சென்னை, ஏப்.6–
கிறிஸ்தவ அமைப்புகள் மீது தாக்கத்தை ஏற்படுத்தும் என்பதால், மத்திய அரசின் வெளிநாட்டு பங்களிப்பு சட்ட திருத்த மசோதாவை திரும்பப் பெற வேண்டும் என்று பிரதமருக்கு முதலமைச்சர் மு.க.ஸ்டாலின் அவர்கள் கடிதம் எழுதியுள்ளார்.
இதுகுறித்து பிரதமர் நரேந்திரமோடிஅவர்களுக்கு முதலமைச்சர் மு.க.ஸ்டாலின்அவர்கள் எழுதிய கடிதத்தில் கூறப்பட்டு இருப்பதாவது:–-
தானாக ரத்தாகும்
மத்திய அரசின் வெளிநாட்டு
பங்களிப்பு (ஒழுங்கு முறை) (எப்.சி.ஆர்.ஏ.) சட்ட திருத்த மசோதாவை நாடாளுமன்றத்தில் அறிமுகப்படுத்தியிருப்பது குறித்து, ஆழ்ந்த வேதனையுடனும், கவலையுடனும் உங்களுக்கு இந்தக்கடிதத்தை எழுதுகி றேன். இந்தியா முழுவதிலுமுள்ள இந்த மசோதாவின் பல அம்சங்கள், கிறிஸ்தவ சமூகத்தினரை கொந்தளிப்பு மற்றும் மனவருத்தத்திற்குள் ஆழ்த்தி இருக்கிறது. அந்த அம்சங்கள் எவை என்றால்,
எப்.சி.ஆர்.ஏ. பதிவில், நடைமுறை காலதாமதம், நிர்வாக மறுப்பு அல்லது அரசு உரிய நேரத்தில் செயல்படத் தவறுதல் போன்ற காரணங்கள் கூட ஒரு அமைப்பின் பதிவை தானாகவே ரத்து செய்துவிடும்.
சொத்துகள் பறிமுதல்
பதிவு ரத்து செய்யப்பட்டாலோ
அல்லது உறுதி செய்யப்படாததாக கருதப்பட்டாலோ, முழுவெளிநாட்டுப் பங்களிப்பு நிலுவைத்தொகையும், பள்ளிகள்,
ஆஸ்பத்திரிகள், தங்கும் விடுதிகள், நிலம் மற்றும் கட்டிடங்கள் உள்பட அந்த நிதியிலிருந்து உருவாக்கப்பட்ட ஒவ்வொரு சொத்தும், அரசால் நியமிக்கப்பட்ட
அதிகாரியிடம் ஒப்படைக்கப்பட்டுவிடும்.
பதிவை புதுப்பிக்கும் செயல்முறையே தெளிவற்றதாகவும், வெளிப்படைத்தன் மையற்றதாகவும், தன்னிச்சையானதாகவும் உள்ளது. குறைபாடுகளை தெரிவிக்க மறுப்பது அல்லது நியாயமான விசாரணைக்கு வாய்ப்பளிக்காதிருப்பது போன்றவை, சம்பந்தப்பட்ட அமைப்புகளுக்கு இயற்கை நீதியை மறுப்பதாக உள்ளது. வெளி நாட்டுப் பங்களிப்புகளுடனும், உள்நாட்டு ஆதாரங் களில் இருந்தும், உருவாக்கப்பட்ட சொத்துகள் முழுமையாகப் பறிமுதல் செய்யப்படும் என்ற விதிமுறை இன்னும் அதிக கவலையளிப்பதாக உள்ளது.
சட்ட தாக்குதல்
இந்த கொடுமையான மசோதா மூலம் மத்திய அரசு தனது விருப்பப்படி, எந்த வொரு முறையான சட்ட நடைமுறையும் இல்லாமலேயே, தேவாலயம், பள்ளி அல்லது ஆஸ்பத்திரி என
எந்தவொரு சொத்தின் எப்.சி.ஆர்.ஏ. பதிவைரத்து செய்யவும், அதன் சொத்துகளை கையகப்படுத்தவும் அதிகாரம் அளிக்கப்படுகிறது. இதனால் இந்தியாவின் தொண்டு நிறுவனங்கள் சிதைக்கப் படும்.
எனவே, இந்த மசோதா இந்திய அரசியலமைப்பின் 25, 29, 30 மற்றும் 300-ஏ ஆகிய பிரிவுகளுக்கு முற்றிலும் முரணானதாக உள்ளது. மேலும் இது சிறுபான்மையினரால் நடத்தப்படும் நிறுவனங்கள் மீதான சட்டப்பூர்வமான தாக்குதலாகும்.
பெரும் அச்சுறுத்தல்
தலித்துகள், பழங்குடியினர் மற்றும் கிராமப்புற ஏழைகள் உள்பட விளிம்பு நிலைப் பிரிவினருக்கு கல்வி மற்றும் சுகா தாரத்தை வழங்கும் தொண்டு நடவடிக்கைகளுக்கான நிதியுதவியை முற்றிலுமாகத் துண்டிப் பதை இந்த மசோதா நோக்கமாகக் கொண்டுள்ளது.
வெளிநாட்டு நிதியைச் சார்ந்துள்ள தொண்டு நிறுவனங்களுக்கு இந்த மசோதா, பெரும் அச்சுறுத்தலாக அமைகிறது. இதனால், உடனடியாக பாதிக்கப்படுபவர்கள், அந்த நிறுவனங்கள் மட்டு மல்ல, கல்வி மற்றும் சுகாதாரத்திற்காக இந்த நிறுவனங் களைச்சார்ந்திருக்கும் லட்சக்கணக்கான நலிவடைந்த குடிமக்களும் அடங்குவார்கள்.
மசோதாவை திரும்பப் பெற வேண்டும்
இந்த அமைப்புகளால் வழங்கப்படும் கல்வி, மருத்துவம் மற்றும் தொண்டு சேவை களுக்கு மாற்றாக மத்திய அரசிடமோ அல்லது மாநிலங்களிடமோ திறன் இல்லை. இதன் விளைவாக, நாடு முழுவதும் அடித்தள நல உள் கட்டமைப்பு சரிந்துவிடும். மத சுதந்திரம் மற்றும் சமூக தொண்டு ஆகியவற்றின் மீது நடத்தப்படும் தாக்குதல்தான் இந்த மசோதா. இந்த சட்டம் இயற்றப்பட்டால்,அது இந்தியாவின் ஜனநாயக, மதச்சார்பற்ற மற்றும் மனிதாபிமானப் பாரம்பரியத்தில் ஒரு நிரந்தர வடுவை ஏற்படுத்திவிடும். எனவே இந்த மசோ தாவை உடனடியாக திரும்பப் பெறவேண்டும்.
இவ்வாறு அதில் கூறப்பட்டுள்ளது.