நாமக்கல், ஏப். 13 –
நாமக்கல் கிழக்கு மாவட்டம் ராசிபுரம் தொகுதிக்குட்பட்ட வெண்ணந்தூர் ஒன்றியம் அத்தனூர் அண்ணா சிலை மற்றும் மோகனூர் பேரூரில் நடைபெற்ற தேர்தல் பிரச்சார கூட்டத்தில், திமுக வேட்பாளர் மா.மதிவேந்தனை ஆதரித்து கழகத் துணை பொதுச்செயலாளரும் மாநிலங்களவை குழு தலைவருமான திருச்சி சிவா எம்.பி கலந்து கொண்டு உரையாற்றினார்.
இந்த கூட்டத்தில் நாமக்கல் கிழக்கு மாவட்ட செயலாளரும் மாநிலங்களவை உறுப்பினரும் நாமக்கல் மாவட்டம் மத்திய கூட்டுறவு வங்கி தலைவருமான கே.ஆர்.என்.இராஜேஸ்குமார் தலைமை தாங்கினார். ஆதிதிராவிடர் நலத்துறை ஆதிதிராவிடர் மற்றும் பழங்குடியினர் நலத்துறை அமைச்சரும் ராசிபுரம் (தனி) தொகுதி வேட்பாளருமான மருத்துவர் மா.மதிவேந்தன், நாமக்கல் சட்டமன்ற வேட்பாளர் கே.பி.இராணி, ஒன்றிய திமுக செயலாளர் ஆர். எம்.துரைசாமி, பேரூர் செயலாளர்கள் அத்தனூர் கே.கண்ணன், வெண்ணந்தூர் ஆர்.எஸ்.எஸ்.ராஜேஷ் மோகனூர் ஒன்றிய செயலாளர் நவலடி பேரூர் செயலாளர் செல்லவேல் (எ) சி.செல்லப்பன் உள்ளிட்டஆகியோர் முன்னிலை வகித்தனர்=
கழகத் துணை பொதுச்செயலாளரும் மாநிலங்களவை குழு தலைவருமான திருச்சி சிவா எம்.பி கலந்து கொண்டு பேசுகையில், “தேர்தல் என்பது திருவிழா அல்ல. வாக்குச்சாவடிகளில் செலவழிக்கும் சில நிமிடங்களே உங்கள் வருங்கால வாழ்க்கையை தீர்மானி க்கும். அனைத்து ஆட்சிகளையும் அனுபவ ரீதியாக மதிப்பீடு செய்து, நன்றாக யோசித்து உங்கள் வாக்கை பயன்படுத்தவேண்டும். ஏன் அந்த வாக்கை எங்களுக்கு தர வேண்டும் என்பதை விளக்குவதற்காகவே நாங்கள் வந்துள்ளோம்” என்றார்.
“நாளை இதே இடத்தில் மற்ற கட்சிகளும் வரலாம். அவர்கள் பேசுவதையும் கேட்டுவிட்டு முடிவு எடுக்க வேண்டும். எல்லோரையும் சமமாக நடத்தும் இடம் வாக்குச்சாவடி தான். ஏப்ரல் 23-ஆம் தேதி பணக்காரர், ஏழை, படித்தவர், படிக்காதவர் என அனைவரும் ஒரே வரிசையில் நிற்பார்கள். இந்த நாட்டின் ஓட்டு சீட்டு அனைவரையும் சமமாக நடத்துகிறது. அதை சரியாக பயன்படுத்தினால் அடுத்த ஐந்து ஆண்டுகள் நிம்மதி யாக வாழலாம்” எனக் கூறினார்.