் மற்றும் இந்தியக் கப்பல்களில் பணியாற்றும் இந்தியாவைச் சேர்ந்த மாலுமிகளின் பாதுகாப்பை உறுதிசெய்யவேண்டும் என்று நாட்டு மக்களும் அவர்களின் உறவினர்களும் ஒன்றிய அரசிற்கு கோரிக்கை விடுத்தார்கள்.
ஆனால், இந்த கோரிக்கைகளை நிறைவேற்றத் தவறிய ஒன்றிய அரசு, தற்போது நம்முடைய நாட்டைச் சேர்ந்த 3 மாலுமிகளை பலி கொடுத்துள்ளது. மேற்கொண்டு 4 பேர் காயமுற்றிருக்கிறார்கள். காணாமல் போயிருக்கும் ஒருவரும் மீட்கப்படுவாரா என்பதற்கு உத்தரவாதம் இல்லை.
ஒன்றிய அரசு அளித்த விவரங்களின் படி, இந்த சம்பவம் நடந்து பல வாரங்கள் கடந்துவிட்டன. எனினும், இதற்குரிய பதிலடி நடவடிக்கைகள் எதையும் இதுவரை எடுக்காமல், கோழைத்தனமாக செயல்பட்டுக் கொண்டிருக்கிறது ஒன்றிய அரசு. குறைந்தபட்சம், ஒரு கண்டன அறிக்கையைக் கூட வெளியிட துணியவில்லை.
2. எஞ்சியிருக்கும் மாலுமிகளின் உயிருக்கும் அச்சுறுத்தல் - சரியான பதில் அளிக்காமல் மழுப்பும் ஒன்றிய அரசு
கொல்லப்பட்டவர்களின் உடல்கள் இந்தியா கொண்டுவரப்பட்டு உறவினர்களிடம் ஒப்படைக்கப்பட்டதா அல்லது நடுக்கடலிலேயே அவர்கள் விடப்பட்டார்களா என்று தெரியவில்லை. காயமுற்றவர்களும் மீட்கப்பட்டு இந்தியா கொண்டுவரப்பட்டார்களா விடையில்லை. என்பதற்கு
இந்த சூழலில், மேற்கொண்டு ஆயிரக்கணக்கான மாலுமிகள் பெர்சிய வளைகுடாவில் சிக்கித் தவிக்கிறார்கள். இவர்களின் நிலை என்ன, இவர்களின் பாதுகாப்பிற்காக என்ன நடவடிக்கை எடுக்கப்பட்டுள்ளது என்ற கேள்விகளுக்கு, ஒன்றிய அரசு சரியான பதிலை அளிக்காமல் மழுப்பியுள்ளது.
3. பிரதமரின் ‘விஷ்வகுரு’ வேடம் மீண்டும் கலைந்துள்ளது:
சர்வதேச அரசியல் சூழல் ஏற்படும் போதெல்லாம், ‘இது விஷ்வகுருவின் அரசாங்கம்’ என்றுபோலியான ஒரு வீரக் கதையாடலை ஒன்றிய அரசும், அதன் ஆதரவாளர்களும் உருவாக்குகின்றனர். ‘மற்ற நாடுகள் நம்
பிரதமரைப் பார்த்து அஞ்சுகின்றன’ என்று கூச்சமே இல்லாமல் நாட்டுமக்களை நம்பவைக்க முயல்கின்றனர்.
ஆனால், நடைமுறைச் சூழல் வேறு. சீன ஆக்கிரமிப்புக்கு மவுனம் காத்தது முதல் இப்போது பெர்சிய வளைகுடாவில் நம் மாலுமிகளை தவிக்க விட்டிருப்பது வரை, இந்த விஷ்வகுருவின் அரசாங்கம் இந்தியாவின் தன்மானத்தையும் இந்தியர்களின் பாதுகாப்பையும் கேள்விக்குறியாக்கியுள்ளது.
இனிமேலும் வீரவசனங்களைப் பேசி நாட்டு மக்களை ஏமாற்றாமல், நமது மாலுமிகளை பாதுகாப்பாக மீட்டுக் கொண்டு வருவதற்கான நடவடிக்கைகளை, ஒன்றிய அரசு உடனடியாக எடுக்க வேண்டும்.
இவ்வாறு கே.இ.பிரகாஷ் எம்.பி. தெரிவித்துள்ளார்.