நாமக்கல், ஏப். 9 –
ராசிபுரம் (தனி) சட்டமன்றத் தொகுதியில் தி.மு.க. வேட்பாளர் டாக்டர் மா.மதிவேந்தனுக்கு ஆதரவாக தி.மு.க. துணைப் பொதுச்செயலாளரும், மாநிலங்களவை உறுப்பினருமான அந்தியூர் செல்வராஜ் தீவிர தேர்தல் பிரச்சாரம் மேற்கொண்டு, பொதுமக்களின் நீண்ட நாள் வீட்டுமனை பட்டா கோரிக்கைகள் விரைவில் நிறைவேற்றப்படும் என உறுதியளித்தார்.
நாமக்கல் கிழக்கு மாவட்டம் ராசிபுரம் ஆர்.எம்.சி காலனி, வெண்ணந்தூர் பேரூர், அத்தனூர் பேரூர் ஆகிய இடங்களில் நடைபெற்ற தேர்தல் பிரச்சார கூட்டத்தில் கலந்து கொண்ட அந்தியூர் செல்வராஜ், பொதுமக்களிடம் வாக்கு சேகரித்து, தி.மு.க. வேட்பாளர் மருத்துவர் மா.மதிவேந்தனுக்கு ஆதரவு திரட்டி னார்.
அப்போது அவர் பேசுகையில், “இந்த பகுதியில் வசிக்கும் மக்கள் நீண்ட காலமாக வீட்டுமனை பட்டா கோரி வருகிறீர்கள். உங்களுக்காக செயல்பட திறமையான மாவட்டக் கழக செயலாளர் கிடைத்துள்ளார். இந்த தொகுதியில் மீண்டும் அமைச்சராக வருவதற்கான வாய்ப்பை கழகத் தலைவர் நம்பிக்கையுடன் மதிவேந்தனுக்கு வழங்கியுள்ளார்.
நீங்கள் மருத்துவர் மா.மதிவேந்தனை வெற்றி பெறச் செய்தால், நீண்ட நாள் நிலுவையில் உள்ள வீட்டுமனை பட்டா பிரச்சினைக்கு கண்டிப்பாக தீர்வு காணப்படும். உங்கள் கோரிக்கைகளை நிறைவேற்ற வல்லமை பெற்றவர் அவர்,” என்றார்.
மேலும், தமிழ்நாடு முதல்வர் மு.க. ஸ்டாலின் அவர்கள் தலைமையில் செயல்படுத்தப்பட்ட பல்வேறு நலத்திட்டங்களை சுட்டிக் காட்டிய அவர், “மகளிர் உரிமைத் தொகை ரூ.1000 வழங்கப்பட்டு வருகிறது. மீண்டும் தி.மு.க. ஆட்சி அமைந்தால், அதனை ரூ.2000 ஆக உயர்த்த தேர்தல் அறிக்கையில் கூறப்பட்டுள்ளது. இந்த திட்டத்திற்கு பொதுமக்களிடையே நல்ல வரவேற்பு கிடைத்து வருகிறது,” என தெரிவித்தார்.
இந்த பிரச்சாரத்தில் நாமக்கல் கிழக்கு மாவட்ட தி.மு.க. செயலாளர் கே.ஆர்.என். இராஜேஸ்குமார், ராசிபுரம் தி.மு.க. நகர கழக செயலாளர் என்.ஆர்.சங்கர், நகர் மன்ற தலைவர் முனைவர் ஆர்.கவிதா, வெண்ணந்தூர் பேரூர் செயலாளர் ஆர்.எஸ்.எஸ்.ராஜேஷ், அத்தனூர் பேரூர் செயலாளர் கே.கண்ணன், தேமுதிக நகர கழக செயலாளர் இளையராஜா உள்ளிட்ட கூட்டணி கட்சியினர், வார்டு செயலாளர்கள், கவுன்சிலர்கள் மற்றும் கூட்டணி கட்சி நிர்வாகிகள் உள்ளிட்ட பலரும் கலந்து கொண்டனர்.