சென்னை, ஏப்.14 –
நெல்லுக்கு ஊக்கத் தொகை அளிக்கும் விவகாரத்தில் ஒன்றிய நிதி அமைச்சர்
நிர்மலா சீதாராமன் தமிழ்நாடு அரசுக்கு எழுதிய கடிதம் குறித்து முதல்வர் மு.க.ஸ்டாலின் அவர்கள் தமது பிரச்சாரக் கூட்டத்தில் உரையாற்றி இருந்தார்.
அதற்கு மறுப்பு தெரிவிக்கும் விதமாகஒன்றிய நிதி அமைச்சர் நிர்மலா சீதாராமன் சமுக வலைதளப் பக்கத்தில் பதிவிட்டார்.
இந்நிலையில்முதலமைச்சர் மு.க.ஸ்டாலின் அவர்கள், அவரது கடிதத்தை பொதுவெளியில் வெளியிடத் தயாரா? என கேள்வி எழுப்பினார்.
இதுதொடர்பாக முதலமைச்சர் மு.க.ஸ்டாலின் அவர்களின் சமூக வலைதளப் பதிவு வருமாறு:–
மாண்புமிகு நிர்மலா சீதாராமன்
அவர்களே,
“நெல்லுக்குத் தமிழ்நாடு அரசு வழங்கும் ஊக்கத்தொகையால் விளைச்சல் பெருகிக் கொண்டே போகிறது. எனவே, இந்த ஊக்கத்தொகையை நிறுத்த வேண்டும்” எனத் தமிழ்நாடு அரசு தலைமைச் செயலாளருக்குத் தங்களின் அமைச்சகம் அனுப்பிய கடிதத்தில் மிகத் தெளிவாகவே உள்ளது.
கடிதத்தில் இல்லாத எதையும் நான் பேசவில்லை. அப்படி, பேசவேண்டிய அவசியமும் எனக்கு இல்லை.
எங்களுக்கு அனுப்பிய கடிதத்தில், தற்போது மாநில அரசால் தரப்படும் ஊக்கத்தொகையை மறுபரிசீலனை செய்யுமாறும், நெல்லுக்கு இத்தகைய ஊக்கத்தொகை வழங்குவதை நிறுத்துவது தொடர்பாகப் பரிசீலனை செய்யவும் தெளிவாகக் குறிப்பிட்டுள்ளீர்கள்.
தங்களுடைய இந்தப் பதிவில், “குறைந்தபட்ச ஆதார விலையைத் தாண்டி ஊக்கத்தொகை வழங்குவது மாநில அரசின் முடிவு எனவும், அதனை யாரும் பறிக்கவில்லை” என்றும்
கூறியிருக்கிறீர்கள்.
தங்களது கூற்று உண்மைதானென்றால், அந்தக் கடிதத்தைப் பொதுவில் வெளியிடத் தாங்கள் தயாரா?
இவ்வாறு முதல்வர் மு.க.ஸ்டாலின் அவர்கள் சமூக வலைதளத்தில் பதிவிட்டுள்ளார்.