கொ
ரோனா காலத்தில் தான் ஏதோ மக்களை காத்து கிழித்துவிட்டதை போல எடப்பாடி பழனிச்சாமி சவுண்டு விட்டுக் கொண்டிருக்கிறார். கொரோனாவைவிட கொடூரமான ஆட்சியை நடத்திக்கொண்டிருந்தவர் எடப்பாடி பழனிச்சாமி. மருத்துவமனைகளில் மருந்துகள் இல்லை. படுக்கைகள் இல்லை. ஆக்சிஜன் கிடைக்கவில்லை. பிளீச்சிங் பவுடரை ஆங்காங்கே தூவி கொரோனாவை கட்டுப்படுத்துவதாக நாடகமாடினார்கள். அந்த பவுடரை வாங்கியதிலும் ஊழல் நடந்ததாக குற்றச்சாட்டுகள் எழுந்தன.
கொரோனாவால் பாதிக்கப்பட்டவர்கள் வீடுகளில் நோட்டீஸ் ஒட்டி மக்களை உளவியல் சித்திரவதைக்கு ஆளாக்கி னார்கள். வீடுகளும் தெருக்களும் தகரம் வைத்து தடுக்கப்பட்டு மக்கள் அவதிக்குள்ளாக்கப்பட்டார்கள். இ-–பாஸ் என்ற நடைமுறையால் மக்களுக்கு நெருக்கடி கொடுக்கப்பட்டது.
மக்களுக்கு எங்கும் வேலையில்லை கையில் காசு இல்லை. வரலாறு காணாத துயரத்தை மக்கள் அனுபவித்தார்கள். கையாலாகாத எடப்பாடி அரசு சுகாதார துறை செயலாளர் டெல்லி தப்லீக் ஜமாத் மூலமாகத்தான் கொரோனா பரவியது என்று பகிரங்கமாக இஸ்லாமிய மதவெறுப்பை பரப்பினார்.
தமிழ்நாட்டின் பல ஊர்களில் இஸ்லாமியர்களின் கடைகளில் பொருள் வாங்காதீர்கள் என்று சங்கிகள் பரப்புரை செய்தார்கள். அவர்கள் மேல் எந்த நடவடிக்கையும் எடுக்கப்படவில்லை. மாறாக இஸ்லாமிய அமைப்புகளை சேர்ந்தவர்களோ எவரும் நெருங்க அஞ்சிய கொரோனாவில் இறந்தவர்களின் உடல்களை அடக்கம் செய்வதற்காக முன் நின்றார்கள்.
திமுக தொண்டர்கள் கொரோனாவால் பாதிக்கப்பட்ட மக்களுக்கு உதவ எங்கெங்கும் களத்தில் நின்றார்கள். நலத்திட்ட உதவிகளை வழங்கினார்கள். அந்த பணியில் ஈடுபட்டிருந்த திமுக சட்டமன்ற உறுப்பினர் ஜெ. அன்பழகன் கொரோனா தொற்றுக்கு ஆளாகி மரணமடைந்தார்.
முழு இயக்கத்தையும் கொரோனா நிவாரணப் பணிகளில் அன்றைய எதிர்க்கட்சித் தலைவர் முத்துவேல் கருணாநிதி ஸ்டாலின் ஈடுபடுத்தினார். அன்றைய அ.தி.மு.க. அரசு கொரோனா தடுப்பு நடவடிக்கையில் அடைந்த தோல்விகளை ஒவ்வொரு நாளும் அறிக்கைகளில் சுட்டிக்காட்டி என்ன செய்யவேண்டும் என்பதை அறிவுறுத்தினார். ஆனால் கேளாச்செவிகளை உடைய எடப்பாடி பழனிச்சாமி கொரோனாவில் இறந்தவர்கள் மற்றும் பாதிக்கப்பட்டவர்களின் எண்ணிக்கையை மூடி மறைப்பதிலேயே குறியாக இருந்தார். ஆனால் தி.மு.க. அரசு அறிக்கைகளிலுள்ள முரண்பாடுகளை சுட்டிக்காட்டி உண்மையாக இறந்தவர்களின் எண்ணிக்கையை அம்பலப்படுத்தியது.
இதே கொரோனா ஊரடங்கு காலத்தில்தான் எடப்பாடி பழனிச்சாமியின் காவல்துறை சாத்தான்குளம் காவல் நிலையத்தில் தந்தையையும் மகனையும் அடித்து கொன்றது. ஆனால் அவர்கள் இருவரும் உடல்நலக் குறைவினால் இறந்தார்கள் என்று நெஞ்சில் ஈரமே இல்லாமல் நியாயப்படுத்தியவர் எடப்பாடி பழனிச்சாமி. அந்தக் குற்றத்தில் ஈடுபட்ட 9 பேருக்கும் சமீபத்தில் நீதிமன்றம் மரண தண்டனை அளித்தது. உண்மையிலேயே அது எடப்பாடி ஆட்சிக்கு விதித்த தண்டனையாக கருதப்பட வேண்டும்.
அ.தி.மு.க.வினர் தங்களது எடப்பாடி பழனிச்சாமி ஆட்சியின் சாதனையாக அவ்வப்போது குறிப்பிடுவது பத்தாம் வகுப்பில் அனைவருக்கும் ஆல் பாஸ் போட்டதைத்தான். ஆனால் அப்படி பாஸ் போடப்பட்ட இளைஞர்கள் இன்றைக்கும் நேர்முகத் தேர்வுகளில் ‘கொரோனா பேட்ஜ்’ என்று ஒதுக்கி வைக்கப்படுவதுதான் எதார்த்தமாக இருக்கிறது. கொரோனா காலத்தில் மக்களை பேரழிவிற்கு தள்ளியவர் எடப்பாடி பழனிச்சாமி. அப்போதுகூட தற்காலிகமாக மதுக்கடைகளை மூட மறுத்தார். தி.மு..கவின் கடும் போராட்டத்திற்கு பிறகு மூடினார்.
கொரோனா இரண்டாம் அலை உச்சத்தில் இருந்த போது திமுக ஆட்சிக்கு வந்தது. மருத்துவமனைகளில் போர்க்கால அடிப்படையில் படுக்கைகள் தயார் செய்யப்பட்டன. மக்களுக்கு தேவையான தடுப்பூசிகள், மருந்துகள், ஆக்சிஜன் முதலானவற்றை பெற பெரும் முன்னெடுப்பை செய்தது. ஆட்சிக்கு வந்ததும் உடனடியாக 4000 ரூபாய் கொரோனா நிவாரண நிதியாக வழங்கப்பட்டது. வீடுகளுக்கே சென்று காய்கறி விநியோகம் செய்யும் முறை செயல்படுத்தப்பட்டது. மூன்று மாதத்திற்குள் மரணங்களின் எண்ணிக்கை வெகுவாக குறைந்தது. தமிழ்நாடு முழுக்க பெரும் இயக்கமாக தடுப்பூசி செலுத்தப்பட்டது. மூடிக்கிடந்த ஸ்டெர்லைட் ஆலையை திறந்து ஆக்சிஜன் உற்பத்தி செய்யப்பட்டது. முதலமைச்சரே கவச உடை அணிந்து கொரோனா வார்டிற்குச் சென்று நோயாளிகளை பார்வையிட்டதன் மூலம் கொள்ளை நோய்க்கு எதிரான போராட்டத்திற்கு உத்வேகம் அளித்தார். அனைத்தும் அரசு துறைகளும் இப்போராட்டத்தில் முழுமையாக ஈடுபடுத்தப்பட்டன. அனைத்து அமைச்சர்களும் சட்டமன்ற உறுப்பினர்களும் மக்களை காக்கும் போராட்டத்தில் களத்தில் நின்றார்கள். அன்று கொரோனா தடுப்பிற்காக திராவிட மாடல் அரசு மேற்கொண்ட செயல்பாடுகள் தேசிய அளவில் பெரும் பாராட்டு பெற்றன.
ஆனால் எடப்பாடி பழனிச்சாமி கொரோனா காலத்தில் முற்றாக மக்களை கைவிட்ட அவலத்தை மூடிமறைத்து தான் ஏதோ சிறப்பாக செயல்பட்டதைப் போல இப்போது கதைவிட்டு திரிகிறார்.
அ.தி.மு.க. அரசின் கொரோனா தோல்வி வரலாறும் திமுக அரசின் கொரோனாவை வென்ற வரலாறும் நம் கண்முன்னே நிகழ்ந்தது. அதை மாற்றி எழுத எடப்பாடி பழனிச்சாமி சொல்லும் பொய்களும் புரட்டுகளும் ஒருபோதும் எடுபடாது.